കോട്ടയം/തിരുവല്ല: എന്‍.ഡി.എയുടെ തിരഞ്ഞെടുപ്പ് പ്രചാരണാര്‍ത്ഥം പ്രധാനമന്ത്രി നരേന്ദ്രമോദി ഏപ്രില്‍ 4-ാം തീയതി ചങ്ങനാശ്ശേരിയിലും തിരുവല്ലയിലും എത്തുന്നതിനാല്‍ എം.സി റോഡിലും എ.സി റോഡിലും വിപുലമായ ഗതാഗത ക്രമീകരണങ്ങള്‍ ഏര്‍പ്പെടുത്തി. അന്നേ ദിവസം ഉച്ചയ്‌ക്ക് 12 മണി മുതല്‍ വൈകിട്ട് 6 മണി വരെ തിരുവല്ല മുതല്‍ ചങ്ങനാശ്ശേരി വരെയാണ് പ്രധാന നിയന്ത്രണങ്ങള്‍.
വൈകിട്ട് 3-ന് ചങ്ങനാശ്ശേരി പെരുന്ന എന്‍.എസ്.എസ് ഹിന്ദു കോളേജ് മൈതാനത്താണാണ് അദ്ദേഹം എത്തുന്നത്. തുടര്‍ന്ന് ചങ്ങനാശ്ശേരിയില്‍ നിന്ന് കാര്‍ മാര്‍ഗ്ഗം എം.സി റോഡിലൂടെ തിരുവല്ല നഗരസഭാ മൈതാനത്തേക്ക്. ഉച്ചയ്‌ക്ക് 1 മണി മുതല്‍ ചങ്ങനാശ്ശേരിയിലേക്കുള്ള പ്രവേശനം നിയന്ത്രിക്കും. 2 മണിയോടെ നഗരം പൂര്‍ണ്ണമായും പോലീസ് നിയന്ത്രണത്തിലാകും. 4-ാം തീയതി ഉച്ചയ്‌ക്ക് ശേഷം എം.സി റോഡിലെ യാത്ര ഒഴിവാക്കാന്‍ ശ്രദ്ധിക്കുക. അടിയന്തര ആവശ്യങ്ങള്‍ക്കായി പോകുന്നവര്‍ പോലീസ് നിര്‍ദ്ദേശിച്ച സമാന്തര പാതകള്‍ ഉപയോഗിക്കേണ്ടതാണെന്നും മുന്നറിയിപ്പില്‍ പറയുന്നു.
പ്രധാന ഗതാഗത മാറ്റങ്ങള്‍:
1. ആലപ്പുഴ ഭാഗത്തുനിന്നുള്ള വാഹനങ്ങള്‍:
കോട്ടയത്തേക്ക്: എ.സി റോഡ് വഴി വരുന്നവര്‍ കിടങ്ങറ ജംഗ്ഷനില്‍ നിന്ന് തിരിഞ്ഞ് കുന്നുംകരി, വാലടി വഴി എം.സി റോഡിലെ പൂവന്തുരുത്തില്‍ എത്തി യാത്ര തുടരണം.
തിരുവല്ലയിലേക്ക്: കിടങ്ങറയില്‍ നിന്ന് മുട്ടാര്‍ വഴി തിരുവല്ല-അമ്പലപ്പുഴ റോഡിലെത്തണം.
കെ.എസ്.ആര്‍.ടി.സി: ആലപ്പുഴയില്‍ നിന്നുള്ള ബസ്സുകള്‍ ചങ്ങനാശ്ശേരി കൈലാത്ത് പമ്പ്, മാതാ വേ ബ്രിഡ്ജ് എന്നിവിടങ്ങളില്‍ യാത്ര അവസാനിപ്പിക്കണം.
2. ചങ്ങനാശ്ശേരിയില്‍ നിന്നുള്ള വാഹനങ്ങള്‍:
തിരുവല്ല ഭാഗത്തേക്ക്: മാര്‍ക്കറ്റ് ഭാഗത്ത് നിന്നുള്ളവര്‍ എസ്.എച്ച് ജംഗ്ഷനില്‍ എത്തി പായിപ്പാട് വഴി പോകണം.
തിരുവനന്തപുരം ഭാഗത്തേക്ക്: പാലാത്ര ബൈപാസ് വഴി വരുന്നവര്‍ എസ്.എച്ച് ജംഗ്ഷന്‍ – മുക്കാട്ടുപടി – നാലുകോടി – പായിപ്പാട് വഴി കവിയൂര്‍ റോഡില്‍ പ്രവേശിക്കണം.
ആലപ്പുഴയിലേക്ക്: ടൗണില്‍ നിന്ന് പുഴവാത് അമ്പലം റോഡ് വഴി മനക്കച്ചിറ കുരിശടിയിലെത്തി എ.സി റോഡില്‍ പ്രവേശിക്കാം (വണ്‍വേ നിയന്ത്രണം).
3. കോട്ടയം ഭാഗത്തുനിന്നുള്ള വാഹനങ്ങള്‍:
തിരുവല്ല/തിരുവനന്തപുരം: കോട്ടയത്ത് നിന്ന് വരുന്നവര്‍ പാലാത്ര ജംഗ്ഷനില്‍ നിന്ന് ബൈപാസ് വഴി തിരിഞ്ഞ് നാലുകോടി, പായിപ്പാട് വഴി പോകണം.
ദീര്‍ഘദൂര യാത്രക്കാര്‍: മണര്‍കാട്, പുതുപ്പള്ളി, കറുകച്ചാല്‍, മല്ലപ്പള്ളി വഴി തിരുവനന്തപുരം ഭാഗത്തേക്ക് പോകുന്നത് അഭികാമ്യം.
4. തിരുവനന്തപുരം ഭാഗത്തുനിന്നുള്ള വാഹനങ്ങള്‍:
എറണാകുളം/കോട്ടയം: ചെങ്ങന്നൂരില്‍ നിന്ന് മുളക്കുഴ, പുല്ലാട്, മല്ലപ്പള്ളി വഴി മണര്‍കാട് ബൈപാസ് റോഡിലെത്തി പട്ടിത്താനം ജംഗ്ഷന്‍ വഴി പോകണം.
മറ്റൊരു വഴി: ചെങ്ങന്നൂര്‍ – പാണ്ടനാട് – പരുമല – മാന്നാര്‍ – ചക്കുളത്തുകാവ് – അമ്പലപ്പുഴ വഴി നാഷണല്‍ ഹൈവേയിലോ എ.സി റോഡിലോ പ്രവേശിക്കാം.
