ഹൈദരാബാദ്: തെലങ്കാനയിലെ കോണ്ഗ്രസ് സര്ക്കാരിനെ പിടിച്ചുലച്ച 150 കോടിയുടെ അഴിമതി പുറത്തുകൊണ്ടുവന്ന ബിജെപി നേതാവും സാമൂഹിക പ്രവര്ത്തകനുമായ റല്ലഗുഡം രാമകൃഷ്ണ റെഡ്ഡിയെ ദുരൂഹ സാഹചര്യത്തില് മരിച്ച നിലയില് കണ്ടെത്തി. ബദാംഗ്പേട്ട് മുനിസിപ്പല് കോര്പ്പറേഷനിലെ കോടികളുടെ ക്രമക്കേടുകള് തെളിവ് സഹിതം പുറത്തുവിട്ട് മാസങ്ങള്ക്കകമാണ് അദ്ദേഹത്തിന്റെ അന്ത്യം സംഭവിച്ചിരിക്കുന്നത് എന്നത് മരണത്തിലെ ദുരൂഹത വര്ദ്ധിപ്പിക്കുന്നു.
സംഭവം ആത്മഹത്യയാണെന്നാണ് പ്രാഥമിക നിഗമനമെന്ന് പോലീസ് അവകാശപ്പെടുമ്പോഴും, രാമകൃഷ്ണ റെഡ്ഡിയുടെ മരണത്തില് ഉന്നതതല അന്വേഷണം വേണമെന്ന ആവശ്യവുമായി ബിജെപി രംഗത്തെത്തി. ഗ്രേറ്റര് ഹൈദരാബാദ് മുനിസിപ്പല് കോര്പ്പറേഷനില് നടന്ന വന് അഴിമതികള് പുറത്തുകൊണ്ടുവന്നതോടെയാണ് രാമകൃഷ്ണ റെഡ്ഡി വാര്ത്തകളില് നിറഞ്ഞത്. അദ്ദേഹത്തിന്റെ വെളിപ്പെടുത്തലുകളെത്തുടര്ന്ന് ഒരു ഡെപ്യൂട്ടി കമ്മീഷണര് ഉള്പ്പെടെ പത്ത് ഉന്നത ഉദ്യോഗസ്ഥരെ സസ്പെന്ഡ് ചെയ്തിരുന്നു.
പൂര്ത്തിയാക്കാത്ത പദ്ധതികള്ക്ക് വ്യാജ ബില്ലുകള് ചമച്ച് 150 കോടിയോളം രൂപ തട്ടിയെടുത്തത് കൃത്യമായ രേഖകള് സഹിതം അദ്ദേഹം ജനമധ്യത്തില് തുറന്നുകാട്ടിയിരുന്നു. അഴിമതിക്കേസിലെ നിര്ണ്ണായക രേഖകള് നശിപ്പിക്കാനും കേസ് അട്ടിമറിക്കാനുമുള്ള ആസൂത്രിത നീക്കത്തിന്റെ ഭാഗമാണോ ഈ മരണം എന്ന് തെലങ്കാന ബിജെപി നേതൃത്വം സംശയം പ്രകടിപ്പിച്ചു. പൊതുപ്രശ്നങ്ങളില് സജീവമായി ഇടപെട്ടിരുന്ന ഒരാള് ഇത്തരത്തില് പെട്ടെന്ന് മരിക്കാന് സാധ്യതയില്ലെന്ന് അനുയായികളും ചൂണ്ടിക്കാട്ടുന്നു.
നിലവില് ഭാരതീയ ന്യായ സംഹിത സെക്ഷന് 194 പ്രകാരം ദുരൂഹ മരണത്തിനാണ് പോലീസ് കേസെടുത്തിരിക്കുന്നത്. മരണത്തിന് പിന്നില് ഏതെങ്കിലും തരത്തിലുള്ള ഭീഷണികളോ ബാഹ്യസമ്മര്ദ്ദങ്ങളോ ഉണ്ടായിരുന്നോ എന്ന് കണ്ടെത്താന് ശാസ്ത്രീയ അന്വേഷണം നടത്തുമെന്ന് പോലീസ് അറിയിച്ചു. ഭരണകൂടത്തിന്റെ അഴിമതിക്കെതിരെ ശബ്ദമുയര്ത്തിയ നേതാവിനുണ്ടായ ദുരന്തം ദേശീയ തലത്തിലും വലിയ ചര്ച്ചകള്ക്ക് വഴിവെച്ചിരിക്കുകയാണ്.
