ന്യൂഡല്‍ഹി: ഡല്‍ഹിയിലെ ഇന്ദിരാഗാന്ധി അന്താരാഷ്‌ട്ര വിമാനത്താവളത്തില്‍ വന്‍ സ്വര്‍ണ്ണവേട്ട. വസ്ത്രത്തിനുള്ളില്‍ ഒളിപ്പിച്ചു കടത്താന്‍ ശ്രമിച്ച 5.5 കോടി രൂപ വിലമതിക്കുന്ന 115 സ്വര്‍ണ്ണക്കട്ടികളുമായി ഇന്ത്യന്‍ വംശജനായ അമേരിക്കന്‍ പൗരനെ കസ്റ്റംസ് വിഭാഗം പിടികൂടി. സാന്‍ഫ്രാന്‍സിസ്‌കോയില്‍ നിന്ന് വെള്ളിയാഴ്ചയാണ് ഇയാള്‍ ഡല്‍ഹിയിലെത്തിയത്. അന്താരാഷ്‌ട്ര സ്വര്‍ണ്ണക്കടത്ത് സംഘങ്ങള്‍ ഇന്ത്യയിലേക്ക് വന്‍തോതില്‍ സ്വര്‍ണ്ണം എത്തിക്കാന്‍ ശ്രമിക്കുന്നുണ്ടെന്ന രഹസ്യവിവരത്തെത്തുടര്‍ന്ന് വിമാനത്താവളത്തില്‍ കസ്റ്റംസ് നിരീക്ഷണം ശക്തമാക്കിയിരുന്നു.
വിമാനമിറങ്ങിയ യാത്രക്കാരന്റെ പെരുമാറ്റത്തില്‍ സംശയം തോന്നിയ കസ്റ്റംസ് എയര്‍ ഇന്റലിജന്‍സ് യൂണിറ്റ് ഉദ്യോഗസ്ഥര്‍ ഇയാളെ നിരീക്ഷിച്ചുവരികയായിരുന്നു. പരിശോധനകള്‍ കൂടാതെ വിമാനത്താവളത്തിന് പുറത്തുകടക്കാന്‍ ശ്രമിച്ച ഇയാളെ ഉദ്യോഗസ്ഥര്‍ തടഞ്ഞുനിര്‍ത്തി ചോദ്യം ചെയ്യുകയായിരുന്നു. തുടര്‍ന്ന് സ്വതന്ത്ര സാക്ഷികളുടെ സാന്നിധ്യത്തില്‍ നടത്തിയ വിശദമായ പരിശോധനയിലാണ് സ്വര്‍ണ്ണം കണ്ടെടുത്തത്. ഏകദേശം 3.5 കിലോഗ്രാമിലധികം ഭാരമുള്ള 24 കാരറ്റ് സ്വര്‍ണ്ണക്കട്ടികളാണ് ഇയാളില്‍ നിന്ന് കണ്ടെടുത്തത്.
പ്രത്യേകമായി രൂപകല്‍പ്പന ചെയ്ത ബെല്‍റ്റിനുള്ളിലും, സാധാരണ പരിശോധനകളില്‍ കണ്ടെത്താന്‍ പ്രയാസമുള്ള രീതിയില്‍ പാന്റ്‌സിന്റെ ഉള്ളിലെ രഹസ്യ അറകളിലുമാണ് സ്വര്‍ണ്ണം ഒളിപ്പിച്ചിരുന്നത്. അറസ്റ്റിലായ വ്യക്തി ഒരു ‘കാരിയര്‍’ മാത്രമാണെന്നാണ് ഉദ്യോഗസ്ഥരുടെ പ്രാഥമിക നിഗമനം. ഇയാള്‍ക്ക് പിന്നില്‍ പ്രവര്‍ത്തിക്കുന്ന അന്താരാഷ്‌ട്ര സ്വര്‍ണ്ണക്കടത്ത് മാഫിയയെ കണ്ടെത്താന്‍ അന്വേഷണം ഊര്‍ജ്ജിതമാക്കിയിട്ടുണ്ട്. പ്രതിയുടെ മൊബൈല്‍ ഫോണ്‍, യാത്രാ രേഖകള്‍, സാമ്പത്തിക ഇടപാടുകള്‍ എന്നിവ കേന്ദ്ര ഏജന്‍സികള്‍ പരിശോധിച്ചുവരികയാണ്.
ഡല്‍ഹിയില്‍ ഈ സ്വര്‍ണ്ണം ആര്‍ക്ക് കൈമാറാനാണ് ലക്ഷ്യമിട്ടിരുന്നതെന്നും അന്വേഷിക്കുന്നുണ്ട്. സ്വര്‍ണ്ണത്തിന്റെ ഇറക്കുമതി തീരുവ വര്‍ദ്ധിപ്പിച്ചതിന് പിന്നാലെ രാജ്യത്ത് സ്വര്‍ണ്ണക്കടത്ത് കേസുകളില്‍ വന്‍ വര്‍ദ്ധനവ് ഉണ്ടായിട്ടുണ്ടെന്ന് കസ്റ്റംസ് അധികൃതര്‍ പറഞ്ഞു. സ്‌ക്രീനിംഗ് സാങ്കേതികവിദ്യയും ഡാറ്റാ അനാലിസിസും ഉപയോഗിച്ച് വിമാനത്താവളങ്ങളില്‍ കര്‍ശനമായ സുരക്ഷാ പരിശോധനകളാണ് ഇപ്പോള്‍ നടപ്പിലാക്കുന്നത്.
