കൊച്ചി: “തളിരോമലേ… ചെറു തൂവലേ… കണിയായ് വാ… കളിയാടി വാ…” — മലയാളികളുടെ പ്രിയഗായിക കെ.എസ്. ചിത്രയുടെ മാധുര്യമാർന്ന ശബ്ദത്തിൽ എത്തിയ ഈ ഗാനം ഇതിനോടകം സോഷ്യൽ മീഡിയയിൽ ശ്രദ്ധ നേടുകയാണ്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച് ജൂഡ് ആന്റണി ജോസഫ് സംവിധാനം ചെയ്യുന്ന ‘തുടക്കം’ എന്ന ചിത്രത്തിലെ ആദ്യ വീഡിയോ ഗാനമാണ് അണിയറപ്രവർത്തകർ പുറത്തുവിട്ടത്.
ജോപോൾ രചിച്ച് ജെയ്ക്ക് ബിജോയ് സംഗീതം നൽകിയ ഗാനത്തിന് ഹൃദയസ്പർശിയായ ദൃശ്യാവിഷ്കാരമാണ് ഒരുക്കിയിരിക്കുന്നത്. മാതാപിതാക്കളുടെ പൊന്നോമനയായ മകളോടുള്ള അമ്മയുടെ സ്നേഹവും കരുതലും കോർത്തിണക്കിയ ഗാനം കുടുംബപ്രേക്ഷകരുടെ മനസ്സ് കീഴടക്കുകയാണ്. ഗാനരംഗത്തിലെ വികാരഭരിതമായ ദൃശ്യങ്ങളും ചിത്രയുടെ ആലാപനവും ചേർന്ന് ഗാനത്തെ കൂടുതൽ മനോഹരമാക്കുന്നു.
വീഡിയോ ഗാനത്തിൽ വിസ്മയ മോഹൻലാൽ, സായ്കുമാർ, ചിപ്പി, എസ്സാ എന്നിവരാണ് പ്രത്യക്ഷപ്പെടുന്നത്. നീണ്ട ഇടവേളയ്ക്കുശേഷം ചിപ്പി വീണ്ടും ബിഗ് സ്ക്രീനിലേക്ക് മടങ്ങിയെത്തുന്ന ചിത്രമെന്ന പ്രത്യേകതയും ‘തുടക്കം’ സ്വന്തമാക്കുന്നു.
ഒരു സാധാരണ കുടുംബത്തിന്റെ പശ്ചാത്തലത്തിൽ ആരംഭിക്കുന്ന കഥയിൽ അപ്രതീക്ഷിത വഴിത്തിരിവുകൾ ഒളിഞ്ഞിരിക്കുന്നുവെന്നാണ് സൂചന. ആഗസ്റ്റ് 7-ന് ചിത്രം തിയറ്ററുകളിലെത്തും.
‘2018’ എന്ന വമ്പൻ വിജയചിത്രത്തിന് ശേഷം ജൂഡ് ആന്റണി ജോസഫ് സംവിധാനം ചെയ്യുന്ന ചിത്രമെന്ന നിലയിലും, വിസ്മയ മോഹൻലാലിന്റെ അഭിനയരംഗത്തെ അരങ്ങേറ്റം എന്ന നിലയിലും, മോഹൻലാലിന്റെ നിർണായക സാന്നിധ്യം കൊണ്ടും ‘തുടക്കം’ ഇതിനകം ശ്രദ്ധാകേന്ദ്രമായി മാറിയിട്ടുണ്ട്.
പീരുമേട്, തൊടുപുഴ, കൊച്ചി എന്നിവിടങ്ങളിലായി ചിത്രീകരണം പൂർത്തിയായ ചിത്രത്തിന്റെ പോസ്റ്റ്-പ്രൊഡക്ഷൻ ജോലികൾ പുരോഗമിക്കുകയാണ്.
ഡോ. എമിൽ ആന്റണിയും ഡോ. അനീഷ ആന്റണിയുമാണ് എക്സിക്യൂട്ടീവ് പ്രൊഡ്യൂസർമാർ. പുതുമുഖം ആശിഷ് ജോ ആന്റണി സുപ്രധാന കഥാപാത്രത്തെ അവതരിപ്പിക്കുന്നു.
മനോജ് കെ. ജയൻ, ഗണേഷ് കുമാർ, ബോബി കുര്യൻ, ദിനേശ് പ്രഭാകർ, ജാഫർ ഇടുക്കി, കോട്ടയം രമേഷ്, ജിബിൻ ഗോപിനാഥ്, ശിവദാസ് കണ്ണൂർ, ജയ്സ് ജോസ്, ജയ കുറുപ്പ്, അശ്വിനി വിജയൻ എന്നിവരും പ്രധാന വേഷങ്ങളിലെത്തുന്നു. ഇവർക്കൊപ്പം മോഹൻലാലും നിർണായക കഥാപാത്രത്തെ അവതരിപ്പിക്കുന്നു.
ലിനീഷ് നെല്ലിക്കൽ, അഖിൽ കൃഷ്ണ, ജൂഡ് ആന്റണി ജോസഫ് എന്നിവർ ചേർന്നാണ് തിരക്കഥ. സംഗീതം ജെയ്ക്ക് ബിജോയ്, ഛായാഗ്രഹണം അഖിൽ ജോർജ്, ജോമോൻ ടി. ജോൺ, എഡിറ്റിംഗ് ചമൻ ചാക്കോ, പ്രൊഡക്ഷൻ ഡിസൈൻ സന്തോഷ് രാമൻ എന്നിവരാണ്.
