കണ്ണൂര്‍: മട്ടന്നൂര്‍ പൊറോറമുക്കില്‍ കാല്‍നടയാത്രക്കാരനെ ഇടിച്ചിട്ട ശേഷം നിര്‍ത്താതെ പോയ സംഭവത്തില്‍ അസ്ഥിരോഗ വിദഗ്ധനായ ഡോക്ടര്‍ക്കെതിരെ മട്ടന്നൂര്‍ പോലീസ് കേസെടുത്തു. പയ്യാമ്പലം സ്വദേശിയായ ഡോ. സുഹൈല്‍ ബഷീറാണ് സംഭവത്തില്‍ പോലീസ് നടപടി നേരിടുന്നത്. സി.പി.എം ലോക്കല്‍ കമ്മിറ്റിയംഗമായ കെ. സുരേന്ദ്രനാണ് അപകടത്തില്‍ പരിക്കേറ്റത്.
തിരഞ്ഞെടുപ്പ് പ്രചാരണ പ്രവര്‍ത്തനങ്ങള്‍ കഴിഞ്ഞ് വീട്ടിലേക്ക് മടങ്ങുകയായിരുന്നു സുരേന്ദ്രനെ അതിവേഗത്തിലെത്തിയ കാര്‍ ഇടിച്ചുതെറിപ്പിക്കുകയായിരുന്നു. പരിക്കേറ്റ ഇദ്ദേഹത്തെ ഉടന്‍ തന്നെ നാട്ടുകാര്‍ ആശുപത്രിയില്‍ എത്തിച്ചു. അപകടമുണ്ടാക്കിയ വാഹനം നിര്‍ത്താതെ പോയതിനെത്തുടര്‍ന്ന് പോലീസ് സിസിടിവി ദൃശ്യങ്ങള്‍ കേന്ദ്രീകരിച്ച് അന്വേഷണം ആരംഭിച്ചിരുന്നു.
പരിക്കേറ്റ സുരേന്ദ്രനെ വിദഗ്ധ ചികിത്സയ്‌ക്കായി കണ്ണൂരിലെ ആശുപത്രിയിലേക്ക് മാറ്റിയിരുന്നു. ഇതേ ആശുപത്രി പരിസരത്ത് ഹെഡ്ലൈറ്റ് തകര്‍ന്ന നിലയില്‍ കണ്ടെത്തിയ കറുത്ത കാറിനെക്കുറിച്ച് ബന്ധുക്കള്‍ പോലീസിനെ അറിയിക്കുകയായിരുന്നു. തുടര്‍ന്ന് നടത്തിയ പരിശോധനയില്‍ കാര്‍ ഡോക്ടറുടേതാണെന്ന് സ്ഥിരീകരിച്ചു. ഡോക്ടറെ കസ്റ്റഡിയിലെടുത്ത് മൊഴി രേഖപ്പെടുത്തിയ ശേഷം പോലീസ് നോട്ടീസ് നല്‍കി വിട്ടയച്ചു. അപകടമുണ്ടാക്കിയ കാര്‍ പോലീസ് കസ്റ്റഡിയിലെടുത്തു.
വാഹനം ഓടിക്കുന്നതിനിടയില്‍ ഉറങ്ങിപ്പോയതാണ് അപകടത്തിന് കാരണമായതെന്നാണ് ഡോക്ടര്‍ പോലീസിന് നല്‍കിയ മൊഴി. അപകടം നടന്നപ്പോള്‍ ഭയം കാരണം വാഹനം നിര്‍ത്താതെ പോയതാണെന്നും അദ്ദേഹം വിശദീകരിച്ചു. അപകടത്തില്‍ പരിക്കേറ്റ സുരേന്ദ്രന്റെ ശസ്ത്രക്രിയ നടത്തിയ മെഡിക്കല്‍ സംഘത്തില്‍ ഇതേ ഡോക്ടറും ഉള്‍പ്പെട്ടിരുന്നതായി സൂചനകളുണ്ട്. ഈ കാര്യത്തില്‍ കൂടുതല്‍ വ്യക്തത വരുത്താന്‍ മട്ടന്നൂര്‍ ഇന്‍സ്പെക്ടര്‍ ബിനു ആന്റണിയുടെ നേതൃത്വത്തിലുള്ള സംഘം അന്വേഷണം നടത്തിവരികയാണ്. നിലവില്‍ ശസ്ത്രക്രിയ കഴിഞ്ഞ് സുരേന്ദ്രന്‍ വീട്ടില്‍ വിശ്രമത്തിലാണ്.
അപകടകരമായ രീതിയില്‍ വാഹനമോടിച്ചതിനും പരിക്കേറ്റയാള്‍ക്ക് ചികിത്സ ലഭ്യമാക്കാതെ അപകടവിവരം പോലീസില്‍ നിന്ന് മറച്ചുവെച്ചതിനുമാണ് മോട്ടോര്‍ വാഹന നിയമപ്രകാരവും ഭാരതീയ ന്യായസംഹിത പ്രകാരവും കേസെടുത്തിരിക്കുന്നത്.
