ബെംഗളൂരു: ഗാർഡൻ സിറ്റി എന്നറിയപ്പെടുന്ന ബെംഗളൂരുവിൽ മുമ്പൊരിക്കലും അനുഭവപ്പെട്ടിട്ടില്ലാത്ത വിധം കടുത്ത ചൂട് അനുഭവപ്പെടുന്നതിന്റെ ദൃശൃങ്ങൾ പങ്കുവെച്ചിരിക്കുകയാണ് ഒരു വീട്ടമ്മ. മേശപ്പുറത്ത് വെച്ചിരുന്ന ക്രയോണുകൾ ചൂടുകാരണം ഉരുകാൻ തുടങ്ങിയതോടെയാണ് വീട്ടിലെ താപനില എത്രത്തോളമുണ്ടെന്ന് താൻ തിരിച്ചറി‍ഞ്ഞതെന്ന് ഇവർ പറയുന്നു.
ഗീതാ ശ്രീ നാഗരാജ് എന്ന ഇൻസ്റ്റഗ്രാം ഉപയോക്താവ് പങ്കുവെച്ച വീഡിയോ ഇപ്പോൾ സോഷ്യൽ മീ‍ഡിയയിൽ വൈറലായിരിക്കുകയാണ്. ട്രേയിൽ ഇരുന്ന പല ക്രയോണുകളും നിറമുളള പെൻസിലുകളും ചൂടേറ്റ് മൃദുവായതായും ആകൃതി മാറിയതായും വീഡിയോയിൽ കാണാം. വർഷങ്ങളായി ബെംഗളൂരുവിൽ താമസിച്ചിട്ടും ഇത്തരമൊരവസ്ഥ താൻ കണ്ടിട്ടില്ലെന്ന് അവർ വീഡിയോയിൽ കുറിച്ചു.
വീടിനുളളിലെ പ്രതലങ്ങൾ അത്രയധികം ചൂടുപിടിച്ചതിനാൽ മേശപ്പുറത്ത് ഒരു ഓംലെറ്റ് വരെ ഉണ്ടാക്കാമെന്ന് അവർ തമാശയായി പറഞ്ഞു. നഗരത്തിലെ കാലാവസ്ഥാ വ്യതിയാനത്തെക്കുറിച്ച് കടുത്ത ആശങ്കയാണ് പലരും പങ്കുവെക്കുന്നത്. താപനില നിയന്തിക്കാൻ വീടിന് ചുറ്റും ടെറസിലും കൂടുതൽ മരങ്ങൾ നട്ടുപിടിപ്പിക്കണമെന്ന് ചിലർ നിർദ്ദേശിച്ചു.
ഉച്ച സമയത്ത് പോലും പുറത്തിറങ്ങാൻ കഴിയുന്ന തരത്തിൽ മിതമായ കാലവസ്ഥയുണ്ടായിരുന്ന ബെംഗളൂരു ഇപ്പോൾ ഡൽഹി, ചെന്നൈ, മുംബൈ തുടങ്ങിയ മെട്രോ നഗരങ്ങളോട് മത്സരിക്കുകയാണോ എന്ന് മറ്റ് ചിലർ കുറിച്ചു. വർദ്ധിച്ചുവരുന്ന നഗരവൽക്കരണവും പച്ചപ്പിന്റെ കുറവുമാണ് ഇത്തരം മാറ്റങ്ങൾക്ക് കാരണമായി ചൂണ്ടിക്കാണിക്കപ്പെടുന്നത്.
