തിരുവനന്തപുരം: ലഹരിമരുന്ന് വാങ്ങാന് പണം നല്കാത്തതിന്റെ വൈരാഗ്യത്തില് യുവാവ് ബന്ധുവിന്റെ വീട് തീയിട്ട് നശിപ്പിച്ചു. കണിയാപുരത്ത് വാടകയ്ക്ക് താമസിക്കുന്ന ഷാജഹാന്റെ വീടിനാണ് ഭാര്യയുടെ സഹോദരീ പുത്രനായ ഫൈസല് (28) തീയിട്ടത്. തീ പടര്ന്നതിനെത്തുടര്ന്ന് വീടിനുള്ളിലെ ഗ്യാസ് സിലിണ്ടര് പൊട്ടിത്തെറിച്ചത് വലിയ പരിഭ്രാന്തി പരത്തി. കഴിഞ്ഞ ദിവസം രാത്രി ഏഴ് മണിയോടെയാണ് ഫൈസല് ഷാജഹാന്റെ വീട്ടിലെത്തി കഞ്ചാവ് വാങ്ങാനായി പണം ആവശ്യപ്പെട്ടത്. വീട്ടുകാര് പണം നല്കാന് വിസമ്മതിച്ചതോടെ ഇയാള് അക്രമാസക്തനാവുകയായിരുന്നു.
കയ്യിലുണ്ടായിരുന്ന കത്തി ഉപയോഗിച്ച് സ്വന്തം കൈഞരമ്പ് മുറിക്കാന് ശ്രമിച്ച ഫൈസല്, വീട് കത്തിക്കുമെന്ന് വീട്ടുകാരെ ഭീഷണിപ്പെടുത്തി. ഫൈസലിന്റെ അക്രമം ഭയന്ന് ഷാജഹാനും ഭാര്യ അമീനയും സമീപത്തെ വീട്ടിലേക്ക് മാറിനിന്ന സമയത്താണ് ഇയാള് വീടിന് തീയിട്ടത്. തീ വീടിനുള്ളിലേക്ക് ആളിപ്പടര്ന്നതോടെ അടുക്കളയിലുണ്ടായിരുന്ന ഗ്യാസ് സിലിണ്ടര് വന് ശബ്ദത്തോടെ പൊട്ടിത്തെറിച്ചു. സ്ഫോടന ശബ്ദം കേട്ടെത്തിയ നാട്ടുകാര് ഉടന് തന്നെ അഗ്നിരക്ഷാ സേനയെ വിവരമറിയിച്ചു. ഫയര്ഫോഴ്സ് യൂണിറ്റുകള് എത്തി ഏറെ പരിശ്രമിച്ചാണ് തീ നിയന്ത്രണവിധേയമാക്കിയത്.
അക്രമത്തില് വീടും ഉള്ളിലുണ്ടായിരുന്ന സാധനസാമഗ്രികളും പൂര്ണ്ണമായും നശിച്ച നിലയിലാണ്. സംഭവത്തിന് പിന്നാലെ ഒളിവില് പോയ പ്രതിക്കായി കണിയാപുരം പോലീസ് അന്വേഷണം ഊര്ജിതമാക്കി. പ്രദേശത്ത് ലഹരി സംഘങ്ങളുടെ ശല്യം വര്ധിച്ചുവരുന്നതായും ഇത്തരം അക്രമങ്ങള് ആവര്ത്തിക്കുന്നതായും നാട്ടുകാര് പരാതിപ്പെട്ടു.
