പാലക്കാട്: ട്രെയിന് യാത്രയ്ക്കിടെ അസം സ്വദേശികളായ ദമ്പതികളുടെ പിഞ്ചുകുഞ്ഞ് ശ്വാസതടസ്സം അനുഭവപ്പെട്ട് മരിച്ചു. ഒലവക്കോട് റെയില്വേ സ്റ്റേഷനില് ചൊവ്വാഴ്ച രാത്രി എട്ട് മണിയോടെയാണ് അപ്രതീക്ഷിത ദുരന്തമുണ്ടായത്. അസമില് നിന്നുള്ള അതിഥി തൊഴിലാളി കുടുംബത്തിലെ ഒന്നര വയസ്സുകാരിയാണ് മരണപ്പെട്ടത്. അസമില് നിന്നും കേരളത്തിലേക്ക് വരികയായിരുന്ന കുടുംബം ഒലവക്കോട് സ്റ്റേഷനില് എത്തിയപ്പോഴാണ് സംഭവം. റെയില്വേ സ്റ്റേഷനിലെ മാതൃപരിചരണ കേന്ദ്രത്തില് (ഫീഡിങ് റൂം) വെച്ച് കുട്ടിക്ക് മുലപ്പാല് നല്കുന്നതിനിടെ പെട്ടെന്ന് ശ്വാസതടസ്സം അനുഭവപ്പെടുകയും കുഞ്ഞ് അബോധാവസ്ഥയിലാവുകയുമായിരുന്നു.
ശ്വാസനാളത്തില് പാല് കുടുങ്ങിയതാണ് അപകടകാരണമെന്നാണ് പ്രാഥമിക നിഗമനം. കുട്ടി തളര്ന്നു വീണുടനെ തന്നെ റെയില്വേ അധികൃതരും ബന്ധുക്കളും ചേര്ന്ന് പാലക്കാട് ജില്ലാ ആശുപത്രിയില് എത്തിച്ചു. തീവ്രപരിചരണ വിഭാഗത്തില് പ്രവേശിപ്പിച്ച് വിദഗ്ധ ചികിത്സ നല്കിയെങ്കിലും ജീവന് നിലനിര്ത്താനായില്ല. ആശുപത്രിയില് എത്തുന്നതിന് മുന്പ് തന്നെ മരണം സംഭവിച്ചിരുന്നതായി ഡോക്ടര്മാര് അറിയിച്ചു. മൃതദേഹം പോസ്റ്റ്മോര്ട്ടം നടപടികള്ക്കായി ജില്ലാ ആശുപത്രി മോര്ച്ചറിയിലേക്ക് മാറ്റിയിരിക്കുകയാണ്.
