കൊല്ക്കത്ത: പശ്ചിമ ബംഗാളിലെ തദ്ദേശ സ്ഥാപനങ്ങളില് നടന്ന നിയമന അഴിമതിയുമായി ബന്ധപ്പെട്ട് തൃണമൂല് കോണ്ഗ്രസ് നേതാവും മുന് മന്ത്രിയുമായ സുജിത് ബോസിനെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തു. കൊല്ക്കത്തയിലെ സി.ജി.ഒ കോംപ്ലക്സില് നടന്ന സുദീര്ഘമായ ചോദ്യം ചെയ്യലിന് ശേഷമാണ് അന്വേഷണ സംഘം നടപടികളിലേക്ക് കടന്നത്. സൗത്ത് ദം ദം മുനിസിപ്പാലിറ്റിയുടെ വൈസ് ചെയര്മാനായിരുന്ന കാലയളവില് സുജിത് ബോസ് അധികാര ദുര്വിനിയോഗം നടത്തിയെന്നാണ് ഇ.ഡി കണ്ടെത്തല്.
യോഗ്യതയില്ലാത്ത 150-ഓളം പേര്ക്ക് ചട്ടങ്ങള് ലംഘിച്ച് ജോലി നല്കാന് ശുപാര്ശ ചെയ്തു. നിയമനങ്ങള്ക്ക് പകരമായി വന്തുക കൈക്കൂലി വാങ്ങിയതായും ഈ പണം റിയല് എസ്റ്റേറ്റ് മേഖലയില് നിക്ഷേപിച്ചതായും ഇ.ഡി ആരോപിക്കുന്നു. പത്ത് മണിക്കൂര് നീണ്ട ചോദ്യം ചെയ്യലില് സാമ്പത്തിക സ്രോതസ്സുകളെക്കുറിച്ച് വ്യക്തമായ മറുപടി നല്കാന് അദ്ദേഹത്തിന് സാധിച്ചില്ല. ബംഗാളിലെ പുതിയ സര്ക്കാര് അധികാരമേറ്റതിന് പിന്നാലെ അറസ്റ്റിലാകുന്ന ആദ്യത്തെ പ്രമുഖ ടി.എം.സി നേതാവാണ് സുജിത് ബോസ്.
ഇക്കഴിഞ്ഞ നിയമസഭാ തിരഞ്ഞെടുപ്പില് ബിധാനഗര് മണ്ഡലത്തില് നിന്നും അദ്ദേഹം പരാജയപ്പെട്ടിരുന്നു. ‘അഴിമതിക്കാര്ക്കെതിരെയുള്ള കര്ശനമായ നിയമനടപടിയാണിത്. അന്വേഷണം മറ്റ് 17 മുനിസിപ്പാലിറ്റികളിലേക്കും വ്യാപിപ്പിക്കും എന്ന് ബിജെപി വക്താവ് പറഞ്ഞു. സ്കൂള് സര്വീസ് കമ്മീഷന് അഴിമതിയുമായി ബന്ധപ്പെട്ട അന്വേഷണത്തിനിടയിലാണ് മുനിസിപ്പല് നിയമനങ്ങളിലെ ക്രമക്കേടുകളും പുറത്തുവന്നത്. വരും ദിവസങ്ങളില് കൂടുതല് അറസ്റ്റുകള് ഉണ്ടായേക്കുമെന്നാണ് സൂചന.
