കൊച്ചി: യുവനടിയെ ലൈംഗികമായി അധിക്ഷേപിച്ചെന്ന പരാതിയില് പോലീസ് കസ്റ്റഡിയിലുള്ള സംവിധായകന് രഞ്ജിത്തിനെ ഇന്ന് തെളിവെടുപ്പിന് എത്തിക്കും. തനിക്കെതിരെയുള്ള ആരോപണങ്ങള് അടിസ്ഥാനരഹിതമാണെന്ന് രഞ്ജിത്ത് ആവര്ത്തിക്കുമ്പോഴും, അന്വേഷണവുമായി ശക്തമായി മുന്നോട്ട് പോവുകയാണ് പ്രത്യേക അന്വേഷണ സംഘം. സംഭവം നടന്നുവെന്ന് പറയപ്പെടുന്ന രണ്ട് കാരവനുകള് പോലീസ് ചങ്ങനാശേരിയില് നിന്ന് കസ്റ്റഡിയിലെടുത്ത് കൊച്ചിയില് എത്തിച്ചിട്ടുണ്ട്. ഈ കാരവനുകളില് വെച്ചാകും ഇന്ന് പ്രധാനമായും തെളിവെടുപ്പ് നടക്കുക. കേസില് നിര്ണ്ണായകമായ ശാസ്ത്രീയ തെളിവുകള് ശേഖരിക്കാനാണ് പോലീസിന്റെ നീക്കം.
സംഭവദിവസം ലൊക്കേഷനിലുണ്ടായിരുന്ന കാരവന് ഡ്രൈവറെ പോലീസ് ചോദ്യം ചെയ്തു. എന്നാല് ഇത്തരം ഒരു അതിക്രമത്തെക്കുറിച്ച് തനിക്ക് അറിവില്ലെന്നാണ് ഡ്രൈവര് നല്കിയ മൊഴി. ലൊക്കേഷനിലുണ്ടായിരുന്ന കൂടുതല് പേരുടെ മൊഴികള് പോലീസ് രേഖപ്പെടുത്തിയിട്ടുണ്ട്. തിങ്കളാഴ്ച വൈകുന്നേരം 4 മണി വരെയാണ് കോടതി രഞ്ജിത്തിനെ പോലീസ് കസ്റ്റഡിയില് വിട്ടിരിക്കുന്നത്. അറസ്റ്റ് അന്യായമാണെന്നും രഞ്ജിത്തിന് ഗുരുതരമായ ആരോഗ്യപ്രശ്നങ്ങളുണ്ടെന്നും ചൂണ്ടിക്കാട്ടി കസ്റ്റഡി അപേക്ഷയെ എതിര്ത്തിരുന്നു.
എന്നാല് കുറ്റകൃത്യത്തിന്റെ ഗൗരവം കണക്കിലെടുത്ത് പ്രതിയെ കസ്റ്റഡിയില് ചോദ്യം ചെയ്യേണ്ടത് അനിവാര്യമാണെന്ന് പ്രോസിക്യൂഷന് വാദിച്ചു. രഞ്ജിത്തിന്റെ ആരോഗ്യനില പരിഗണിച്ച് കസ്റ്റഡി കാലയളവില് കൃത്യമായ വൈദ്യപരിശോധന ഉറപ്പാക്കാന് കോടതി ഉത്തരവിട്ടിട്ടുണ്ട്. വനിതാ പോലീസ് സ്റ്റേഷനിലെ വിശദമായ ചോദ്യം ചെയ്യലിന് ശേഷമാകും രഞ്ജിത്തിനെ തെളിവെടുപ്പിന് കൊണ്ടുപോവുക. ഇദ്ദേഹത്തിന്റെ ജാമ്യാപേക്ഷ കോടതി ചൊവ്വാഴ്ച പരിഗണിക്കും.
