തൃശ്ശൂര്: കോടാലി കടമ്പോട് നാടിനെ നടുക്കിയ ദുരന്തം. പുലര്ച്ചെ വീട്ടില് ഉറങ്ങിക്കിടക്കുകയായിരുന്ന സഹോദരങ്ങളെ പാമ്പ് കടിച്ചു. കടമ്പോട് എ.എല്.പി.എസിലെ രണ്ടാം ക്ലാസ് വിദ്യാര്ത്ഥിയായ ആല്ജോയാണ് മരിച്ചത്. മൂത്ത സഹോദരന് അന്ജോ കറുകുറ്റിയിലെ സ്വകാര്യ ആശുപത്രിയില് തീവ്രപരിചരണ വിഭാഗത്തില് ചികിത്സയിലാണ്.
അമ്മയോടൊപ്പം കിടന്നുറങ്ങുകയായിരുന്നു ആല്ജോയും അന്ജോയും. പുലര്ച്ചെ രണ്ട് മണിയോടെ ഇരുവര്ക്കും വയറുവേദന അനുഭവപ്പെട്ട് ഉണര്ന്നിരുന്നു. തലേദിവസം പുറത്തുപോയി വന്ന ശേഷം ജ്യൂസ് കുടിച്ചിരുന്നതിനാല്, ഭക്ഷ്യവിഷബാധയാകാം വയറുവേദനയ്ക്ക് കാരണമെന്ന് കരുതി വീട്ടുകാര് ചൂടുവെള്ളം നല്കി വീണ്ടും ഉറക്കി.
എന്നാല് പുലര്ച്ചെ 5.30-ഓടെ അന്ജോ അതീവ അവശനിലയില് അമ്മയെ വിളിച്ചുണര്ത്തുകയായിരുന്നു. ഉടന് തന്നെ കുട്ടികളെ ബൈക്കില് ആംബുലന്സ് ഡ്രൈവറുടെ വീട്ടിലെത്തിക്കുകയും അവിടെനിന്ന് ആശുപത്രിയിലേക്ക് മാറ്റുകയും ചെയ്തു. ആശുപത്രിയില് എത്തുമ്പോഴേക്കും ആല്ജോയുടെ ജീവന് നഷ്ടപ്പെട്ടിരുന്നു. ആശുപത്രി അധികൃതര് പാമ്പുകടിയേറ്റതാണോ എന്ന് സംശയം പ്രകടിപ്പിച്ചതോടെയാണ് ബന്ധുക്കള് വീട്ടിലെത്തി പരിശോധന നടത്തിയത്.
ഈ സമയത്താണ് കിടപ്പുമുറിയില് നിന്ന് പുറത്തേക്ക് ഇഴഞ്ഞുപോകുന്ന പാമ്പിനെ കണ്ടത്. ആല്ജോയുടെ ചുണ്ടിലാണ് പാമ്പ് കടിച്ചതെന്ന് സംശയിക്കുന്നു. കുട്ടികള് ഉറങ്ങിക്കിടന്ന മുറിയില് പാമ്പ് എങ്ങനെ എത്തിയെന്നത് വീട്ടുകാരെയും നാട്ടുകാരെയും ഒരുപോലെ ഭീതിയിലാഴ്ത്തുന്നുണ്ട്. അന്ജോയുടെ നില ഇപ്പോഴും ആശങ്കാജനകമായി തുടരുകയാണ്. മറ്റൊരു സഹോദരിയായ എയ്ഞ്ചല് സംഭവസമയത്ത് വെള്ളിക്കുളങ്ങരയിലെ ബന്ധുവീട്ടിലായിരുന്നതിനാല് അപകടത്തില് നിന്ന് ഒഴിവായി.
