മുംബൈ: ഗോരേഗാവിലെ ദിന്ദോഷിയില് മതഘോഷയാത്രയ്ക്ക് നേരെ ആക്രമണം. സന്തോഷ് നഗര് മാര്ക്കറ്റ് ഏരിയയില് നടന്ന മറിയം മാതാ ശോഭായാത്രയ്ക്കിടെയാണ് ഒരു വിഭാഗം മുസ്ലീം യുവാക്കള് ഭക്തരെ ആക്രമിച്ചത്. സംഭവത്തില് എട്ട് പേരെ പോലീസ് അറസ്റ്റ് ചെയ്തു. ഘോഷയാത്രയില് ആലപിച്ച ഭജനുകളെച്ചൊല്ലിയുണ്ടായ തര്ക്കമാണ് സംഘര്ഷത്തില് കലാശിച്ചതെന്നാണ് പ്രാഥമിക വിവരം. ഘോഷയാത്ര തടയാന് ശ്രമിച്ച ഒരു സംഘം ആളുകള് പന്തല് നശിപ്പിക്കുകയും ബജ്റംഗദള് പ്രവര്ത്തകര് ഉള്പ്പെടെയുള്ള പങ്കാളികളെ മര്ദ്ദിക്കുകയും ചെയ്തു. ആക്രമണത്തില് പരിക്കേറ്റ മൂന്ന് ബജ്റംഗദള് പ്രവര്ത്തകര് ജോഗേശ്വരിയിലെ ട്രോമ കെയര് ആശുപത്രിയില് ചികിത്സയിലാണ്.
വിവരമറിഞ്ഞ് സ്ഥലത്തെത്തിയ പോലീസ് ലാത്തിവീശിയാണ് അക്രമിസംഘത്തെ പിരിച്ചുവിട്ടത്. സിസിടിവി ദൃശ്യങ്ങളുടെ സഹായത്തോടെ പ്രതികളെ തിരിച്ചറിയുകയും അര്ദ്ധരാത്രിയോടെ എട്ടുപേരുടെ അറസ്റ്റ് രേഖപ്പെടുത്തുകയും ചെയ്തു. കൂടുതല് പ്രതികള്ക്കായി തിരച്ചില് തുടരുകയാണ്. സംഘര്ഷസാധ്യത കണക്കിലെടുത്ത് സന്തോഷ് നഗര് ഇപ്പോള് കനത്ത പോലീസ് സുരക്ഷയിലാണ്.
അക്രമ സംഭവങ്ങള്ക്ക് പിന്നാലെ, പ്രതികളില് ചിലര് താമസിച്ചിരുന്നത് അനധികൃത നിര്മ്മാണങ്ങളിലാണെന്ന് അധികൃതര് കണ്ടെത്തി. ഇതേത്തുടര്ന്ന് മുന്സിപ്പല് കോര്പ്പറേഷന് കനത്ത പോലീസ് സംരക്ഷണയില് പൊളിക്കല് നടപടികള് ആരംഭിച്ചു. ബുള്ഡോസറുകള് ഉപയോഗിച്ച് അനധികൃതമായ നിര്മ്മാണങ്ങളും കയ്യേറ്റങ്ങളും നീക്കം ചെയ്തു. പൊതുസ്ഥലങ്ങള് വീണ്ടെടുക്കുന്നതിനായുള്ള നടപടിയുടെ ഭാഗമാണിതെന്ന് അധികൃതര് വ്യക്തമാക്കി.
അതിനിടെ, ബിജെപി നേതാവ് കിരിത് സോമയ്യ ഇന്ന് പ്രദേശം സന്ദര്ശിക്കുമെന്ന് അറിയിച്ചിട്ടുണ്ട്. പ്രദേശത്ത് ഹനുമാന് ചാലിസ പാരായണത്തില് അദ്ദേഹം പങ്കെടുക്കുമെന്നാണ് റിപ്പോര്ട്ടുകള്. സ്ഥിതിഗതികള് നിരീക്ഷിച്ചു വരികയാണെന്നും കൂടുതല് അനിഷ്ട സംഭവങ്ങള് ഉണ്ടാകാതിരിക്കാന് ജാഗ്രത പാലിക്കുന്നുണ്ടെന്നും പോലീസ് അറിയിച്ചു.
