മലപ്പുറം: മഞ്ചേരി മെഡിക്കല് കോളേജ് ആശുപത്രിയില് ഡ്യൂട്ടിയിലുണ്ടായിരുന്ന സെക്യൂരിറ്റി സൂപ്പര്വൈസറെ ഒരു സംഘം ആളുകള് ചേര്ന്ന് ക്രൂരമായി മര്ദിച്ചു. നിലമ്പൂര് സ്വദേശിയായ പ്രശാന്തനാണ് അക്രമത്തിന് ഇരയായത്. ആശുപത്രിയിലെ സന്ദര്ശക നിയന്ത്രണവുമായി ബന്ധപ്പെട്ട തര്ക്കമാണ് സംഘര്ഷത്തില് കലാശിച്ചത്.
രോഗിക്കൊപ്പം വാര്ഡിനുള്ളിലേക്ക് കൂടുതല് ആളുകളെ പ്രവേശിപ്പിക്കാന് കഴിയില്ലെന്ന് പ്രശാന്തന് നിലപാടെടുത്തതോടെയാണ് തര്ക്കം തുടങ്ങിയത്. നിയന്ത്രണങ്ങള് ലംഘിക്കാന് ശ്രമിച്ച ആറംഗ സംഘം പ്രശാന്തനെ ശാരീരികമായി ഉപദ്രവിക്കുകയായിരുന്നു. മര്ദനത്തില് കഴുത്തിന് ഗുരുതരമായി പരിക്കേറ്റ അദ്ദേഹത്തെ അതേ ആശുപത്രിയില് തന്നെ ചികിത്സയ്ക്കായി പ്രവേശിപ്പിച്ചു.
ആശുപത്രി അധികൃതരുടെ പരാതിയില് മഞ്ചേരി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. അക്രമികള്ക്കായി തിരച്ചില് ഊര്ജ്ജിതമാക്കിയതായും സിസിടിവി ദൃശ്യങ്ങള് പരിശോധിച്ച് വരികയാണെന്നും പോലീസ് അറിയിച്ചു. ആശുപത്രികളില് ആരോഗ്യപ്രവര്ത്തകര്ക്കും സുരക്ഷാ ജീവനക്കാര്ക്കും നേരെയുള്ള അക്രമങ്ങള് വര്ദ്ധിക്കുന്നതില് ജീവനക്കാര്ക്കിടയില് വലിയ പ്രതിഷേധം ഉയര്ന്നിട്ടുണ്ട്.
