കൊല്ലം: പതിനാല് വയസ്സുകാരിയായ പെൺകുട്ടിയെ നിരന്തരമായി ലൈംഗിക പീഡനത്തിനിരയാക്കിയ കേസിൽ 52 കാരൻ പോലീസിന്റെ പിടിയിലായി. അഞ്ചൽ തഴമേൽ സ്വദേശിയായ ഷാഹുൽ ഹമീദ് ആണ് പോക്സോ കേസിൽ അറസ്റ്റിലായത്. കഴിഞ്ഞ ഏതാനും വർഷങ്ങളായി പെൺകുട്ടിയെ ഇയാൾ പലയിടങ്ങളിൽ വെച്ച് പീഡിപ്പിച്ചു വരികയായിരുന്നു.
കേസിനാസ്പദമായ സംഭവങ്ങൾ ആരംഭിക്കുന്നത് 2022 മുതലാണ്. പെൺകുട്ടിയുടെ വീട്ടിൽ ആരുമില്ലാതിരുന്ന സമയങ്ങൾ നോക്കിയായിരുന്നു പ്രതി അതിക്രമങ്ങൾ നടത്തിയിരുന്നത്. ഷാഹുൽ ഹമീദിന്റെ സ്വന്തം വീട്ടിലും മറ്റ് പല വീടുകളിലും എത്തിച്ച് ഇയാൾ കുട്ടിയെ നിരന്തരമായി ലൈംഗിക പീഡനത്തിന് ഇരയാക്കുകയായിരുന്നു. എന്നാൽ കഴിഞ്ഞ ദിവസം വീണ്ടും ലൈംഗിക അതിക്രമത്തിന് തുനിഞ്ഞപ്പോൾ പെൺകുട്ടി ശക്തമായി എതിർത്തു.
തുടർന്ന് കുട്ടി തനിക്കുണ്ടായ ദാരുണമായ അനുഭവം മാതാപിതാക്കളോട് തുറന്നുപറയുകയായിരുന്നു. വിവരമറിഞ്ഞ് ഞെട്ടിയ മാതാപിതാക്കൾ വൈകാതെ തന്നെ പോലീസിൽ പരാതി നൽകി. തുടർന്ന് പെൺകുട്ടിയുടെ മൊഴി വിശദമായി രേഖപ്പെടുത്തിയ പോലീസ് പ്രതിക്കെതിരെ പോക്സോ അടക്കമുള്ള കടുത്ത വകുപ്പുകൾ ചുമത്തി കേസ് രജിസ്റ്റർ ചെയ്തു. ഒളിവിൽ പോകാൻ ശ്രമിച്ച ഷാഹുലിനെ അഞ്ചലിൽ നിന്നും പോലീസ് സംഘം അതിവേഗം അറസ്റ്റ് ചെയ്യുകയായിരുന്നു. വൈദ്യപരിശോധനയ്ക്ക് ശേഷം കോടതിയിൽ ഹാജരാക്കിയ പ്രതിയെ നിലവിൽ റിമാൻഡ് ചെയ്തിട്ടുണ്ട്.
