ന്യൂഡല്‍ഹി: ഇന്ധന-ഊര്‍ജ്ജ ഉപഭോഗം കുറയ്‌ക്കുന്നതിനായുള്ള പ്രധാനമന്ത്രി നരേന്ദ്ര മോദിയുടെ ആഹ്വാനത്തിന് പിന്നാലെ പ്രവര്‍ത്തനരീതിയില്‍ വിപ്ലവകരമായ മാറ്റങ്ങള്‍ പ്രഖ്യാപിച്ച് സുപ്രീം കോടതി. ആഴ്ചയില്‍ രണ്ട് ദിവസം വിര്‍ച്വല്‍ ഹിയറിംഗ് നടത്താനും കോടതി ജീവനക്കാര്‍ക്ക് വര്‍ക്ക് ഫ്രം ഹോം അനുവദിക്കാനും ചീഫ് ജസ്റ്റിസിന്റെ നിര്‍ദ്ദേശപ്രകാരം പുറത്തിറക്കിയ പുതിയ സര്‍ക്കുലറില്‍ വ്യക്തമാക്കുന്നു.
തിങ്കള്‍, വെള്ളി ദിവസങ്ങളിലും മറ്റ് നിശ്ചിത ദിവസങ്ങളിലുംകോടതി നടപടികള്‍ പൂര്‍ണ്ണമായും വീഡിയോ കോണ്‍ഫറന്‍സിംഗ് വഴി മാത്രമായിരിക്കും നടക്കുക. കോടതി ഭാഗികമായി പ്രവര്‍ത്തിക്കുന്ന ദിവസങ്ങളിലും ഓണ്‍ലൈന്‍ സംവിധാനം തുടരും. ഇതിനുപുറമെ, ഇന്ധനം ലാഭിക്കുന്നതിനായി കോടതിയില്‍ നേരിട്ടെത്തുന്ന ദിവസങ്ങളില്‍ ജഡ്ജിമാര്‍ കാര്‍ പൂളിംഗ് (ഒന്നിലധികം പേര്‍ ഒരേ വാഹനത്തില്‍ യാത്ര ചെയ്യുക) നടത്താനും തീരുമാനിച്ചു.
കോടതി ജീവനക്കാര്‍ക്കായി സുപ്രധാന ഇളവുകളാണ് പ്രഖ്യാപിച്ചിരിക്കുന്നത്. ഓരോ വിഭാഗത്തിലെയും 50 ശതമാനം ജീവനക്കാര്‍ക്ക് ആഴ്ചയില്‍ രണ്ട് ദിവസം വീട്ടിലിരുന്ന് ജോലി ചെയ്യാന്‍ അനുമതിയുണ്ട്. എന്നാല്‍ ബാക്കി പകുതി പേര്‍ ഓഫിസില്‍ നേരിട്ടെത്തി ഔദ്യോഗിക കൃത്യനിര്‍വ്വഹണം നടത്തണം. വര്‍ക്ക് ഫ്രം ഹോം എടുക്കുന്നവര്‍ ഫോണിലൂടെയും മറ്റും ഏത് സമയത്തും ലഭ്യമായിരിക്കണമെന്നും അടിയന്തര സാഹചര്യങ്ങളില്‍ ഓഫിസില്‍ ഹാജരാകണമെന്നും നിര്‍ദ്ദേശമുണ്ട്.
ജോലിഭാരം കൂടുതലുള്ള വിഭാഗങ്ങളില്‍ വര്‍ക്ക് ഫ്രം ഹോം നല്‍കണോ എന്ന കാര്യത്തില്‍ ബന്ധപ്പെട്ട രജിസ്ട്രാര്‍മാര്‍ക്ക് തീരുമാനമെടുക്കാം. സാങ്കേതിക തടസ്സങ്ങളില്ലാതെ ഓണ്‍ലൈന്‍ ഹിയറിംഗുകള്‍ നടക്കുന്നുണ്ടെന്ന് ഉറപ്പുവരുത്താന്‍ കോടതി ഭരണവിഭാഗത്തിന് പ്രത്യേക നിര്‍ദ്ദേശം നല്‍കിയിട്ടുണ്ട്. സുപ്രീം കോടതി സെക്രട്ടറി ജനറല്‍ ഭരത് പരാശറാണ് പുതിയ പരിഷ്‌കാരങ്ങള്‍ സംബന്ധിച്ച ഉത്തരവ് പുറപ്പെടുവിച്ചത്. പരിസ്ഥിതി സൗഹൃദമായ പ്രവര്‍ത്തനശൈലിയിലേക്ക് നീങ്ങുന്നതിന്റെ ഭാഗമായാണ് ഈ നടപടി.
