ന്യൂഡല്ഹി: കേന്ദ്ര ഗവണ്മെന്റിന്റെ തിങ്ക് ടാങ്ക് ആയ നീതി ആയോഗിന്റെ തലപ്പത്തേക്ക് പശ്ചിമ ബംഗാളില് നിന്നുള്ള രണ്ട് പ്രഗത്ഭ വ്യക്തിത്വങ്ങള് എത്തുന്നു. മുന് മുഖ്യ സാമ്പത്തിക ഉപദേഷ്ടാവ് അശോക് ലാഹിരിയെ നീതി ആയോഗ് വൈസ് ചെയര്മാനായും ഐസര് ഭോപ്പാല് ഡയറക്ടര് പ്രൊഫ. ഗോബര്ദ്ധന് ദാസിനെ അംഗമായും നിയമിക്കാന് തീരുമാനമായി. പ്രധാനമന്ത്രി അധ്യക്ഷനായ നീതി ആയോഗില് രണ്ടാമത്തെ പ്രധാന പദവിയാണ് അശോക് ലാഹിരിയുടേത്.
നാല് പതിറ്റാണ്ടിലേറെ നീണ്ട ഔദ്യോഗിക ജീവിതമുള്ള അശോക് ലാഹിരി ഇന്ത്യയിലെ ഏറ്റവും മുതിര്ന്ന സാമ്പത്തിക വിദഗ്ധരില് ഒരാളാണ്. കേന്ദ്ര സര്ക്കാരിന്റെ മുഖ്യ സാമ്പത്തിക ഉപദേഷ്ടാവായും 15-ാം ധനകാര്യ കമ്മീഷന് അംഗമായും അദ്ദേഹം പ്രവര്ത്തിച്ചിട്ടുണ്ട്. വേള്ഡ് ബാങ്ക്, ഐഎംഎഫ്, ഏഷ്യന് ഡെവലപ്മെന്റ് ബാങ്ക് എന്നിവയുമായും ചേര്ന്ന് പ്രവര്ത്തിച്ച പരിചയം ഇദ്ദേഹത്തിനുണ്ട്. നിലവില് പശ്ചിമ ബംഗാളില് നിന്നുള്ള ബിജെപി എംഎല്എയാണ് അദ്ദേഹം.
ഐസര് ഭോപ്പാല് ഡയറക്ടറായ ഗോബര്ദ്ധന് ദാസ് അന്താരാഷ്ട്ര തലത്തില് ശ്രദ്ധിക്കപ്പെട്ട ശാസ്ത്രജ്ഞനാണ്. ഇമ്മ്യൂണോളജി, പകര്ച്ചവ്യാധികള് എന്നീ മേഖലകളില് അദ്ദേഹം നടത്തിയ ഗവേഷണങ്ങള് വിശ്വപ്രസിദ്ധമാണ്. അദ്ദേഹത്തിന്റെ ജീവിതകഥ ഏറെ പ്രചോദനാത്മകമാണ്. ബംഗ്ലാദേശില് നിന്നുള്ള ഹിന്ദു ദളിത് അഭയാര്ത്ഥി കുടുംബത്തിലാണ് ഇദ്ദേഹം ജനിച്ചത്. ദാരിദ്ര്യം മൂലം തെരുവുവിളക്കിന്റെ വെളിച്ചത്തിലിരുന്ന് പഠിച്ചാണ് അദ്ദേഹം ഉന്നത വിജയങ്ങള് കരസ്ഥമാക്കിയത്.
ബംഗാളിലെ കലാപങ്ങളില് തന്റെ കുടുംബത്തിലെ 17 അംഗങ്ങളെ ഇദ്ദേഹത്തിന് നഷ്ടപ്പെട്ടിരുന്നു. ജെഎന്യുവില് പ്രൊഫസറായിരുന്ന ഇദ്ദേഹം അമേരിക്കയിലെ യേല് യൂണിവേഴ്സിറ്റി ഉള്പ്പെടെയുള്ള വിദേശ രാജ്യങ്ങളില് ഗവേഷണം നടത്തിയ ശേഷം മാതൃരാജ്യത്തെ സേവിക്കാന് മടങ്ങിയെത്തുകയായിരുന്നു. ബംഗാള് നിയമസഭാ തിരഞ്ഞെടുപ്പ് പുരോഗമിക്കവെ പുറത്തുവന്ന ഈ നിയമനങ്ങള് രാഷ്ട്രീയമായും ഏറെ പ്രാധാന്യമര്ഹിക്കുന്നു. ബംഗാളിന്റെ ബൗദ്ധിക പാരമ്പര്യവും വികസന സ്വപ്നങ്ങളും രാജ്യത്തിന്റെ നയരൂപീകരണത്തില് വലിയ സ്വാധീനം ചെലുത്താന് ഈ നിയമനങ്ങള് സഹായിക്കുമെന്ന് വിലയിരുത്തപ്പെടുന്നു. ഇവരുടെ ഔദ്യോഗിക നിയമന ഉത്തരവുകള് ഉടന് പുറത്തിറങ്ങും.
