ന്യൂഡല്ഹി: പശ്ചിമേഷ്യയില് യുദ്ധസമാനമായ സാഹചര്യം നിലനില്ക്കുന്ന പശ്ചാത്തലത്തില്, രാജ്യത്തെ ഊര്ജ്ജ-ഭക്ഷ്യ സുരക്ഷ ഉറപ്പാക്കാന് ഉന്നതതല ഇടപെടലുമായി കേന്ദ്ര സര്ക്കാര്. ആഗോളതലത്തില് വിതരണ ശൃംഖലകള് തടസ്സപ്പെട്ടേക്കാമെന്ന ആശങ്കകള്ക്കിടയിലും ഇന്ത്യയില് അവശ്യവസ്തുക്കളുടെ ലഭ്യതയില് കുറവുണ്ടാകില്ലെന്ന് പ്രതിരോധമന്ത്രി രാജ്നാഥ് സിംഗ് ഉറപ്പുനല്കി. സ്ഥിതിഗതികള് വിലയിരുത്താന് രൂപീകരിച്ച പ്രത്യേക മന്ത്രിതല സമിതിയുടെ അഞ്ചാമത് യോഗത്തിന് ശേഷമാണ് കേന്ദ്രത്തിന്റെ നിര്ണ്ണായക പ്രതികരണം.
പശ്ചിമേഷ്യന് സംഘര്ഷം കാരണം ആഗോള വിപണിയില് എണ്ണയുള്പ്പെടെയുള്ള ഊര്ജ്ജ സ്രോതസ്സുകള്ക്കും മറ്റ് അവശ്യവസ്തുക്കള്ക്കും ക്ഷാമം നേരിടാന് സാധ്യതയുണ്ട്. ഇത് ഇന്ത്യയെ ബാധിക്കാതിരിക്കാന് സര്ക്കാര് മുന്കരുതല് നടപടികള് സ്വീകരിച്ചിട്ടുണ്ട്. വിപണിയില് സാധനങ്ങള്ക്ക് ക്ഷാമമുണ്ടാകുമെന്ന് കരുതി ജനങ്ങള് പരിഭ്രാന്തരാകേണ്ടതില്ലെന്ന് പ്രതിരോധമന്ത്രി നിര്ദ്ദേശിച്ചു. പൂഴ്ത്തിവെപ്പോ അനാവശ്യമായ ആശങ്കകളോ ഉണ്ടാകാതിരിക്കാന് അധികൃതര് ജാഗ്രത പാലിക്കും.
പ്രധാനമന്ത്രി നരേന്ദ്ര മോദിയുടെ നേരിട്ടുള്ള മേല്നോട്ടത്തില് അവശ്യവസ്തുക്കളുടെ ആഭ്യന്തര ലഭ്യത ഉറപ്പാക്കാന് മന്ത്രാലയങ്ങള് ഏകോപിതമായി പ്രവര്ത്തിക്കുന്നുണ്ടെന്ന് രാജ്നാഥ് സിംഗ് എക്സില് കുറിച്ചു. യുദ്ധം ദീര്ഘകാലം തുടര്ന്നാലും രാജ്യത്തെ സാമ്പത്തിക ഭദ്രതയെയും സാധാരണക്കാരന്റെ ദൈനംദിന ജീവിതത്തെയും ബാധിക്കാത്ത രീതിയിലുള്ള കരുതല് ശേഖരം ഉറപ്പാക്കാനാണ് കേന്ദ്ര നീക്കം. ആഗോള പ്രതിസന്ധികളെ മറികടക്കാന് സര്ക്കാര് സുസജ്ജമാണെന്നും ജനങ്ങള് ഭരണകൂടത്തിന്റെ നിര്ദ്ദേശങ്ങളോട് സഹകരിക്കണമെന്നും അദ്ദേഹം അഭ്യര്ത്ഥിച്ചു.
