ന്യൂഡല്ഹി: രാജ്യം ഉറ്റുനോക്കുന്ന നീറ്റ് ചോദ്യപേപ്പര് ചോര്ച്ചാക്കേസില് സിബിഐ അന്വേഷണം കേരളത്തിലേക്കും വ്യാപിപ്പിക്കുന്നു. രാജസ്ഥാന് പോലീസ് കണ്ടെത്തിയ 200 വിദ്യാര്ത്ഥികളുടെ പട്ടികയില് കേരളത്തിലെ രണ്ട് ജില്ലകളില് നിന്നുള്ളവര് ഉള്പ്പെട്ടതായാണ് സൂചന. രാജസ്ഥാന് പോലീസിന്റെ പ്രത്യേക സംഘത്തില് നിന്ന് കേസ് ഏറ്റെടുത്ത സിബിഐ, ജയ്പൂരിലെത്തി നിര്ണ്ണായക രേഖകള് ശേഖരിച്ചു. ‘മാതൃകാ ചോദ്യപേപ്പര്’ എന്ന പേരില് ചോര്ന്ന ചോദ്യങ്ങള് കൈപ്പറ്റിയവരില് കേരളത്തിലെ വിദ്യാര്ത്ഥികളും ഉള്പ്പെട്ടിട്ടുണ്ടെന്നാണ് വിവരം. ഇവരെ സിബിഐ ഉടന് ചോദ്യം ചെയ്തേക്കും.
കേരളത്തില് എംബിബിഎസ് പഠിക്കുന്ന രാജസ്ഥാന് സ്വദേശിയായ വിദ്യാര്ത്ഥി വഴിയാണ് സിക്കറിലേക്ക് ചോദ്യപേപ്പര് എത്തിയത്. ഇതേ കണ്ണി വഴിയാണോ കേരളത്തിലും ചോദ്യങ്ങള് പ്രചരിച്ചതെന്ന് അന്വേഷണസംഘം പരിശോധിക്കുന്നുണ്ട്. നാല് പ്രത്യേക സിബിഐ സംഘങ്ങളാണ് നിലവില് കേസന്വേഷിക്കുന്നത്. കേസില് രാജസ്ഥാന് പോലീസ് കസ്റ്റഡിയിലെടുത്ത ദിനേഷ് ബിന്വാള് ബിജെപി നേതാവാണെന്ന് കോണ്ഗ്രസ് ആരോപിച്ചു. പ്രമുഖ ബിജെപി നേതാക്കള്ക്കൊപ്പം ഇയാള് നില്ക്കുന്ന ചിത്രങ്ങള് കോണ്ഗ്രസ് തങ്ങളുടെ ഔദ്യോഗിക എക്സ് (ട്വിറ്റര്) അക്കൗണ്ടിലൂടെ പുറത്തുവിട്ടു.
എന്നാല് ഭരണപക്ഷത്തുനിന്ന് ഇതിനോട് പ്രതികരണമൊന്നും വന്നിട്ടില്ല. നീറ്റ് ക്രമക്കേടില് ഇടപെടണമെന്നാവശ്യപ്പെട്ട് മെഡിക്കല് സംഘടനയായ എഎകെഎംഎ സുപ്രീംകോടതിയെ സമീപിച്ചു. നാഷണല് ടെസ്റ്റിംഗ് ഏജന്സിക്ക് പകരം പുതിയ സംവിധാനം വേണമെന്നും, കോടതിയുടെ നേരിട്ടുള്ള മേല്നോട്ടത്തില് പുനഃപരീക്ഷ നടത്തണമെന്നുമാണ് ഹര്ജിയിലെ പ്രധാന ആവശ്യം. പരീക്ഷാ തട്ടിപ്പ് സംഘത്തിന്റെ പ്രവര്ത്തനങ്ങള് ഓരോന്നായി പുറത്തുവരുന്ന സാഹചര്യത്തില്, രാജസ്ഥാന് പോലീസ് നേരത്തെ ശേഖരിച്ച 200 വിദ്യാര്ത്ഥികളുടെയും 75 രക്ഷിതാക്കളുടെയും വിവരങ്ങള് സിബിഐക്ക് വലിയ മുതല്ക്കൂട്ടാകും. വരും ദിവസങ്ങളില് കൂടുതല് അറസ്റ്റുകള് ഉണ്ടാകാനാണ് സാധ്യത.
