തിരുവനന്തപുരം: തലസ്ഥാന നഗരിയിലെ പെട്രോൾ പമ്പിൽ ലക്ഷങ്ങളുടെ കവർച്ച. തിരുവനന്തപുരം നഗരത്തിൽ പാളയത്തെ പെട്രോൾ പമ്പിലാണ് മോഷണം നടന്നത്. പമ്പിലെ ഓഫീസിൽ കടന്നുകയറിയ മോഷ്ടാവ് ഒന്നര ലക്ഷം രൂപയുമായി ഓടിരക്ഷപ്പെടുകയായിരുന്നു. ഇന്ന് പുലർച്ചെയാണ് സംഭവം.
എംജി റോഡിനോട് ചേർന്നുള്ള ഇതേ പമ്പിൽ മുൻപൊരിക്കലും മോഷണം നടന്നിട്ടുണ്ട്. ഇന്ന് മോഷണ സമയത്ത് പമ്പിൽ ഒരു ജീവനക്കാരൻ മാത്രമാണ് ഉണ്ടായിരുന്നത്. സിസിടിവി ദൃശ്യങ്ങളും അത് സ്ഥിരീകരിക്കുന്നുണ്ട്.
ജീവനക്കാരന്റെ കണ്ണുവെട്ടിച്ചാണ് മൂന്ന് ദിവസത്തെ കളക്ഷൻ തുകയായ ഒന്നര ലക്ഷം രൂപ തട്ടിയെടുത്ത് മോഷ്ടാവ് ഓടിപ്പോയത്. മുൻപ് ഇവിടെ മോഷണം നടത്തിയയാൾതന്നെയാണോ ഇത്തവണയും മോഷണം നടത്തിയത് എന്നതിലും അന്വേഷണം ആരംഭിച്ചിട്ടുണ്ട്. സംഭവമറിഞ്ഞയുടൻ വിരലടയാള വിദഗ്ദ്ധരടക്കം എത്തി തെളിവുകൾ ശേഖരിച്ചു. മ്യൂസിയം പൊലീസാണ് അന്വേഷണം നടത്തുന്നത്.
