കോഴിക്കോട്: നഗരത്തില്‍ ഓടിക്കൊണ്ടിരുന്ന സിറ്റി സര്‍വ്വീസ് ബസ് തീപിടിച്ച് പൂര്‍ണ്ണമായും കത്തിയമര്‍ന്നു. മാങ്കാവ് – പന്തീരാങ്കാവ് റൂട്ടില്‍ കടുപ്പിനി പാലത്തിന് സമീപം ശനിയാഴ്ച ഉച്ചയ്‌ക്കാണ് അപകടമുണ്ടായത്. ബസ് ജീവനക്കാരുടെയും യാത്രക്കാരുടെയും സമയോചിതമായ ഇടപെടല്‍ മൂലം വലിയൊരു അപകടം തലനാരിഴയ്‌ക്കാണ് ഒഴിവായത്.
ഉച്ചയ്‌ക്ക് ഏകദേശം 1.45-ഓടെയാണ് അപകടത്തിന്റെ തുടക്കം. ബസ്സില്‍ നിന്ന് പുക ഉയരുന്നത് ശ്രദ്ധയില്‍പ്പെട്ട ഉടന്‍ തന്നെ ഡ്രൈവര്‍ വാഹനം നിര്‍ത്തുകയും യാത്രക്കാരെയും ജീവനക്കാരെയും വേഗത്തില്‍ പുറത്തിറക്കുകയും ചെയ്തു. നിമിഷങ്ങള്‍ക്കകം തീ ആളിപ്പടരുകയും ബസ് പൂര്‍ണ്ണമായും അഗ്‌നിക്കിരയാവുകയും ചെയ്തു.
ഡീസലിന് പുറമെ സിഎന്‍ജി (ഇന്ധനത്തിലും പ്രവര്‍ത്തിക്കുന്ന ബസ്സായിരുന്നു ഇത്. എന്നാല്‍ അപകടസമയത്ത് സിഎന്‍ജി സിലിണ്ടറുകള്‍ കാലിയായിരുന്നതിനാല്‍ വലിയൊരു സ്‌ഫോടനം ഒഴിവായി. മീഞ്ചന്തയില്‍ നിന്നും ഫയര്‍ഫോഴ്‌സ് യൂണിറ്റുകള്‍ സ്ഥലത്തെത്തിയാണ് തീ പൂര്‍ണ്ണമായും നിയന്ത്രണവിധേയമാക്കിയത്. അപകടത്തെത്തുടര്‍ന്ന് പന്തീരാങ്കാവ് റോഡില്‍ അല്‍പ്പസമയം ഗതാഗത തടസ്സമുണ്ടായി. കൂടുതല്‍ അന്വേഷണങ്ങള്‍ക്കായി അധികൃതര്‍ നടപടികള്‍ ആരംഭിച്ചിട്ടുണ്ട്.
