ന്യൂഡല്ഹി: വാക്കുകളേക്കാള് പ്രവൃത്തികള്ക്ക് മൂര്ച്ചയുണ്ടെന്ന് തെളിയിക്കുകയാണ് വിംഗ് കമാന്ഡര് അഞ്ജലി സിംഗ്. ഭാരതത്തിന്റെ സൈനിക ചരിത്രത്തില് സുവര്ണ്ണാക്ഷരങ്ങളാല് എഴുതപ്പെട്ട ഒരു പേരാണിന്ന് അഞ്ജലിയുടേത്. രാജ്യത്തിന്റെ ആദ്യത്തെ വനിതാ ഡിഫന്സ് അറ്റാഷെ (ആയി ചുമതലയേറ്റെടുക്കുമ്പോള്, അത് കേവലം ഒരു പദവിയിലുപരി സ്ത്രീശക്തിയുടെ പുതിയൊരു വിളംബരം കൂടിയാവുകയായിരുന്നു. മിഗ്-29 യുദ്ധവിമാനങ്ങളുടെ സാങ്കേതിക വിഭാഗത്തിലായിരുന്നു അഞ്ജലിയുടെ തുടക്കം. വിമാനങ്ങളുടെ കരുത്തും സുരക്ഷയും ഉറപ്പുവരുത്തുന്നതില് കാണിച്ച അസാമാന്യമായ ഏകാഗ്രതയാണ് പില്ക്കാലത്ത് നയതന്ത്രരംഗത്തെ വെല്ലുവിളികള് ഏറ്റെടുക്കാന് അവരെ പ്രാപ്തയാക്കിയത്.
യുദ്ധവിമാനങ്ങളുടെ എഞ്ചിന് കരുത്ത് പരിശോധിക്കുന്ന കൃത്യതയോടെ തന്നെ അവര് അന്താരാഷ്ട്ര തലത്തില് ഇന്ത്യയുടെ പ്രതിരോധ താല്പ്പര്യങ്ങള് സംരക്ഷിച്ചു. യന്ത്രഭാഗങ്ങളുടെ ലോകത്ത് നിന്നും നയതന്ത്ര ചര്ച്ചകളുടെ ലോകത്തേക്കുള്ള മാറ്റം അവര് അനായാസം കൈകാര്യം ചെയ്തു. വിദേശത്തെ ഇന്ത്യന് എംബസിയില് പ്രതിരോധ വിഭാഗത്തിന്റെ നെടുനായകത്വം വഹിക്കുന്ന ആദ്യ വനിത എന്ന നേട്ടം അഞ്ജലിക്ക് ലഭിച്ചത് അവരുടെ കഠിനാധ്വാനത്തിന്റെ ഫലമായാണ്. യൂണിഫോമിനോടുള്ള ആദരവും നിശ്ചയദാര്ഢ്യവുമാണ് സംശയങ്ങളുടെ മുനയൊടിച്ചത്.
അമിതമായ അവകാശവാദങ്ങളോ ശബ്ദകോലാഹലങ്ങളോ ഇല്ലാതെ തന്റെ ഉത്തരവാദിത്തങ്ങള് പൂര്ത്തിയാക്കുന്നതാണ് അഞ്ജലിയുടെ ശൈലി. യൂണിഫോം ധരിക്കുമ്പോള് താന് ഒരു സൈനികയാണെന്ന ബോധ്യവും, അതിനുമപ്പുറം പ്രതിഭയില് വിശ്വസിക്കുന്ന ഒരു വ്യക്തിയുമാണെന്ന് അവര് ലോകത്തിന് കാണിച്ചുകൊടുത്തു. ഭാവിയില് പ്രതിരോധ മേഖലയിലേക്ക് കടന്നുവരാന് ആഗ്രഹിക്കുന്ന ആയിരക്കണക്കിന് പെണ്കുട്ടികള്ക്ക് അഞ്ജലി സിംഗ് ഒരു വഴികാട്ടിയാണ്. വലിയ മാറ്റങ്ങള് തുടങ്ങുന്നത് നിശബ്ദമായ ചുവടുവെപ്പുകളില് നിന്നാണെന്ന് ഈ വിംഗ് കമാന്ഡറുടെ ജീവിതം നമ്മെ ബോധ്യപ്പെടുത്തുന്നു.
