കൊച്ചി: പച്ചാളത്ത് യുവാവിനെ വീടിനുള്ളിൽ മരിച്ച നിലയിൽ കണ്ടെത്തി. പച്ചാളം സ്വദേശിയായ ആൽ ജൂഡ് ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് സുഹൃത്തായ സിനോഷിനെ പോലീസ് കസ്റ്റഡിയിലെടുത്തു. പച്ചാളം എസ്.ആർ.എം ക്രോസ് റോഡിലെ സിനോഷിന്റെ വീടിന്റെ മുകൾ നിലയിലാണ് മൃതദേഹം കാണപ്പെട്ടത്.
ഇന്നലെ രാത്രി സിനോഷും ആൽ ജൂഡും മറ്റ് ചില സുഹൃത്തുക്കളും ചേർന്ന് സിനോഷിന്റെ വീട്ടിലിരുന്ന് മദ്യപിച്ചിരുന്നു. മദ്യപാനത്തിനിടെ ഇവർ തമ്മിൽ വാക്കേറ്റമുണ്ടാകുകയും, ഇത് കൈയാങ്കളിയിൽ കലാശിക്കുകയുമായിരുന്നു. തർക്കത്തിനിടെ സിനോഷ് അടുക്കളയിൽ ഉപയോഗിക്കുന്ന ഫ്രൈയിങ് പാൻ കൊണ്ട് ആൽ ജൂഡിന്റെ തലയ്ക്ക് അടിക്കുകയായിരുന്നുവെന്ന് പോലീസ് കരുതുന്നു. തലയ്ക്കേറ്റ മാരകമായ മുറിവാണ് മരണകാരണമെന്നാണ് പ്രാഥമിക നിഗമനം.
കൊലപാതകം നടന്ന വീടിനെക്കുറിച്ച് പ്രദേശവാസികൾക്കും കൗൺസിലർക്കും പരാതികൾ പറയാനുണ്ട്. സിനോഷിന്റെ വീടിന്റെ മുകൾ നില സാമൂഹിക വിരുദ്ധരുടെയും മദ്യപാനികളുടെയും കേന്ദ്രമായിരുന്നുവെന്ന് വാർഡ് കൗൺസിലർ പറഞ്ഞു. ഈ വീട്ടിൽ നിന്ന് സ്ഥിരമായി രാത്രികാലങ്ങളിൽ ബഹളവും വഴക്കും കേൾക്കാറുണ്ടായിരുന്നുവെന്ന് നാട്ടുകാർ ആരോപിക്കുന്നു.
മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി മാറ്റി. കസ്റ്റഡിയിലുള്ള സിനോഷിനെ പോലീസ് വിശദമായി ചോദ്യം ചെയ്തു വരികയാണ്. മദ്യലഹരിയിലുണ്ടായ തർക്കമാണോ അതോ മറ്റ് മുൻവൈരാഗ്യങ്ങൾ ഉണ്ടോ എന്ന കാര്യവും പോലീസ് അന്വേഷിക്കുന്നുണ്ട്.
