മുംബൈ: മുംബൈ വിമാനത്താവളത്തിലെ ടെര്‍മിനല്‍ 1ബിയില്‍ വ്യാഴാഴ്ച വൈകുന്നേരം വന്‍ തീപിടുത്തം. ഷോര്‍ട്ട് സര്‍ക്യൂട്ട് മൂലമാണ് അപകടമെന്നാണ് പ്രാഥമിക നിഗമനം. വിമാനത്താവളത്തിനുള്ളിലെ ഇരിപ്പിടങ്ങള്‍ ഉള്ള ഭാഗത്താണ് തീ പടര്‍ന്നത്. വൈകുന്നേരം 6:35-ഓടെയാണ് ടെര്‍മിനല്‍ 1ബിക്കുള്ളില്‍ തീയും പുകയും ശ്രദ്ധയില്‍പ്പെട്ടത്. ടെര്‍മിനലിനുള്ളിലെ കേബിള്‍ ട്രേകളിലും സ്വിച്ച് ബോക്‌സുകളിലുമാണ് തീപിടുത്തമുണ്ടായതെന്ന് മുംബൈ ഫയര്‍ ബ്രിഗേഡ് ചീഫ് ഓഫീസര്‍ രവീന്ദ്ര അംബുല്‍ഗേക്കര്‍ അറിയിച്ചു.
ടെര്‍മിനലിനുള്ളില്‍ കറുത്ത പുക നിറഞ്ഞതോടെ യാത്രക്കാര്‍ പരിഭ്രാന്തരായി. ഇതിന്റെ ദൃശ്യങ്ങള്‍ സോഷ്യല്‍ മീഡിയയില്‍ വ്യാപകമായി പ്രചരിക്കുന്നുണ്ട്. വിവരമറിഞ്ഞ ഉടന്‍ തന്നെ ഫയര്‍ ബ്രിഗേഡും പോലീസും വാര്‍ഡ് ജീവനക്കാരും സംഭവ സ്ഥലത്ത് എത്തി തീ അണയ്‌ക്കാന്‍ ശ്രമം തുടങ്ങിയിരുന്നു. ഏകദേശം 7:05-ഓടെ തീ നിയന്ത്രണവിധേയമാക്കി. നിലവില്‍ അപകടം പൂര്‍ണ്ണമായും ഒഴിവാക്കിയിട്ടുണ്ട്. തീപിടുത്തം ടെര്‍മിനലിന്റെ താഴത്തെ നിലയില്‍ മാത്രമായി ഒതുങ്ങിനിന്നു. ആര്‍ക്കും പരിക്കേറ്റതായി റിപ്പോര്‍ട്ടുകളില്ല. വിമാനത്താവളത്തിന്റെ സുരക്ഷാ ക്രമീകരണങ്ങള്‍ കൃത്യമായി പ്രവര്‍ത്തിച്ചതിനാല്‍ വലിയൊരു ദുരന്തമാണ് ഒഴിവായത്. വിമാന സര്‍വീസുകളെ ഇത് ബാധിച്ചിട്ടുണ്ടോ എന്ന് കാര്യത്തില്‍ ഔദ്യോഗിക സ്ഥിരീകരണം വരാനിരിക്കുന്നതേയുള്ളൂ
കഴിഞ്ഞ ഫെബ്രുവരിയില്‍ മുംബൈ വിമാനത്താവളത്തിന് സമീപമുള്ള അന്ധേരിയിലെ ഒരു ഹോട്ടലിലും സമാനമായ രീതിയില്‍ തീപിടുത്തം ഉണ്ടായിരുന്നു. അന്നും എസി യൂണിറ്റിലെ ഷോര്‍ട്ട് സര്‍ക്യൂട്ടാണ് കാരണമായിരുന്നത്. തുടര്‍ച്ചയായുണ്ടാകുന്ന ഇത്തരം സംഭവങ്ങള്‍ വിമാനത്താവള പരിസരത്തെ സുരക്ഷാ ക്രമീകരണങ്ങളെക്കുറിച്ച് ചര്‍ച്ചകള്‍ക്ക് വഴിവെച്ചിട്ടുണ്ട്.സംഭവത്തില്‍ മുംബൈ പോലീസ് വിശദമായ അന്വേഷണം ആരംഭിച്ചു. യാത്രക്കാരുടെ സുരക്ഷ കണക്കിലെടുത്ത് ടെര്‍മിനലില്‍ കൂടുതല്‍ പരിശോധനകള്‍ നടത്തുന്നുണ്ട്.
