കൊല്ലം: നഗരത്തില് അമിതവേഗത്തിലെത്തിയ കാര് ബൈക്കിലിടിച്ച് കായികാധ്യാപകനും ദേശീയ ഹാന്ഡ്ബോള് താരവുമായ അജിത് കുമാര് (50) മരിച്ചു. കൊല്ലം ജെ.എന്.ആര്.എ നഗറില് ‘വിജയ് ഭവനില്’ താമസിക്കുന്ന ഇദ്ദേഹം പട്ടത്താനം ഗവ. എസ്.എന്.ഡി.പി യു.പി സ്കൂളിലെ അധ്യാപകനാണ്. വ്യാഴാഴ്ച രാത്രി 10.15-ഓടെ ചിന്നക്കട-ആശ്രാമം റെസിഡന്സി റോഡിലായിരുന്നു അപകടം.
ആശ്രാമം ഭാഗത്തുനിന്നും അതിവേഗത്തില് വന്ന കാര് നിയന്ത്രണം വിട്ട് എതിര്ദിശയില് വരികയായിരുന്ന അജിത് കുമാറിന്റെ ബൈക്കില് ഇടിച്ചു കയറുകയായിരുന്നു. പുള്ളിക്കട കോളനിക്ക് സമീപം വെച്ചുണ്ടായ ഇടിയുടെ ആഘാതത്തില് അജിത് കുമാര് ദൂരേക്ക് തെറിച്ചുവീണു. റോഡിന് സമീപത്തെ താഴ്ചയുള്ള ഇടറോഡിലേക്കാണ് ഇദ്ദേഹം വീണത്. സംഭവസ്ഥലത്തുതന്നെ മരണം സംഭവിച്ചു.
കാര് അമിതവേഗത്തിലായിരുന്നുവെന്ന് ദൃക്സാക്ഷികള് പറയുന്നു. അപകടത്തിന് പിന്നാലെ കാറിലുണ്ടായിരുന്ന നാലംഗ സംഘത്തിലെ രണ്ടുപേര് ഓടിരക്ഷപ്പെട്ടു. അപകടസ്ഥലത്ത് രക്തം തളംകെട്ടി നില്ക്കുന്ന ഭീകരമായ അവസ്ഥയായിരുന്നു. നാട്ടുകാര് ഉടന് തന്നെ പോലീസിനെ വിവരമറിയിച്ചു. കൊല്ലം ഈസ്റ്റ് പോലീസ് സംഭവസ്ഥലത്തെത്തി മേല്നടപടികള് സ്വീകരിച്ചു. രക്ഷപ്പെട്ട പ്രതികള്ക്കായി പോലീസ് തിരച്ചില് ഊര്ജ്ജിതമാക്കിയിട്ടുണ്ട്.
അജിത് കുമാറിന്റെ മൃതദേഹം നിലവില് ജില്ലാ ആശുപത്രി മോര്ച്ചറിയില് സൂക്ഷിച്ചിരിക്കുകയാണ്. മികച്ച കായികതാരവും അധ്യാപകനുമായ അജിത് കുമാറിന്റെ വിയോഗം കായിക ലോകത്തിനും വിദ്യാര്ത്ഥികള്ക്കും വലിയ ആഘാതമായി.
