തൃശ്ശൂര്/ന്യൂഡല്ഹി: തൃശ്ശൂര് മുണ്ടത്തിക്കോട്ടെ പടക്കനിര്മ്മാണശാലയിലുണ്ടായ ഉഗ്രസ്ഫോടനത്തില് അതീവ ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. ദുരന്തത്തില് ജീവന് നഷ്ടപ്പെട്ടവരുടെ കുടുംബങ്ങളെ അനുശോചനം അറിയിച്ച പ്രധാനമന്ത്രി, പരിക്കേറ്റവര് എത്രയും വേഗം സുഖം പ്രാപിക്കട്ടെ എന്ന് ആശംസിച്ചു. കേന്ദ്ര സര്ക്കാര് സ്ഥിതിഗതികള് നിരീക്ഷിച്ചുവരികയാണെന്നും അദ്ദേഹം വ്യക്തമാക്കി. ‘തൃശ്ശൂരിലുണ്ടായ വെടിക്കെട്ട് അപകടം അതീവ ദൗര്ഭാഗ്യകരമാണ്. മരിച്ചവരുടെ കുടുംബങ്ങളുടെ വേദനയില് പങ്കുചേരുന്നു. പരിക്കേറ്റവര്ക്ക് വേഗത്തില് സുഖം പ്രാപിക്കാന് പ്രാര്ത്ഥിക്കുന്നു. ദുരിതബാധിതര്ക്ക് ആവശ്യമായ എല്ലാ സഹായങ്ങളും ഉറപ്പാക്കും,’ എന്ന് പ്രധാനമന്ത്രി അറിയിച്ചു.
തൃശ്ശൂര് പൂരത്തിനായി വെടിക്കെട്ട് ഒരുക്കുന്ന തിരുവമ്പാടി വിഭാഗത്തിന്റെ നിര്മ്മാണശാലയിലാണ് ഇന്ന് ഉച്ചതിരിഞ്ഞ് 3:30-ഓടെ ദുരന്തമുണ്ടായത്. പാടശേഖരത്തില് നടത്തിയ തിരച്ചിലില് രണ്ട് മൃതദേഹങ്ങള് കൂടി കണ്ടെടുത്തതോടെ മരണസംഖ്യ 12 ആയി ഉയര്ന്നു. സ്ഫോടനത്തിന്റെ ആഘാതത്തില് മൃതദേഹങ്ങള് ചിതറിത്തെറിച്ച നിലയിലായിരുന്നു. പരിക്കേറ്റ 23 പേര് തൃശ്ശൂര് മെഡിക്കല് കോളേജില് ചികിത്സയിലാണ്. ഇതില് പലരുടെയും നില അതീവ ഗുരുതരമായി തുടരുന്നു. പോലീസ്, ഫയര്ഫോഴ്സ്, ദുരന്തനിവാരണ സേന എന്നിവരുടെ നേതൃത്വത്തില് യുദ്ധകാലാടിസ്ഥാനത്തില് രക്ഷാപ്രവര്ത്തനം നടക്കുകയാണ്.
സംഭവത്തില് ജില്ലാ കളക്ടര് ശിഖ സുരേന്ദ്രന് സമഗ്രമായ മജിസ്റ്റീരിയല് അന്വേഷണത്തിന് ഉത്തരവിട്ടു. തൃശ്ശൂര് ആര്.ഡി.ഒയ്ക്കാണ് അന്വേഷണ ചുമതല. സ്ഫോടനസമയത്ത് 40-ഓളം തൊഴിലാളികള് സ്ഥലത്തുണ്ടായിരുന്നു എന്നാണ് പ്രാഥമിക വിവരം. വെടിക്കെട്ട് ലൈസന്സി മുണ്ടത്തിക്കോട് സതീഷ് ഉള്പ്പെടെയുള്ളവര് പരിക്കേറ്റ് ചികിത്സയിലാണ്. അതേസമയം, ഉപജീവനത്തിനായി അധ്വാനിച്ചിരുന്ന സാധാരണക്കാര്ക്ക് മേല് വന്നുപതിച്ച ഈ ദുരന്തം താങ്ങാവുന്നതിലും അപ്പുറമാണെന്ന് തൃശ്ശൂര് എംപി സുരേഷ് ഗോപി പറഞ്ഞു. പരിക്കേറ്റവര്ക്ക് മികച്ച ചികിത്സ ഉറപ്പാക്കാന് നിര്ദ്ദേശം നല്കിയതായും, ദുരന്തബാധിതരെ ചേര്ത്തുപിടിക്കാന് എല്ലാവരും ഒന്നിച്ചുനില്ക്കണമെന്നും അദ്ദേഹം ഫെയ്സ്ബുക്കില് കുറിച്ചു.
അപകടത്തെത്തുടര്ന്ന് തൃശ്ശൂര് മെഡിക്കല് കോളേജ് ആശുപത്രിയില് പ്രത്യേക കണ്ട്രോള് റൂം (നമ്പര്: 8075011853) പ്രവര്ത്തനമാരംഭിച്ചിട്ടുണ്ട്. പരിക്കേറ്റവര്ക്ക് വിദഗ്ധ ചികിത്സ ഉറപ്പാക്കാന് മുഖ്യമന്ത്രി പിണറായി വിജയനും ചീഫ് സെക്രട്ടറിക്ക് നിര്ദ്ദേശം നല്കി.
