ആലപ്പുഴ: കടുത്ത വേനലില്‍ കുടിവെള്ളത്തിനായി വലയുന്ന കുട്ടനാട്ടിലെ ജനങ്ങള്‍ക്ക് ആശ്വാസവുമായി നടന്‍ മോഹന്‍ലാലിന്റെ വിശ്വശാന്തി ഫൗണ്ടേഷന്‍. ഫൗണ്ടേഷന്റെ ‘ശാന്തിതീര്‍ഥം’ പദ്ധതിയുടെ ഭാഗമായി കുട്ടനാട്ടിലെ മൂന്ന് വാര്‍ഡുകളില്‍ സ്ഥാപിച്ച സോളാര്‍ ഓട്ടോമേറ്റഡ് ശുദ്ധജല പ്ലാന്റുകള്‍ പ്രവര്‍ത്തനസജ്ജമായി. വിഷുദിനത്തോടനുബന്ധിച്ച് ഒരുക്കിയ ഈ പദ്ധതി ആയിരത്തോളം കുടുംബങ്ങള്‍ക്കാണ് തണലാകുന്നത്. കണ്ടങ്കരി, മുരിക്കോല്‍മുട്ട്, നെടുമുടി എന്നീ പ്രദേശങ്ങളിലെ കുടിവെള്ളക്ഷാമം പരിഹരിക്കാനാണ് ഈ ഘട്ടത്തില്‍ ലക്ഷ്യമിടുന്നത്.
പൂര്‍ണ്ണമായും സൗരോര്‍ജ്ജത്തില്‍ പ്രവര്‍ത്തിക്കുന്ന മൂന്ന് ആര്‍.ഒ പ്ലാന്റുകളാണ് സ്ഥാപിച്ചിട്ടുള്ളത്. പ്രതിദിനം ഓരോ കുടുംബത്തിനും 20 ലിറ്റര്‍ വീതം ശുദ്ധജലം സൗജന്യമായി ലഭിക്കും. ഏകദേശം നാലായിരത്തോളം ആളുകള്‍ക്ക് ഇതിന്റെ പ്രയോജനം ലഭിക്കും. ഒരു മണിക്കൂറില്‍ 500 ലിറ്റര്‍ ജലം ശുദ്ധീകരിക്കാന്‍ ശേഷിയുള്ളതാണ് ഓരോ പ്ലാന്റും. സ്റ്റേറ്റ് ബാങ്ക് ഓഫ് ഇന്ത്യയുടെ സഹകരണത്തോടെയാണ് ഫൗണ്ടേഷന്‍ ഈ സംരംഭം പൂര്‍ത്തിയാക്കിയത്.
വിശ്വശാന്തി ഫൗണ്ടേഷന്‍ മാനേജിങ് ഡയറക്ടര്‍ മേജര്‍ രവി പ്ലാന്റുകളുടെ ഔദ്യോഗിക ഉദ്ഘാടനം നിര്‍വ്വഹിച്ചു. ചടങ്ങില്‍ പങ്കെടുക്കാനായില്ലെങ്കിലും മോഹന്‍ലാല്‍ വീഡിയോ കോളിലൂടെ കുട്ടനാട്ടുകാരുമായി സംസാരിക്കുകയും വിഷു ആശംസകള്‍ പങ്കുവെക്കുകയും ചെയ്തു. ഫൗണ്ടേഷന്‍ ഡയറക്ടര്‍മാരായ സജീവ് സോമന്‍, സ്മിത നായര്‍, എസ്.ബി.ഐ റീജണല്‍ മാനേജര്‍ എസ്.ആര്‍. സുജിത് എന്നിവരും ചടങ്ങില്‍ സന്നിഹിതരായിരുന്നു. കുട്ടനാടിന്റെ കുടിവെള്ള പ്രശ്‌നത്തില്‍ വിശ്വശാന്തി ഫൗണ്ടേഷന്‍ ഇടപെടുന്നത് ഇത് ആദ്യമല്ല. 2023ല്‍ എടത്വ പഞ്ചായത്തില്‍ 500 കുടുംബങ്ങള്‍ക്കായി മണിക്കൂറില്‍ 2000 ലിറ്റര്‍ ശേഷിയുള്ള കൂറ്റന്‍ പ്ലാന്റ് ഫൗണ്ടേഷന്‍ സമര്‍പ്പിച്ചിരുന്നു. വിദ്യാഭ്യാസം, പരിസ്ഥിതി, ആരോഗ്യം എന്നീ മേഖലകളിലും സജീവമായ ഇടപെടലുകള്‍ ഫൗണ്ടേഷന്‍ നടത്തിവരുന്നുണ്ട്.
