ന്യൂഡല്ഹി: ഐപിഎല് 2026-ല് ശനിയാഴ്ച നടന്ന ഡല്ഹി ക്യാപിറ്റല്സ് – പഞ്ചാബ് കിങ്സ് മത്സരത്തിനിടെ ഡല്ഹി പേസര് ലുങ്കി എന്ഗിഡിക്ക് ഗുരുതരമായി പരിക്കേറ്റു. പഞ്ചാബ് താരം പ്രിയാന്ഷ് ആര്യയുടെ ക്യാച്ച് എടുക്കാനുള്ള ശ്രമത്തിനിടെയാണ് ദക്ഷിണാഫ്രിക്കന് താരത്തിന് തലയ്ക്ക് പരിക്കേറ്റത്. പഞ്ചാബ് ഇന്നിങ്സിലെ മൂന്നാം ഓവറിലായിരുന്നു സംഭവം. അക്സര് പട്ടേലിന്റെ പന്തില് പ്രിയാന്ഷ് ആര്യ അടിച്ച പന്ത് മിഡ് ഓഫ് ദിശയിലേക്ക് ഉയര്ന്നുപൊങ്ങി. പന്ത് കൈപ്പിടിയിലൊതുക്കാന് പിന്നിലേക്ക് ഓടിയ എന്ഗിഡിക്ക് പന്തിന്റെ വേഗതയും ദിശയും കൃത്യമായി കണക്കുകൂട്ടാന് സാധിച്ചില്ല.
ക്യാച്ച് എടുക്കാനുള്ള ശ്രമത്തിനിടെ പിന്നിലേക്ക് മറിഞ്ഞു വീണ താരത്തിന്റെ തല അരുണ് ജെയ്റ്റ്ലി സ്റ്റേഡിയത്തിലെ കടുപ്പമേറിയ ഔട്ട്ഫീല്ഡില് അതിശക്തമായി അടിക്കുകയായിരുന്നു. നിലത്തുവീണയുടനെ തലയില് കൈവെച്ച് എന്ഗിഡി വേദനകൊണ്ട് പുളയുന്നതും പിന്നീട് ചലനമറ്റ രീതിയില് കിടക്കുന്നതും കണ്ടതോടെ സഹതാരങ്ങളും ഗ്രൗണ്ട് സ്റ്റാഫും അങ്ങോട്ടേക്ക് ഓടിയെത്തി. മെഡിക്കല് സംഘം ഉടന് തന്നെ മൈതാനത്തെത്തി താരത്തെ പരിശോധിച്ചു. ഒരു മിനിറ്റിലധികം താരം ചലനമില്ലാതെ കിടന്നത് സ്റ്റേഡിയത്തെയാകെ നിശബ്ദമാക്കി.
തുടര്ന്ന് സ്ട്രെച്ചറും പിന്നാലെ ആംബുലന്സും ഗ്രൗണ്ടിലേക്ക് എത്തിച്ചു. എന്ഗിഡിയുടെ കഴുത്തിന് പരിക്കേല്ക്കാതിരിക്കാന് ‘നെക്ക് ബ്രേസ്’ ധരിപ്പിച്ച ശേഷമാണ് സ്ട്രെച്ചറില് മൈതാനത്തിന് പുറത്തേക്ക് കൊണ്ടുപോയത്. പഞ്ചാബ് കിങ്സ് പരിശീലകന് റിക്കി പോണ്ടിങ്ങും മൈതാനത്തെത്തി താരത്തിന്റെ ആരോഗ്യസ്ഥിതി അന്വേഷിച്ചു. എന്ഗിഡി മെഡിക്കല് സംഘത്തിന്റെ ചോദ്യങ്ങളോട് പ്രതികരിച്ചത് ചെറിയൊരു ആശ്വാസമായെങ്കിലും പരിക്ക് ഗുരുതരമാണെന്നാണ് പ്രാഥമിക സൂചന.
ഡല്ഹി ക്യാപിറ്റല്സ് ക്യാമ്പില് വലിയ ആശങ്കയാണ് ഈ അപകടം ഉണ്ടാക്കിയിരിക്കുന്നത്. എന്ഗിഡിക്ക് ഈ മത്സരത്തില് ഇനി പന്തെറിയാന് സാധിക്കില്ലെന്ന് ഉറപ്പായിട്ടുണ്ട്. കൂടുതല് പരിശോധനകള്ക്കായി താരത്തെ ആശുപത്രിയിലേക്ക് മാറ്റി.
