സിഡ്നി: മദ്യപിച്ച് വാഹനമോടിച്ചതിന് ഓസ്ട്രേലിയന് മുന്‍ ഓപ്പണര്‍ ഡേവിഡ് വാര്‍ണറെ സിഡ്നി പൊലീസ് അറസ്റ്റ് ചെയ്തു. സിഡ്നിയിലെ മറൂബ്രയില്‍ സംഭവം. പരിശോധനയില്‍ അനുവദനീയമായതിലും ഇരട്ടിയിലധികം അളവില്‍ രക്തത്തില്‍ മദ്യത്തിന്റെ അംശം കണ്ടെത്തിയതിനെ തുടര്‍ന്നാണ് നടപടി. റോഡരികില്‍ പൊലീസ് ശ്വാസപരിശോധനനടത്തുന്നതിനിടെ വാര്‍ണര്‍ ഓടിച്ചിരുന്ന വാന്‍ പരിശോധനാ കേന്ദ്രത്തിന് തൊട്ടുമുന്‍പായി നിര്‍ത്തുകയും പാര്‍ക്ക് ചെയ്യാന്‍ ശ്രമിക്കുകയും ചെയ്തു. ഇത് ശ്രദ്ധയില്‍പ്പെട്ട ട്രാഫിക് പൊലീസ് വാഹനം തടഞ്ഞ് പരിശോധിക്കുകയായിരുന്നു.
വാര്‍ണറുടെ രക്തത്തിലെ മദ്യത്തിന്റെ അളവ് 0.104 ആണെന്ന് പരിശോധനയില്‍ കണ്ടെത്തി. ഓസ്ട്രേലിയയില്‍ അനുവദനീയമായ പരിധിയുടെ ഇരട്ടിയിലധികമാണിത്. തുടര്‍ന്ന് താരത്തെ അറസ്റ്റ് ചെയ്ത് മറൂബ്ര പൊലീസ് സ്റ്റേഷനിലെത്തിച്ചു. വാര്‍ണറെ കോടതി വിളിപ്പിച്ചിരിക്കുകയാണ്.
നിലവില്‍ പാകിസ്ഥാന്‍ സൂപ്പര്‍ ലീഗില്‍ കറാച്ചി കിംഗ്സിന്റെ ക്യാപ്റ്റനാണ് വാര്‍ണര്‍. ഏപ്രില്‍ 9-ന് പെഷവാര്‍ സാല്‍മിക്കെതിരായ അടുത്ത മത്സരത്തിന് മുന്‍പുള്ള ഏഴ് ദിവസത്തെ ഇടവേളയിലാണ് അദ്ദേഹം സിഡ്നിയിലേക്ക് വ്യക്തിപരമായ ആവശ്യത്തിനായി എത്തിയത്. നിയമനടപടികള്‍ ആരംഭിച്ചെങ്കിലും പിഎസ്എല്ലില്‍ കളിക്കാന്‍ അദ്ദേഹം പാകിസ്ഥാനിലേക്ക് തിരിക്കും.
2024 ജനുവരിയില്‍ ടെസ്റ്റ് ക്രിക്കറ്റില്‍ നിന്നും 2023 ഏകദിന ലോകകപ്പിന് ശേഷം ഏകദിനത്തില്‍ നിന്നും വിരമിച്ച വാര്‍ണര്‍, 2024 ട്വന്റി-20 ലോകകപ്പിലാണ് അവസാനമായി അന്താരാഷ്‌ട്ര കുപ്പായമണിഞ്ഞത്. നിലവില്‍ ഫ്രാഞ്ചൈസി ക്രിക്കറ്റില്‍ സജീവമാണ് താരം.
