തിരുവനന്തപുരം: കേരളത്തില് വരും ദിവസങ്ങളില് കാലാവസ്ഥാ വ്യതിയാനം ശക്തമാകുമെന്ന് മുന്നറിയിപ്പ്. ഒരു വശത്ത് വേനല് മഴ കനക്കുമ്പോള് മറുവശത്ത് സൂര്യപ്രകാശത്തിലെ അള്ട്രാവയലറ്റ് രശ്മികളുടെ തീവ്രത വര്ദ്ധിക്കുന്നത് ആശങ്കയുയര്ത്തുന്നു. അടുത്ത നാല് ദിവസം സംസ്ഥാനത്ത് ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ശക്തമായ കാറ്റോടും ഇടിമിന്നലോടും കൂടിയ മഴയ്ക്കുള്ള സാധ്യത കണക്കിലെടുത്ത് വിവിധ ജില്ലകളില് ജാഗ്രതാ നിര്ദ്ദേശം നല്കിയിട്ടുണ്ട്. ഏഴ് ജില്ലകളില് ഇന്ന് യെല്ലോ അലേര്ട്ടാണ്.
ഇന്ന് പത്തനംതിട്ട, കോട്ടയം, എറണാകുളം, ഇടുക്കി, മലപ്പുറം, വയനാട്, കണ്ണൂര് ജില്ലകളിലും നാളെ ആലപ്പുഴ, കോട്ടയം, എറണാകുളം, ഇടുക്കി, തൃശൂര്, കോഴിക്കോട്, വയനാട്, കണ്ണൂര് എന്നീ എട്ട് ജില്ലകളില് യെല്ലോ അലര്ട്ട് പ്രഖ്യാപിച്ചു. അതേസമയം, സംസ്ഥാനത്തിന്റെ വിവിധ ഭാഗങ്ങളില് അള്ട്രാവയലറ്റ് സൂചിക അപകടകരമായ നിലയില് തുടരുകയാണ്. കോന്നി, ചങ്ങനാശ്ശേരി, മൂന്നാര്, ചെങ്ങന്നൂര് എന്നിവിടങ്ങളിലാണ് ഇന്ന് ഉയര്ന്ന നിരക്ക് രേഖപ്പെടുത്തിയത്.
രാവിലെ 10 മണി മുതല് ഉച്ചയ്ക്ക് 3 മണി വരെ നേരിട്ട് വെയില് ഏല്ക്കുന്നത് പരമാവധി ഒഴിവാക്കുക. ഈ സമയത്താണ് രശ്മികളുടെ തീവ്രത ഏറ്റവും കൂടുതല്. പുറത്തിറങ്ങുന്നവര് കുട, തൊപ്പി, സണ്ഗ്ലാസ് എന്നിവ നിര്ബന്ധമായും കരുതുക. ശരീരം പൂര്ണ്ണമായും മറയ്ക്കുന്ന ഇളം നിറത്തിലുള്ള കോട്ടണ് വസ്ത്രങ്ങള് ധരിക്കുന്നത് സൂര്യതാപം തടയാന് സഹായിക്കും. പുറംജോലികളില് ഏര്പ്പെടുന്നവര്, മത്സ്യത്തൊഴിലാളികള്, ബൈക്ക് യാത്രക്കാര്, ചര്മ്മ-നേത്ര രോഗങ്ങളുള്ളവര് എന്നിവര് അതീവ ജാഗ്രത പാലിക്കണം.
തുടര്ച്ചയായി അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് ത്വക്ക് രോഗങ്ങള്ക്കും കാഴ്ചാ പ്രശ്നങ്ങള്ക്കും കാരണമായേക്കാമെന്ന് ആരോഗ്യ വിദഗ്ധര് മുന്നറിയിപ്പ് നല്കുന്നു. മഴ മുന്നറിയിപ്പുള്ളതിനാല് ഇടിമിന്നല് സമയത്ത് തുറസ്സായ സ്ഥലങ്ങളില് നില്ക്കുന്നത് ഒഴിവാക്കാനും നിര്ദ്ദേശമുണ്ട്.
