തിരുവനന്തപുരം: കേരളത്തില് വരും ദിവസങ്ങളില് മഴ ശക്തമാകുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ബംഗാള് ഉള്ക്കടലിലെ ന്യൂനമര്ദ്ദം ശക്തിപ്രാപിച്ചതോടെ മെയ് 13 മുതല് 16 വരെ സംസ്ഥാനത്ത് ഇടിമിന്നലോടു കൂടിയ കനത്ത മഴയ്ക്ക് സാധ്യതയുണ്ട്. മഴയുടെ തീവ്രത കണക്കിലെടുത്ത് വിവിധ ജില്ലകളില് വരും ദിവസങ്ങളില് യെല്ലോ അലേര്ട്ട് പ്രഖ്യാപിച്ചിട്ടുണ്ട്.
ഇന്ന് പത്തനംതിട്ട, കോട്ടയം, ഇടുക്കി, കണ്ണൂര്, കാസര്കോട്, നാളെ എറണാകുളം, ഇടുക്കി, മലപ്പുറം, കോഴിക്കോട്, കണ്ണൂര്, കാസര്കോട്, വെള്ളി പാലക്കാട്, മലപ്പുറം, കോഴിക്കോട്, വയനാട്, ശനി തൃശ്ശൂര്, പാലക്കാട്, മലപ്പുറം എന്നീ ജില്ലകളിലാണ് യെല്ലോ അലേര്ട്ട് പ്രഖ്യാപിച്ചിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കാവുന്ന സാഹചര്യമാണ് നിലവിലുള്ളത്.
ശക്തമായ കാറ്റിനും ഇടിമിന്നലിനും സാധ്യതയുള്ളതിനാല് പൊതുജനങ്ങള് ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദ്ദേശിച്ചു. അതേസമയം, തെക്കുപടിഞ്ഞാറന് ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം ശക്തിപ്പെട്ടതോടെ ഇത്തവണ കാലവര്ഷം നേരത്തെ എത്താന് സാധ്യതയുണ്ടെന്നാണ് സൂചന. മെയ് 16-ഓടെ അന്തമാന് കടലിലും നിക്കോബാര് ദ്വീപുകളിലും കാലവര്ഷം എത്തിയേക്കും.
മധ്യ പടിഞ്ഞാറന് ബംഗാള് ഉള്ക്കടലിന് മുകളിലായി നിലനില്ക്കുന്ന ശക്തമായ ന്യൂനമര്ദ്ദമാണ് കേരളമുള്പ്പെടെയുള്ള തെക്കന് സംസ്ഥാനങ്ങളില് മഴ സജീവമാക്കുന്നത്. മഴയ്ക്കൊപ്പം ശക്തമായ കാറ്റിനും സാധ്യതയുള്ളതിനാല് മരങ്ങള് കടപുഴകി വീഴാനും വൈദ്യുതി പോസ്റ്റുകള്ക്ക് കേടുപാടുകള് സംഭവിക്കാനും സാധ്യതയുണ്ട്. ഇടിമിന്നല് സമയത്ത് തുറസ്സായ സ്ഥലങ്ങളില് നില്ക്കുന്നത് ഒഴിവാക്കുക.
