വിഴിഞ്ഞം: അപ്രതീക്ഷിതമായി അപകടത്തില്പ്പെട്ട കുട്ടിയെ സിമന്റ് തൂണുകള്ക്കിടയില് നിന്ന് സുരക്ഷിതമായി പുറത്തെടുത്തു. കോട്ടപ്പുറം കടയ്ക്കുളം കോളനിയിലെ റയാന് എന്ന പന്ത്രണ്ടുകാരന്റെ വലതുകാലാണ് വീടിന് മുന്നിലെ തൂണുകള്ക്കിടയില് അബദ്ധത്തില് കുടുങ്ങിയത്. തിങ്കളാഴ്ച ഉച്ചയ്ക്ക് 1.30-ഓടെയാണ് സംഭവം നടന്നത്. കളിക്കുന്നതിനിടയില് തൂണുകള്ക്കിടയില് കാല് കുടുങ്ങിയതോടെ കുട്ടി പരിഭ്രാന്തനായി.
അപകടം കണ്ട ഉടനെ വീട്ടുകാരും പരിസരവാസികളും ചേര്ന്ന് കുട്ടിയുടെ കാല് പുറത്തെടുക്കാന് കിണഞ്ഞു ശ്രമിച്ചെങ്കിലും പരാജയപ്പെട്ടു. തൂണുകള്ക്കിടയിലെ വിടവ് കുറവായതിനാല് കാല് വലിച്ചെടുക്കുന്നത് അപകടമാണെന്ന് മനസ്സിലാക്കിയതോടെയാണ് ഫയര്ഫോഴ്സിനെ വിവരമറിയിച്ചത്. വിവരമറിഞ്ഞെത്തിയ വിഴിഞ്ഞം അഗ്നിരക്ഷാസേന അത്യാധുനിക ഉപകരണങ്ങള് ഉപയോഗിച്ച് തൂണുകളുടെ വശങ്ങള് സാവധാനം പൊളിച്ചുമാറ്റി. അതീവ ശ്രദ്ധയോടെ നടത്തിയ നീക്കത്തിനൊടുവില് കുട്ടിയുടെ കാലിന് പരിക്കേല്ക്കാതെ പുറത്തെടുത്തു.
സ്റ്റേഷന് ഓഫീസര് പ്രമോദിന്റെ നേതൃത്വത്തില് സേനാംഗങ്ങളായ ദിനേഷ്, ശിവന്, സന്തോഷ് കുമാര്, പ്രണവ്, ശ്യാംധരന്, രതീഷ് എന്നിവര് ചേര്ന്നാണ് രക്ഷാദൗത്യം വിജയകരമായി പൂര്ത്തിയാക്കിയത്. കുട്ടിയെ പിന്നീട് പ്രഥമശുശ്രൂഷകള്ക്ക് വിധേയനാക്കി. സേനയുടെ കൃത്യസമയത്തുള്ള ഇടപെടലിന് വലിയ അഭിനന്ദനമാണ് നാട്ടുകാര് നല്കുന്നത്.
