തിരുവനന്തപുരം: പ്രശസ്ത വിദ്യാഭ്യാസ വിചക്ഷണനും തിരുവനന്തപുരം മാര് ഇവനിയോസ് കോളേജ് മുന് പ്രിന്സിപ്പലുമായ ഫാ. ഡാനിയേല് കുഴിതടത്തില് അന്തരിച്ചു. മലങ്കര സുറിയാനി കത്തോലിക്കാ സഭയിലെ പ്രമുഖ പുരോഹിതനായ അദ്ദേഹം വിദ്യാഭ്യാസ മേഖലയില് നല്കിയ സംഭാവനകള് സമാനതകളില്ലാത്തതാണ്. 24ന് ഉച്ചയ്ക്ക് 2 മണിക്ക് പത്തനംതിട്ട ഉള്ളന്നൂര് സെന്റ് മേരീസ് മലങ്കര സുറിയാനി കത്തോലിക്ക ദേവാലയത്തില് സംസ്കാരം നടത്തും.
1983 ഡിസംബര് 1-ന് മാര് ഇവനിയോസ് കോളേജിലെ സിറിയക് വിഭാഗം അധ്യാപകനായാണ് അദ്ദേഹം ഔദ്യോഗിക ജീവിതം ആരംഭിച്ചത്. തുടര്ന്ന് കോളേജിന്റെ വളര്ച്ചയില് നിര്ണ്ണായക പങ്കുവഹിച്ച അദ്ദേഹം വിവിധ പദവികള് അലങ്കരിച്ചു. 22 വര്ഷക്കാലം സെന്റ് തോമസ് ഹോസ്റ്റല് വാര്ഡനായി സേവനമനുഷ്ഠിച്ചു. 1997 മുതല് 2000 വരെ കോളേജ് ബര്സാറായി പ്രവര്ത്തിച്ചു. അദ്ദേഹം പ്രിന്സിപ്പിലായി ചുമതലയേറ്റ സമയത്താണ് പ്രീ-ഡിഗ്രി വിദ്യാഭ്യാസം നിര്ത്തലാക്കി പ്ലസ് ടു ബോര്ഡ് നിലവില് വന്ന നിര്ണ്ണായക കാലഘട്ടം.
അദ്ദേഹത്തിന്റെ ഭരണകാലത്താണ് മാര് ഇവനിയോസ് കോളേജ് ദേശീയ തലത്തില് ശ്രദ്ധിക്കപ്പെട്ട പല നേട്ടങ്ങളും കൈവരിച്ചത്. ബി.വി.എം.സി, ജേണലിസം, ജെ.എം.സി എന്നീ പുതിയ കോഴ്സുകള് കോളേജില് ആരംഭിച്ചത് അദ്ദേഹത്തിന്റെ മുന്കൈയ്യിലാണ്. കോളേജിന്റെ പ്രവര്ത്തന മികവ് പരിശോധിക്കാന് രണ്ടാമത്തെ നാക് ടീം എത്തിയത് ഇക്കാലത്താണ്. മികച്ച പ്രവര്ത്തനങ്ങള് പരിഗണിച്ച് കോളേജിന് ‘A’ ഗ്രേഡ് ലഭിക്കുകയും ചെയ്തു.
ഇഗ്നോയുടെ ലേണിംഗ് സെന്ററും പരീക്ഷാ സെന്ററും കോളേജില് ആരംഭിച്ചത് ഫാ. ഡാനിയേലിന്റെ കാലത്താണ്. നിലവില് ഇന്ത്യയിലെ തന്നെ ഏറ്റവും വലിയ ഇഗ്നോ സെന്ററുകളില് ഒന്നാണിത്. കേരള സര്വകലാശാലയുമായി ബന്ധപ്പെട്ട നിരവധി ഉന്നത പദവികള് അദ്ദേഹം വഹിച്ചിട്ടുണ്ട്. കേരള യൂണിവേഴ്സിറ്റിയില് ബാര്ഡ് ഓഫ് സ്റ്റഡീസ് (ഹീബ്രു & സിറിയക്) ചെയര്മാന്, ഫാക്കല്റ്റി ഓഫ് ഓറിയന്റല് സ്റ്റഡീസ് മെമ്പര്, ഫാക്കല്റ്റി ഓഫ് ഓറിയന്റല് സ്റ്റഡീസ് മെമ്പര്, അക്കാദമിക് കൗണ്സില് എന്നീ പദവികള് അദ്ദേഹം വഹിച്ചിട്ടുണ്ട്.
കൂടാതെ, തിരുവനന്തപുരം മലങ്കര കത്തോലിക്കാ കോളേജ് മാനേജ്മെന്റ് സെക്രട്ടറി, ഡല്ഹി ഗുഡ്ഗാവ് സെന്റ് ജോണ് ക്രിസോസ്റ്റം രൂപതയുടെ ചീഫ് വികാരി ജനറല്, എഡ്യൂക്കേഷന് ഡയറക്ടര് എന്നീ നിലകളിലും അദ്ദേഹം പ്രവര്ത്തിച്ചിട്ടുണ്ട്. അദ്ദേഹത്തിന്റെ വിയോഗത്തില് വിദ്യാഭ്യാസ-സാമൂഹിക മേഖലയിലെ പ്രമുഖര് അനുശോചനം രേഖപ്പെടുത്തി.
