തിരുവനന്തപുരം: കേരളത്തില് വേനല്ച്ചൂട് അസഹനീയമായി തുടരുന്നു. ഏപ്രില് 18 വരെ സംസ്ഥാനത്തെ ഭൂരിഭാഗം ജില്ലകളിലും കടുത്ത ചൂടും അസ്വസ്ഥതയും തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി. വയനാടും ഇടുക്കിയും ഒഴികെയുള്ള 12 ജില്ലകളില് നിലവില് യെല്ലോ അലര്ട്ട് പ്രഖ്യാപിച്ചിട്ടുണ്ട്. സാധാരണയേക്കാള് 2 മുതല് 3 ഡിഗ്രി സെല്ഷ്യസ് വരെ താപനില ഉയരാന് സാധ്യതയുണ്ടെന്നാണ് റിപ്പോര്ട്ട്.
സംസ്ഥാനത്തെ ഏറ്റവും ഉയര്ന്ന ചൂട് രേഖപ്പെടുത്തുന്നത് പാലക്കാട്ടാണ് 40 ഡിഗ്രി സെല്ഷ്യസ്. ഇത് സാധാരണയേക്കാള് 3.3 ഡിഗ്രി സെല്ഷ്യസ് കൂടുതലാണ്. കൊല്ലം പുനലൂരില് താപനില 38 ഡിഗ്രി സെല്ഷ്യസിലേക്ക് ഉയര്ന്നു. പത്തനംതിട്ട മുതല് കാസര്ഗോഡ് വരെയുള്ള ഒന്പത് ജില്ലകളില് താപനില 37 ഡിഗ്രി സെല്ഷ്യസ് വരെയും തിരുവനന്തപുരത്ത് 36 ഡിഗ്രി സെല്ഷ്യസ് വരെയും ഉയരാന് സാധ്യതയുണ്ട്.
ചൂട് വര്ദ്ധിച്ചതോടെ സംസ്ഥാനത്തെ വൈദ്യുതി ആവശ്യകതയും റെക്കോര്ഡുകള് ഭേദിക്കുകയാണ്. തിങ്കളാഴ്ച രാത്രിയിലെ വൈദ്യുതി ഉപയോഗം 11.23 കോടി യൂണിറ്റായി ഉയര്ന്നു. ഒരേസമയം വേണ്ടിവന്ന വൈദ്യുതിയുടെ അളവ് 5933 മെഗാവാട്ടിലെത്തി. 2024 മെയ് മാസത്തിലെ സര്വ്വകാല റെക്കോര്ഡിന് തൊട്ടടുത്താണ് നിലവിലെ ഉപഭോഗം. സൂര്യാഘാതം, നിര്ജ്ജലീകരണം എന്നിവ ഒഴിവാക്കാന് കാലാവസ്ഥാ വകുപ്പും ആരോഗ്യവിഭാഗവും കര്ശന നിര്ദ്ദേശങ്ങള് നല്കി:
പകല് 11 മണി മുതല് 3 മണി വരെ നേരിട്ട് വെയില് ഏല്ക്കുന്നത് പരമാവധി ഒഴിവാക്കുക. പാനീയങ്ങള്: ദാഹം തോന്നിയില്ലെങ്കിലും ധാരാളം വെള്ളം കുടിക്കുക. സംഭാരം, ഒ.ആര്.എസ് എന്നിവ ഉപയോഗിക്കാം. മദ്യം, ചായ, കാപ്പി, കാര്ബണേറ്റഡ് പാനീയങ്ങള് എന്നിവ പകല് ഒഴിവാക്കുന്നത് നല്ലതാണ്. ഇളം നിറത്തിലുള്ള അയഞ്ഞ കോട്ടണ് വസ്ത്രങ്ങള് ധരിക്കുക. പുറത്തിറങ്ങുമ്പോള് കുടയോ തൊപ്പിയോ ഉപയോഗിക്കുക. പഴങ്ങളും പച്ചക്കറികളും ഭക്ഷണത്തില് ധാരാളമായി ഉള്പ്പെടുത്തുക.
