നാഗ്പൂര്‍: ആഗോള ബോക്‌സ് ഓഫീസില്‍ തരംഗമായി മാറിയ ‘ധുരന്ധര്‍ 2’ എന്ന ചിത്രത്തിന്റെ വന്‍ വിജയത്തിന് പിന്നാലെ ബോളിവുഡ് സൂപ്പര്‍താരം രണ്‍വീര്‍ സിംഗ് ആര്‍എസ്എസ് ആസ്ഥാനം സന്ദര്‍ശിച്ചു. നാഗ്പൂരിലെ മഹാലിലുള്ള ആസ്ഥാനത്തെത്തിയ താരം ആര്‍എസ്എസ് സര്‍സംഘചാലക് മോഹന്‍ ഭഗവതുമായി കൂടിക്കാഴ്ച നടത്തി. ശനിയാഴ്ച വൈകിട്ട് നാല് മണിയോടെ വിമാനമിറങ്ങിയ താരം നേരിട്ട് ആസ്ഥാനത്തേക്ക് തിരിക്കുകയായിരുന്നു.
ആര്‍എസ്എസ് ആസ്ഥാനത്ത് ഏകദേശം ഒന്നര മണിക്കൂറോളം സമയം ചെലവഴിച്ച രണ്‍വീര്‍ സിംഗ്, സംഘടനയുടെ പ്രവര്‍ത്തനങ്ങളെക്കുറിച്ചും ആശയങ്ങളെക്കുറിച്ചും നേതാക്കളുമായി ചര്‍ച്ച നടത്തി. ആര്‍എസ്എസ് സ്ഥാപകന്‍ ഡോ. ഹെഗ്ഡേവാര്‍, മുന്‍ സര്‍സംഘചാലക് എം.എസ്. ഗോള്‍വാള്‍ക്കര്‍ എന്നിവരുടെ സ്മൃതി മന്ദിരങ്ങളിലെത്തി അദ്ദേഹം ആദരവര്‍പ്പിച്ചു. ‘ധുരന്ധര്‍ 2’ എന്ന ചിത്രത്തിന്റെ പ്രമേയത്തെക്കുറിച്ചും വിജയത്തെക്കുറിച്ചും മോഹന്‍ ഭഗവതുമായി താരം സംസാരിച്ചതായാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്.
തിയറ്ററുകളില്‍ എത്തിയ ചിത്രം ഇതുവരെയുള്ള പല റെക്കോര്‍ഡുകളും തകര്‍ത്ത് മുന്നേറുകയാണ്. നിര്‍മ്മാതാക്കളായ ജിയോ സ്റ്റുഡിയോസ് പുറത്തുവിട്ട ഏറ്റവും പുതിയ കണക്കുകള്‍ പ്രകാരം ചിത്രം വമ്പിച്ച നേട്ടമാണ് സ്വന്തമാക്കിയിരിക്കുന്നത്. 1680 കോടി രൂപയാണ് ആഗോള വരുമാനം. രാജ്യത്തുനിന്ന് മാത്രം 1276 കോടി രൂപ ഗ്രോസ് കളക്ഷനാണ് ചിത്രം നേടിയിരിക്കുന്നത്. കഴിഞ്ഞ ഡിസംബറില്‍ റിലീസ് ചെയ്ത ആദ്യ ഭാഗത്തിന്റെ വന്‍ വിജയത്തിന് പിന്നാലെ വെറും മൂന്ന് മാസത്തിനുള്ളിലാണ് രണ്ടാം ഭാഗം എത്തിയത്. വിമാനത്താവളത്തിലും മറ്റും രണ്‍വീറിനെ കാണാന്‍ വന്‍ ജനക്കൂട്ടമാണ് തടിച്ചുകൂടിയത്.
