തിരുവനന്തപുരം: തലസ്ഥാന നഗരത്തിന്റെ ഹൃദയഭാഗത്തുള്ള സംസ്ഥാന സ്പോര്ട്സ് കൗണ്സില് ആസ്ഥാനത്ത് എസി അറ്റകുറ്റപ്പണിക്കിടെയുണ്ടായ സ്ഫോടനത്തില് രണ്ട് പേര്ക്ക് ഗുരുതരമായി പരിക്കേറ്റു. ചന്ദ്രശേഖരന് നായര് സ്റ്റേഡിയത്തിലെ താല്ക്കാലിക ജീവനക്കാരായ തൊഴിലാളികള്ക്കാണ് പരിക്കേറ്റത്. ഇവരെ ഉടന് തന്നെ മെഡിക്കല് കോളേജ് ആശുപത്രിയില് പ്രവേശിപ്പിച്ചു. ഒരാളുടെ നില അതീവ ഗുരുതരമായി തുടരുകയാണ്. സെക്രട്ടേറിയറ്റിന് സമീപത്തെ കൗണ്സില് കെട്ടിടത്തിന്റെ പിന്ഭാഗത്ത് എസിയില് ഗ്യാസ് നിറയ്ക്കുന്നതിനിടെയാണ് അപകടമുണ്ടായത്.
ഗ്യാസ് ഫില് ചെയ്യുന്നതിനിടെ വന് ശബ്ദത്തോടെ എസി യൂണിറ്റ് പൊട്ടിത്തെറിക്കുകയായിരുന്നു. സ്ഫോടനത്തിന്റെ ആഘാതത്തില് സമീപത്തെ കാറുകളുടെ ചില്ലുകള് തകരുകയും കെട്ടിടത്തിന്റെ ഭിത്തികള്ക്ക് കേടുപാടുകള് സംഭവിക്കുകയും ചെയ്തു. സ്ഫോടനം നടക്കുമ്പോള് സമീപത്തെ ഹാളില് മൂന്ന് ജീവനക്കാര് ഉണ്ടായിരുന്നെങ്കിലും ഇവര് ദൂരേക്ക് മാറിനിന്നതിനാല് വലിയ ദുരന്തം ഒഴിവായി. സ്ഥിരമായി അറ്റകുറ്റപ്പണിക്ക് എത്താറുള്ള പരിചയസമ്പന്നരായ തൊഴിലാളികളാണ് അപകടത്തില്പ്പെട്ടത്.
ഗ്യാസ് സിലിണ്ടറിലെ തകരാറാണോ അതോ സാങ്കേതികമായ മറ്റ് പിഴവുകളാണോ പൊട്ടിത്തെറിക്ക് കാരണമായതെന്ന് പോലീസ് പരിശോധിച്ചുവരികയാണ്. സിറ്റി പോലീസ് സ്ഥലത്തെത്തി പ്രാഥമിക പരിശോധനകള് പൂര്ത്തിയാക്കി. പരിക്കേറ്റവരുടെ മൊഴി രേഖപ്പെടുത്തിയ ശേഷം വിശദമായ അന്വേഷണം നടത്തുമെന്ന് അധികൃതര് അറിയിച്ചു. സ്പോര്ട്സ് കൗണ്സില് പോലുള്ള തിരക്കേറിയ സര്ക്കാര് ഓഫീസുകള്ക്ക് തൊട്ടടുത്ത് നടന്ന ഈ അപകടം അതീവ ഗൗരവത്തോടെയാണ് അധികൃതര് കാണുന്നത്. എസി മെയിന്റനന്സ് ജോലികളിലെ സുരക്ഷാ മാനദണ്ഡങ്ങള് പാലിച്ചിരുന്നോ എന്ന കാര്യവും പരിശോധിക്കും.
