ക്രിക്കറ്റ് നയതന്ത്രം: ഇന്ത്യയുമായി ബന്ധം പുതുക്കാന്‍ ബംഗ്ലാദേശ് ക്രിക്കറ്റ് ബോര്‍ഡ്; സെപ്റ്റംബറില്‍ ടീം ഇന്ത്യ ബംഗ്ലാദേശിലേക്ക്

ധാക്ക: ഇന്ത്യയുമായുള്ള കായിക ബന്ധം മെച്ചപ്പെടുത്തുന്നതിനും പുതിയ സഹകരണ മേഖലകള്‍ കണ്ടെത്തുന്നതിനുമായി ബംഗ്ലാദേശ് ക്രിക്കറ്റ് ബോര്‍ഡ് ബിസിസിഐയെ സമീപിച്ചു. ബിസിസിഐയുമായി പതിവായി ആശയവിനിമയം നടത്താറുണ്ടെന്നും ഇതിന്റെ ഭാഗമായി ഔദ്യോഗിക കത്ത് നല്‍കിയതായും ബിസിബി ക്രിക്കറ്റ് ഓപ്പറേഷന്‍സ് ഡയറക്ടര്‍ നസ്മുല്‍ ആബെദിന്‍ ഫഹീം വാര്‍ത്താ ഏജന്‍സിയായ എഎന്‍ഐയോട് സ്ഥിരീകരിച്ചു.

2026 സെപ്റ്റംബറില്‍ ഇന്ത്യന്‍ ദേശീയ ക്രിക്കറ്റ് ടീം ബംഗ്ലാദേശില്‍ പര്യടനം നടത്തും. ഇതിന് പിന്നാലെ ബംഗ്ലാദേശ് വനിതാ ടീം ഇന്ത്യ സന്ദര്‍ശിക്കാനും തീരുമാനമായിട്ടുണ്ട്. ഉഭയകക്ഷി ക്രിക്കറ്റ് പരമ്പരകള്‍ക്ക് പുറമെ മറ്റ് സഹകരണ സാധ്യതകളും കത്തില്‍ ബിസിബി മുന്നോട്ടുവെച്ചിട്ടുണ്ട്. ഐപിഎല്‍ 2026-ന് മുന്നോടിയായി ബംഗ്ലാദേശ് പേസര്‍ മുസ്തഫിസുര്‍ റഹ്‌മാനെ കൊല്‍ക്കത്ത നൈറ്റ് റൈഡേഴ്സ് ടീമിലെടുത്തെങ്കിലും രാഷ്‌ട്രീയ കാരണങ്ങളാല്‍ ബിസിസിഐ ഇടപെട്ട് താരത്തെ റിലീസ് ചെയ്യിപ്പിച്ചത് ഇരു ബോര്‍ഡുകളും തമ്മില്‍ അസ്വാരസ്യങ്ങള്‍ക്ക് കാരണമായിരുന്നു. ഇന്ത്യ ആതിഥേയത്വം വഹിച്ച ടി20 ലോകകപ്പ് ബംഗ്ലാദേശ് ബഹിഷ്‌കരിച്ചതും ബന്ധം വഷളാക്കി.

എന്നാല്‍, ഫെബ്രുവരി 12-ന് നടന്ന തിരഞ്ഞെടുപ്പിന് ശേഷം പ്രധാനമന്ത്രി താരിഖ് റഹ്‌മാന്റെ നേതൃത്വത്തിലുള്ള പുതിയ സര്‍ക്കാര്‍ ഇന്ത്യയുമായുള്ള ബന്ധം മെച്ചപ്പെടുത്താന്‍ നടപടികള്‍ സ്വീകരിച്ചു. ഏപ്രില്‍ 7, 8 തീയതികളില്‍ ബംഗ്ലാദേശ് വിദേശകാര്യ മന്ത്രി ഡോ. ഖലീലുര്‍ റഹ്‌മാന്‍ ഇന്ത്യ സന്ദര്‍ശിക്കാനിരിക്കെയാണ് ക്രിക്കറ്റ് ലോകത്തുനിന്നും ശുഭവാര്‍ത്തകള്‍ പുറത്തുവരുന്നത്. മൂന്ന് ഏകദിനങ്ങളും മൂന്ന് ട്വന്റി-20 മത്സരങ്ങളുമാണ് പരമ്പരയിലുള്ളത്. 2025 ഓഗസ്റ്റില്‍ നടക്കേണ്ടിയിരുന്ന പര്യടനം സുരക്ഷാ കാരണങ്ങളാലാണ് മാറ്റിവെച്ചിരുന്നത്.

മത്സരക്രമം:

സെപ്റ്റംബര്‍ 1: ഒന്നാം ഏകദിനം (മിര്‍പൂര്‍)

സെപ്റ്റംബര്‍ 3: രണ്ടാം ഏകദിനം (മിര്‍പൂര്‍)

സെപ്റ്റംബര്‍ 6: മൂന്നാം ഏകദിനം (ചട്ടോഗ്രാം)

സെപ്റ്റംബര്‍ 9: ഒന്നാം ടി20 (ചട്ടോഗ്രാം)

സെപ്റ്റംബര്‍ 12: രണ്ടാം ടി20 (മിര്‍പൂര്‍)

സെപ്റ്റംബര്‍ 13: മൂന്നാം ടി20 (മിര്‍പൂര്‍)

ബിസിസിഐയും ബിസിബിയും തമ്മിലുള്ള ചര്‍ച്ചകള്‍ക്ക് ശേഷം അന്തിമ സമയക്രമത്തില്‍ ഔദ്യോഗിക സ്ഥിരീകരണമുണ്ടാകും.