കൊല്ക്കത്ത: പശ്ചിമ ബംഗാളിന്റെ സമഗ്ര വികസനവും സ്ത്രീകളുടെ സുരക്ഷയും ലക്ഷ്യമിട്ട് ബിജെപിയുടെ തിരഞ്ഞെടുപ്പ് പ്രകടനപത്രിക പുറത്തിറക്കി. കേന്ദ്ര ആഭ്യന്തര മന്ത്രി അമിത് ഷാ കൊല്ക്കത്തയില് വെച്ചാണ് ചരിത്രപരമായ ഈ പ്രഖ്യാപനങ്ങള് നടത്തിയത്. സ്ത്രീ ശാക്തീകരണത്തിന് മുന്തൂക്കം നല്കുന്ന പത്രികയില് ബംഗാളിലെ ഓരോ വനിതയ്ക്കും മാസം 3000 രൂപ ധനസഹായം ഉറപ്പുനല്കുന്നു. സംസ്ഥാനത്തെ എല്ലാ സ്ത്രീകള്ക്കും പ്രതിമാസം 3000 രൂപ നേരിട്ട് ബാങ്ക് അക്കൗണ്ടിലെത്തിക്കുന്നതിലൂടെ അവരുടെ സാമ്പത്തിക സ്വാതന്ത്ര്യം ബിജെപി ഉറപ്പാക്കും.
സര്ക്കാര് ജോലികളില് സ്ത്രീകള്ക്ക് 33 ശതമാനം സംവരണം ഏര്പ്പെടുത്തിക്കൊണ്ട് ഭരണരംഗത്ത് സ്ത്രീപങ്കാളിത്തം വര്ദ്ധിപ്പിക്കും. സ്ത്രീകളുടെ സുരക്ഷയ്ക്കായി പ്രത്യേക ആന്റി-റോമിയോ സ്ക്വാഡുകളും വനിതാ ബറ്റാലിയനുകളും രൂപീകരിക്കും. ഇതോടെ ബംഗാളിലെ സ്ത്രീകള്ക്ക് ഭയരഹിതമായി ജീവിക്കാനുള്ള സാഹചര്യം ഒരുങ്ങും. ജോലി ലഭിക്കാത്ത യുവാക്കള്ക്ക് ആശ്വാസമായി പ്രതിമാസം 3000 രൂപ നല്കും. സര്ക്കാര് ജീവനക്കാരുടെ ദീര്ഘകാല ആവശ്യമായ ഏഴാം ശമ്പള കമ്മീഷന് അധികാരമേറ്റാലുടന് നടപ്പിലാക്കും.
ഏകീകൃത സിവില് കോഡ് നടപ്പിലാക്കുന്നതിലൂടെ എല്ലാവര്ക്കും തുല്യനീതി ഉറപ്പാക്കും. കന്നുകാലി കടത്ത് പൂര്ണ്ണമായും നിരോധിക്കാന് കര്ശന നിയമം കൊണ്ടുവരും. സ്ത്രീകള്ക്ക് കൂടുതല് പ്രാതിനിധ്യം നല്കാനായി കേന്ദ്രസര്ക്കാര് കൊണ്ടുവരുന്ന വനിതാ സംവരണ ബില്ലിലെ മാറ്റങ്ങളെ കോണ്ഗ്രസും സിപിഎമ്മും എതിര്ക്കുന്നത് അവരുടെ രാഷ്ട്രീയ പാപ്പരത്തമാണെന്ന് ബിജെപി ചൂണ്ടിക്കാട്ടി. സീറ്റുകളുടെ എണ്ണം വര്ദ്ധിപ്പിച്ച് സംവരണം നടപ്പിലാക്കാനുള്ള ജനക്ഷേമകരമായ തീരുമാനത്തില് നിന്നും പിന്നോട്ട് പോകില്ലെന്ന് ബിജെപി നേതൃത്വം വ്യക്തമാക്കി.
ബംഗാളിലെ അഴിമതി നിറഞ്ഞ ഭരണത്തിന് അന്ത്യം കുറിച്ച്, മതസ്വാതന്ത്ര്യവും വികസനവും ഉറപ്പാക്കുന്ന ഒരു പുതിയ ഭരണക്രമമാണ് ബിജെപി വാഗ്ദാനം ചെയ്യുന്നത്. അമിത് ഷായുടെ പ്രഖ്യാപനങ്ങള് ബംഗാളിലെ ജനങ്ങള്ക്കിടയില് വലിയ ആവേശം പടര്ത്തിയിട്ടുണ്ട്.
