ന്യൂഡല്ഹി: ഭാരതവും ഇറ്റലിയും തമ്മിലുള്ള ഉഭയകക്ഷി സഹകരണം ഇനിമുതല് ‘പ്രത്യേക തന്ത്രപരമായ പങ്കാളിത്തത്തിലേക്ക്’ വഴിമാറുന്നു. റോമില് വച്ച് ഇറ്റാലിയന് പ്രധാനമന്ത്രി ജോര്ജിയ മെലോണിയുമായി നടത്തിയ സുപ്രധാന ചര്ച്ചകള്ക്ക് ശേഷമാണ് ഇന്ത്യന് പ്രധാനമന്ത്രി നരേന്ദ്ര മോദി ഇരുരാജ്യങ്ങളും തമ്മിലുള്ള ഈ നിര്ണ്ണായക നയതന്ത്ര മാറ്റം പരസ്യപ്പെടുത്തിയത്. പുതിയ തീരുമാനത്തോടെ ഇരുരാജ്യങ്ങള്ക്കും തങ്ങളുടെ പരമാവധി ശേഷി പ്രയോജനപ്പെടുത്താന് സാധിക്കുമെന്ന് പ്രധാനമന്ത്രി പ്രത്യാശ പ്രകടിപ്പിച്ചു.
പരസ്പര സഹകരണത്തിന് ശക്തമായ അടിത്തറയും വ്യക്തമായ ദിശാബോധവും നല്കുന്നതിനായി ‘ഇന്ത്യ-ഇറ്റലി സംയുക്ത തന്ത്രപരമായ പ്രവര്ത്തന പദ്ധതി 2025-2029’ ഇരു നേതാക്കളും പ്രഖ്യാപിച്ചു. നിലവില് 14 ബില്യണ് യൂറോയിലുള്ള ഉഭയകക്ഷി വ്യാപാരം 2029-ഓടെ 20 ബില്യണ് യൂറോ എന്ന വന് ലക്ഷ്യത്തിലേക്ക് എത്തിക്കാനാണ് ഇരുരാജ്യങ്ങളും സംയുക്തമായി ശ്രമിക്കുന്നത്. യൂറോപ്യന് യൂണിയനും ഇന്ത്യയും തമ്മിലുള്ള സ്വതന്ത്ര വ്യാപാര കരാറിലെ സാധ്യതകള് പരമാവധി ഉപയോഗപ്പെടുത്തിക്കൊണ്ട് ഈ ലക്ഷ്യം കൈവരിക്കാനാകുമെന്ന് ജോര്ജിയ മെലോണി വ്യക്തമാക്കി. ഭാരതത്തിന്റെ വികസന കുതിപ്പില് നിലവില് 400-ലധികം ഇറ്റാലിയന് കമ്പനികള് നിര്ണ്ണായക പങ്കുവഹിക്കുന്നുണ്ടെന്ന് നരേന്ദ്ര മോദി ചൂണ്ടിക്കാട്ടി.
ഇരുരാജ്യങ്ങളും തമ്മിലുള്ള നയതന്ത്ര ബന്ധം ചരിത്രത്തിലാദ്യമായി ഇത്രയും ശക്തവും ഉയര്ന്നതുമായ തലത്തില് എത്തിനില്ക്കുകയാണെന്ന് വാര്ത്താസമ്മേളനത്തില് ജോര്ജിയ മെലോണി പറഞ്ഞു. കഴിഞ്ഞ മൂന്നര വര്ഷത്തിനിടെ പ്രധാനമന്ത്രി നരേന്ദ്ര മോദിയുമായി നടത്തിയ ഏഴ് കൂടിക്കാഴ്ചകളാണ് ഈ ബന്ധം ഇത്രത്തോളം ഊഷ്മളമാക്കിയത്. പരസ്പര ബഹുമാനത്തിലൂന്നിയുള്ള ഈ വ്യക്തിപരമായ സൗഹൃദം ഒട്ടനവധി പ്രതിസന്ധികളില് വേഗത്തിലും ഫലപ്രദമായും തീരുമാനങ്ങളെടുക്കാന് സഹായിച്ചിട്ടുണ്ട്. വര്ഷങ്ങളായി ഭരണത്തിലിരുന്നിട്ടും ഇന്ത്യന് ജനതയ്ക്കുള്ളില് പ്രധാനമന്ത്രി മോദിക്കുള്ള ജനപ്രീതിയും അദ്ദേഹത്തിന്റെ പ്രായോഗികമായ നേതൃപാടവത്തെയും മെലോണി പ്രത്യേകം പ്രശംസിച്ചു.
വ്യാപാരത്തിനപ്പുറം സാങ്കേതിക വിദ്യ, ഉന്നത വിദ്യാഭ്യാസം, ശാസ്ത്ര ഗവേഷണം എന്നിവയ്ക്ക് ഊന്നല് നല്കിക്കൊണ്ടുള്ള പുതിയ പദ്ധതികളും ചര്ച്ചയായി. സ്റ്റാര്ട്ടപ്പുകള്, ഗവേഷണ സ്ഥാപനങ്ങള്, സര്വ്വകലാശാലകള് എന്നിവയെ പരസ്പരം ബന്ധിപ്പിക്കുന്നതിനായി ന്യൂഡല്ഹി കേന്ദ്രീകരിച്ച് ഒരു പ്രത്യേക ഹബ്ബ് രൂപീകരിക്കും. ‘ഇന്നൊവേറ്റ് ഇന്ത്യ ഇനിഷ്യേറ്റീവ്’ പ്രോത്സാഹിപ്പിക്കുന്നതിന്റെ ഭാഗമായാണ് ഈ പുതിയ കേന്ദ്രം നിലവില് വരുന്നത്. നിര്ദ്ദിഷ്ട കര്മ്മപദ്ധതികള് നിശ്ചിത സമയപരിധിക്കുള്ളില് തന്നെ പൂര്ത്തിയാക്കുമെന്നും ഇരു നേതാക്കളും ഉറപ്പുനല്കി.
