ചെന്നൈ: കളിയില്‍ എന്തും സംഭവിക്കാം, എന്നാല്‍ കളി കഴിഞ്ഞാല്‍ നമ്മള്‍ സുഹൃത്തുക്കളാണ്! ഏതാനും ദിവസങ്ങള്‍ക്ക് മുന്‍പ് ഐപിഎല്‍ മൈതാനത്ത് വച്ച് തങ്ങള്‍ക്കിടയിലുണ്ടായ ചൂടേറിയ തര്‍ക്കങ്ങള്‍ സൗഹൃദത്തോടെ അവസാനിപ്പിച്ചിരിക്കുകയാണ് ചെന്നൈ സൂപ്പര്‍ കിംഗ്‌സ് ക്യാപ്റ്റനും വിക്കറ്റ് കീപ്പറുമായ സഞ്ജു സാംസണും ഹൈദരാബാദ് താരം ഹെന്റിച്ച് ക്ലാസനും. ഇന്‍സ്റ്റാഗ്രാം സ്റ്റോറികളിലൂടെ പരസ്പരം സ്‌നേഹവും ആദരവും പങ്കുവെച്ചാണ് ഇരുവരും ഈ വിവാദങ്ങള്‍ക്ക് വിരാമമിട്ടത്.
ചെപ്പോക്കില്‍ നടന്ന സണ്‍റൈസേഴ്‌സ് ഹൈദരാബാദ് – ചെന്നൈ സൂപ്പര്‍ കിംഗ്‌സ് നിര്‍ണ്ണായക പോരാട്ടത്തിനിടയിലാണ് ഇരുവരും മൈതാനത്ത് വെച്ച് വാഗ്വാദത്തില്‍ ഏര്‍പ്പെട്ടത്. സാധാരണയായി കളിക്കളത്തിനകത്തും പുറത്തും ശാന്തനായി കാണപ്പെടാറുള്ള സഞ്ജുവിന്റെ ഭാഗത്തുനിന്നുണ്ടായ ഈ അപ്രതീക്ഷിത പ്രകോപനം ആരാധകരെപ്പോലും അത്ഭുതപ്പെടുത്തിയിരുന്നു. തങ്ങള്‍ക്കിടയില്‍ യഥാര്‍ത്ഥത്തില്‍ എന്താണ് സംഭവിച്ചതെന്ന് ആരാധകര്‍ ചര്‍ച്ച ചെയ്യുന്നതിനിടയിലാണ് ഇരുവരും പിണക്കം മറന്ന് ഒന്നിച്ച ചിത്രം പങ്കുവെച്ചത്.
ക്ലാസനെ കെട്ടിപ്പിടിച്ചു നില്‍ക്കുന്ന ചിത്രം പങ്കുവെച്ചുകൊണ്ട് സഞ്ജു സാംസണ്‍ ഇങ്ങനെ കുറിച്ചു. ‘മൈതാനത്ത് പലതും സംഭവിക്കാം, എന്നാല്‍ കളിക്കളത്തിന് പുറത്ത് ഈ മികച്ച വ്യക്തിയോട് വലിയ സ്‌നേഹവും ആദരവുമേയുള്ളൂ.’ ഉടന്‍ തന്നെ ഇതിന് മറുപടിയുമായി ക്ലാസനും രംഗത്തെത്തി. അടുത്ത പോരാട്ടത്തിനായി താന്‍ കാത്തിരിക്കുന്നു എന്നായിരുന്നു ക്ലാസന്റെ കുറിപ്പ്.
ഹൈദരാബാദിന്റെ മറുപടി ബാറ്റിംഗിനിടെ 15-ാം ഓവറിലായിരുന്നു വിവാദ സംഭവം. ചെന്നൈ ഉയര്‍ത്തിയ 181 റണ്‍സ് വിജയലക്ഷ്യം പിന്തുടരുകയായിരുന്ന ഹൈദരാബാദിനായി 47 റണ്‍സോടെ അപകടകാരിയായി മുന്നേറുകയായിരുന്ന ക്ലാസനെ നൂര്‍ അഹമ്മദിന്റെ പന്തില്‍ സഞ്ജു സാംസണ്‍ മിന്നല്‍ വേഗത്തില്‍ സ്റ്റംപ് ചെയ്ത് പുറത്താക്കി. ചെന്നൈക്ക് വലിയ ബ്രേക്ക്ത്രൂ സമ്മാനിച്ച ഈ ഔട്ടിന് പിന്നാലെയാണ് ഇരുവരും തമ്മില്‍ മൈതാനത്ത് വെച്ച് വാക്കേറ്റമുണ്ടായത്. എങ്കിലും ആ മത്സരത്തില്‍ 19 ഓവറില്‍ 5 വിക്കറ്റ് നഷ്ടത്തില്‍ ഹൈദരാബാദ് ലക്ഷ്യം മറികടന്നിരുന്നു.
