ഫുജൈറ: യുണൈറ്റഡ് അറബ് എമിറേറ്റ്‌സിനെ ലക്ഷ്യമിട്ട് ഇറാന്റെ ഭാഗത്തുനിന്ന് വീണ്ടും മിസൈല്‍-ഡ്രോണ്‍ ആക്രമണങ്ങള്‍ റിപ്പോര്‍ട്ട് ചെയ്തു. 12 ബാലിസ്റ്റിക് മിസൈലുകളും മൂന്ന് ക്രൂയിസ് മിസൈലുകളും ഉള്‍പ്പെടെ 15 മിസൈലുകളാണ് യു.എ.ഇക്ക് നേരെ തൊടുത്തുവിട്ടത്. ഇതിനുപുറമെ നാല് ഡ്രോണുകള്‍ ഉപയോഗിച്ചും ആക്രമണശ്രമമുണ്ടായി.
ഫുജൈറയിലെ ഓയില്‍ ഇന്‍ഡസ്ട്രീസ് സോണിലാണ് ഡ്രോണ്‍ അവശിഷ്ടങ്ങള്‍ വീണ് തീപിടുത്തമുണ്ടായത്. ആക്രമണത്തില്‍ മൂന്ന് ഇന്ത്യന്‍ സ്വദേശികള്‍ക്ക് പരിക്കേറ്റതായാണ് ഔദ്യോഗിക വിവരം. സാരമായി പരിക്കേറ്റ ഇവരെ അടിയന്തര ചികിത്സയ്‌ക്കായി ആശുപത്രിയില്‍ പ്രവേശിപ്പിച്ചു. ഫുജൈറ മീഡിയ ഓഫീസ് ആണ് നാശനഷ്ടങ്ങള്‍ സംബന്ധിച്ച വിവരങ്ങള്‍ പുറത്തുവിട്ടത്.
തിങ്കളാഴ്ച മാത്രം തൊടുത്തുവിട്ട നാല് മിസൈലുകളില്‍ മൂന്നെണ്ണം യു.എ.ഇയുടെ പ്രതിരോധ സംവിധാനങ്ങള്‍ ആകാശത്തുവെച്ച് തന്നെ തകര്‍ത്തു. ലക്ഷ്യസ്ഥാനത്തെത്തും മുന്‍പേ തകര്‍ത്ത മിസൈലുകളുടെ അവശിഷ്ടങ്ങള്‍ കടലില്‍ പതിച്ചതായും അധികൃതര്‍ വ്യക്തമാക്കി. നിലവിലെ സാഹചര്യത്തില്‍ സോഷ്യല്‍ മീഡിയ വഴിയോ മറ്റോ തെറ്റായ വിവരങ്ങളും കിംവദന്തികളും പ്രചരിപ്പിക്കരുതെന്ന് ഭരണകൂടം ജനങ്ങള്‍ക്ക് കര്‍ശന നിര്‍ദ്ദേശം നല്‍കി.
കൃത്യമായ വിവരങ്ങള്‍ അറിയാന്‍ സര്‍ക്കാര്‍ പുറപ്പെടുവിക്കുന്ന ഔദ്യോഗിക വാര്‍ത്താക്കുറിപ്പുകളെ മാത്രം ആശ്രയിക്കാന്‍ പൊതുജനങ്ങള്‍ ശ്രദ്ധിക്കണമെന്ന് അധികൃതര്‍ അഭ്യര്‍ത്ഥിച്ചു. മേഖലയില്‍ സുരക്ഷാ സംവിധാനങ്ങള്‍ കൂടുതല്‍ ശക്തമാക്കിയിട്ടുണ്ട്. കൂടുതല്‍ നാശനഷ്ടങ്ങള്‍ ഉണ്ടായോ എന്ന കാര്യത്തില്‍ വിശദമായ പരിശോധനകള്‍ നടന്നുവരികയാണ്.
