മാള്ഡ: പശ്ചിമ ബംഗാളിലെ മാള്ഡയില് ജുഡീഷ്യല് ഓഫീസര്മാരെ തടഞ്ഞുവെച്ചതിനും ആക്രമിച്ചതിനും പിന്നാലെ ഉണ്ടായ സംഘര്ഷവുമായി ബന്ധപ്പെട്ട് രണ്ട് തൃണമൂല് കോണ്ഗ്രസ് (നേതാക്കളെ ദേശീയ അന്വേഷണ ഏജന്സി അറസ്റ്റ് ചെയ്തു. തൃണമൂല് കാലിയാചക്-ക ബ്ലോക്ക് പ്രസിഡന്റ് സരിയൂള് ഷെയ്ഖ്, സുജാപൂര് മുന് മേഖല പ്രസിഡന്റ് യൂസഫ് ഷെയ്ഖ് എന്നിവരാണ് പിടിയിലായത്. മെയ് 8 വെള്ളിയാഴ്ച നടന്ന മണിക്കൂറുകള് നീണ്ട ചോദ്യം ചെയ്യലിന് ശേഷമാണ് ഇരുവരുടെയും അറസ്റ്റ് രേഖപ്പെടുത്തിയത്. ശേഷം ഇവരെ കൊല്ക്കത്തയിലേക്ക് കൊണ്ടുപോയി.
ഏപ്രില് ഒന്നിന് മോതാബാരിയില് ഏഴ് ജുഡീഷ്യല് ഓഫീസര്മാരെ ബി.ഡി.ഒ ഓഫീസിനുള്ളില് തടഞ്ഞുവെക്കുകയും അവരുടെ വാഹനങ്ങള് തടയുകയും ചെയ്ത സംഭവത്തിലാണ് നടപടി. ഇതിനോടൊപ്പം നാഷണല് ഹൈവേ 12-ന്റെ വിവിധ ഭാഗങ്ങളില് ആസൂത്രിതമായി ഉപരോധം ഏര്പ്പെടുത്തിയതായും അന്വേഷണസംഘം കണ്ടെത്തി. ചോദ്യം ചെയ്യലിനിടെ സരിയൂള്, യൂസഫ് എന്നിവരുടെ മൊബൈല് ഫോണുകള് എന്.ഐ.എ പിടിച്ചെടുത്തു. സുജാപൂര് ആശുപത്രിക്ക് സമീപം നടന്ന റോഡ് ഉപരോധത്തില് ഇവര്ക്ക് നേരിട്ട് പങ്കുണ്ടെന്ന് അന്വേഷണ ഉദ്യോഗസ്ഥര് പറഞ്ഞു.
ആശുപത്രിക്ക് തൊട്ടടുത്തുള്ള നഴ്സിംഗ് ഹോമിന്റെ ഉടമ കൂടിയാണ് സരിയൂള് ഷെയ്ഖ്. നിയമസഭാ തിരഞ്ഞെടുപ്പിന്റെ വോട്ടെണ്ണലിന് മുന്നോടിയായി സുജാപൂര് സ്ഥാനാര്ത്ഥി സബീന യാസ്മിന്റെ ഇലക്ഷന് ഏജന്റ് അബ്ദുര് റഹ്മാന് ഉള്പ്പെടെ ഒമ്പത് പേര്ക്ക് എന്.ഐ.എ നോട്ടീസ് നല്കിയിരുന്നു. തിരഞ്ഞെടുപ്പ് ഡ്യൂട്ടി ചൂണ്ടിക്കാട്ടി ആദ്യം ഒഴിഞ്ഞുമാറിയെങ്കിലും പിന്നീട് ഇവര് ചോദ്യം ചെയ്യലിന് ഹാജരാകുകയായിരുന്നു. കേസില് നേരത്തെ സുജാപൂര് ഗ്രാമപഞ്ചായത്തില് നിന്നുള്ള മന്ജീര് എന്ന ഭോല ഷെയ്ഖിനെയും അറസ്റ്റ് ചെയ്തിരുന്നു. അഞ്ച് വ്യത്യസ്ത സ്ഥലങ്ങളില് ഒരേസമയം ദേശീയപാത ഉപരോധിച്ചതിന് പിന്നിലെ വലിയ ഗൂഢാലോചനയെക്കുറിച്ചാണ് എന്.ഐ.എ നിലവില് അന്വേഷിക്കുന്നത്.
