ഡെറാഡൂണ്: വിരമിച്ച ആര്മി ബ്രിഗേഡിയറുടെ കൊലപാതകവുമായി ബന്ധപ്പെട്ട് ഉത്തരാഖണ്ഡ് പോലീസും പ്രതികളും തമ്മില് ഏറ്റുമുട്ടല്. ഡെറാഡൂണിലെ രാജ്പൂര് മേഖലയില് നടന്ന ഏറ്റുമുട്ടലില് ഒരു പ്രതിക്ക് വെടിയേറ്റു. സംഭവത്തില് രണ്ട് പ്രധാന പ്രതികളെ പോലീസ് അറസ്റ്റ് ചെയ്തു.
രഹസ്യവിവരത്തെത്തുടര്ന്ന് രാജ്പൂര് മേഖലയില് പോലീസ് നടത്തിയ പരിശോധനയ്ക്കിടെയാണ് പ്രതികളെ ജോഹ്രി ഗ്രാമത്തിന് സമീപം കണ്ടെത്തിയത്. പോലീസിനെ കണ്ടതോടെ പ്രതികള് ഗുനിയാല് ഗ്രാമത്തിലെ വനമേഖലയിലേക്ക് കടന്നുകളയാന് ശ്രമിച്ചു. പിന്തുടര്ന്ന പോലീസിന് നേരെ പ്രതികള് വെടിയുതിര്ക്കുകയായിരുന്നു. സ്വയരക്ഷയ്ക്കായി പോലീസ് തിരിച്ചു വെടിവെച്ചപ്പോള് ഒരു പ്രതിയുടെ കാലിന് പരിക്കേറ്റു. ഇയാളെ ഉടന് തന്നെ ആശുപത്രിയില് പ്രവേശിച്ചു.
ഉത്തര്പ്രദേശിലെ മുസാഫര്നഗര് സ്വദേശിയായ മുഹമ്മദ് കാവിഷ് ഹുസൈന് ത്യാഗി (22), സഹാറന്പൂര് സ്വദേശിയായ ശാന്തനു ത്യാഗി (21) എന്നിവരാണ് പിടിയിലായത്. ഇവരില് നിന്ന് ഒരു പിസ്റ്റളും പോലീസ് കണ്ടെടുത്തു. വിരമിച്ച ബ്രിഗേഡിയര് മുകേഷ് കുമാര് ജോഷിയുടെ മരണത്തിന് കാരണമായ സംഭവവുമായി ബന്ധപ്പെട്ടാണ് ഈ ഏറ്റുമുട്ടല് നടന്നത്. കഴിഞ്ഞ ദിവസം രാവിലെ നടക്കാനിറങ്ങിയ ബ്രിഗേഡിയര് ജോഷി, രണ്ട് സംഘങ്ങള് തമ്മിലുണ്ടായ തര്ക്കത്തിനിടയില് അബദ്ധത്തില് വെടിയേറ്റാണ് കൊല്ലപ്പെട്ടത്.
പ്രതികള് തലേദിവസം രാത്രി ഡെറാഡൂണിലെ ‘ജെന് ഇസഡ്’ ക്ലബ്ബില് പോയിരുന്നു. അവിടെ ബില്ലിനെച്ചൊല്ലി ക്ലബ് ജീവനക്കാരുമായി തര്ക്കമുണ്ടാവുകയും പ്രതികളെ ജീവനക്കാര് മര്ദ്ദിക്കുകയും ചെയ്തു. ഇതിന് പ്രതികാരം ചെയ്യാന് ക്ലബ് ഉടമകളെ പിന്തുടര്ന്ന പ്രതികള് ജോഹ്രി ഗ്രാമത്തില് വെച്ച് അവര്ക്ക് നേരെ വെടിയുതിര്ക്കുകയായിരുന്നു. ഈ വെടിയുണ്ടയാണ് നിര്ഭാഗ്യവശാല് ആ സമയം വഴിയിലൂടെ നടന്നുപോവുകയായിരുന്ന ബ്രിഗേഡിയര് ജോഷിക്ക് ഏറ്റത്.
സീനിയര് പോലീസ് സൂപ്രണ്ട് പ്രമേന്ദ്ര ഡോഭാലിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. ഫോറന്സിക് സംഘം സ്ഥലത്തെത്തി കൂടുതല് തെളിവുകള് ശേഖരിച്ചു. കേസില് കൂടുതല് അന്വേഷണം നടന്നുവരികയാണെന്ന് അധികൃതര് അറിയിച്ചു.
