വാഴക്കുളം: നഗരമധ്യത്തിലെ മൊബൈല് ഫോണ് ഷോറൂമില് അതിക്രമിച്ചു കയറി ലക്ഷക്കണക്കിന് രൂപയും ഫോണുകളും കവര്ന്ന കേസില് എടത്തല സ്വദേശി അറസ്റ്റില്. എടത്തല എന്.എ.ഡി തൈപറമ്പില് വീട്ടില് സാനു സേവ്യറിനെയാണ് (34) വാഴക്കുളം പോലീസ് പിടികൂടിയത്. കൃത്യമായ ആസൂത്രണത്തോടെ നടത്തിയ മോഷണത്തിന് പിന്നാലെ തെളിവുകള് നശിപ്പിക്കാന് ശ്രമിച്ചെങ്കിലും പോലീസിന്റെ പഴുതടച്ചുള്ള നീക്കം പ്രതിയെ കുടുക്കുകയായിരുന്നു.
കഴിഞ്ഞ പത്താം തീയതി രാത്രിയാണ് വാഴക്കുളത്തെ മൊബൈല് ഷോറൂമില് കവര്ച്ച നടന്നത്. കടയുടെ മുന്വശത്തെ ഷട്ടറിന്റെ പൂട്ട് തകര്ത്താണ് പ്രതി അകത്തുകടന്നത്. കൗണ്ടറില് സൂക്ഷിച്ചിരുന്ന രണ്ട് ലക്ഷം രൂപയും സര്വീസിനായി ഉപഭോക്താക്കള് നല്കിയിരുന്ന 13 മൊബൈല് ഫോണുകളും മോഷ്ടിച്ചു. താന് പിടിയിലാകുമെന്ന് ഭയന്ന പ്രതി, മോഷണ ദൃശ്യങ്ങള് അടങ്ങിയ സിസിടിവി ഡിവിആറും ക്യാമറകളും മൊബൈല് ചാര്ജറുകളും വരെ കടത്തിക്കൊണ്ടുപോയിരുന്നു.
തെളിവുകള് നശിപ്പിക്കപ്പെട്ട കേസില് സങ്കീര്ണ്ണമായ ശാസ്ത്രീയ അന്വേഷണമാണ് പോലീസ് നടത്തിയത്. മൂവാറ്റുപുഴ ഡിവൈഎസ്പി അബ്ദുള് മുനീറിന്റെ മേല്നോട്ടത്തില് പ്രത്യേക അന്വേഷണ സംഘം രൂപീകരിച്ചായിരുന്നു പരിശോധന. വാഴക്കുളം ഇന്സ്പെക്ടര് അനീഷ്. എ, എസ്.ഐമാരായ എസ്.എന്. സുമിത, പി.എസ്. ജോജി, പ്രദീപ് മോന്, എ.എസ്.ഐമാരായ സി.ടി. ഗിരീഷ് കുമാര്, പി.വി. അനൂപ്, സീനിയര് സി.പി.ഒമാരായ വര്ഗീസ് ടി. വേണാട്ട്, അക്ബര് അലി, സി.പി.ഒമാരായ വിമല്, ഇബ്രാഹിം എന്നിവരടങ്ങിയ സംഘമാണ് പ്രതിയെ തന്ത്രപരമായി കുടുക്കിയത്.
പ്രതിയെ കോടതിയില് ഹാജരാക്കി റിമാന്ഡ് ചെയ്തു. മോഷണം പോയ മുതലുകള് കണ്ടെത്താനുള്ള നടപടികള് പോലീസ് ഊര്ജ്ജിതമാക്കിയിട്ടുണ്ട്.
