തിരുവനന്തപുരം: സംസ്ഥാനത്ത് തുടരുന്ന കഠിനമായ വേനല്‍ചൂടിന് ആശ്വാസമായി വ്യാപകമായ വേനല്‍മഴ എത്തുന്നു. വരും ദിവസങ്ങളില്‍ വിവിധ ജില്ലകളില്‍ ശക്തമായ മഴയ്‌ക്ക് സാധ്യതയുള്ളതിനാല്‍ കാലാവസ്ഥാ വകുപ്പ് ജാഗ്രതാ നിര്‍ദ്ദേശം പുറപ്പെടുവിച്ചു. നിലവില്‍ എട്ട് ജില്ലകളിലാണ് യെലോ അലര്‍ട്ട് പ്രഖ്യാപിച്ചിരിക്കുന്നത്. ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, കോഴിക്കോട്, വയനാട്, കണ്ണൂര്‍. മറ്റു ജില്ലകളിലും മിതമായ മഴയ്‌ക്ക് സാധ്യതയുണ്ട്.
നാളെ കൊല്ലം, പത്തനംതിട്ട, ആലപ്പുഴ, ഇടുക്കി ജില്ലയിലും, തിങ്കളാഴ്ച ഇടുക്കി, പാലക്കാട്, മലപ്പുറം ജില്ലകളിലും യെല്ലോ അലേര്‍ട്ടാണ്. മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയില്‍ വീശിയടിക്കാവുന്ന കാറ്റിനും ശക്തമായ ഇടിമിന്നലിനും സാധ്യതയുള്ളതിനാല്‍ പൊതുജനങ്ങള്‍ ജാഗ്രത പാലിക്കണം. മഴയുടെ വരവോടെ താപനിലയില്‍ നേരിയ കുറവ് രേഖപ്പെടുത്തിയിട്ടുണ്ട്. നിലവില്‍ പാലക്കാട് 37.9 ഡിഗ്രി, കൊല്ലം 38ഡിഗ്രി എന്നിങ്ങനെയാണ് പകല്‍ സമയത്തെ താപനില. എങ്കിലും ഉച്ചസമയങ്ങളില്‍ ചൂട് കഠിനമായി തന്നെ തുടരുന്നു.
മഴയുടെ വാര്‍ത്തകള്‍ക്കിടയിലും ആശങ്കയുയര്‍ത്തുന്നത് ഉയര്‍ന്ന അള്‍ട്രാവയലറ്റ് ഇന്‍ഡക്‌സ് ആണ്. കോന്നി, ചങ്ങനാശ്ശേരി, മൂന്നാര്‍, ചെങ്ങന്നൂര്‍ എന്നിവിടങ്ങളില്‍ സൂര്യരശ്മികളുടെ തീവ്രത അപകടകരമായ അളവില്‍ രേഖപ്പെടുത്തി. അമിതമായ അള്‍ട്രാവയലറ്റ് രശ്മികള്‍ ഏല്‍ക്കുന്നത് സൂര്യാതപം, ചര്‍മ്മരോഗങ്ങള്‍, കണ്ണിന് അസുഖങ്ങള്‍ എന്നിവയ്‌ക്ക് കാരണമാകും. വെയിലത്ത് ജോലി ചെയ്യുന്നവരും പുറത്തിറങ്ങുന്നവരും മതിയായ സുരക്ഷാ മുന്‍കരുതലുകള്‍ സ്വീകരിക്കേണ്ടതാണ്. മഴയും കാറ്റും ഇടിമിന്നലും ഉണ്ടാകാന്‍ സാധ്യതയുള്ളതിനാല്‍ താഴ്ന്ന പ്രദേശങ്ങളില്‍ ഉള്ളവരും മലയോര മേഖലയിലുള്ളവരും പ്രത്യേക ശ്രദ്ധ പുലര്‍ത്തണമെന്നും നിര്‍ദ്ദേശം ഉണ്ട്.
