ന്യൂഡല്ഹി: കായികതാരങ്ങള്ക്ക് നിരോധിത ഉത്തേജക മരുന്നുകള് എത്തിച്ചുനല്കുന്നവര്ക്കും വിതരണം ചെയ്യുന്നവര്ക്കും കടുത്ത തടവുശിക്ഷ ഉറപ്പാക്കുന്ന തരത്തില് ദേശീയ ഉത്തേജക വിരുദ്ധ നിയമം ഭേദഗതി ചെയ്യാന് കേന്ദ്ര സര്ക്കാര് ഒരുങ്ങുന്നു. ഉത്തേജക മരുന്നുകളുടെ കടത്തും വിതരണവും ക്രിമിനല് കുറ്റമാക്കുമെന്നും കുറ്റക്കാര്ക്ക് അഞ്ച് വര്ഷം വരെ തടവുശിക്ഷ ലഭിക്കുമെന്നും കേന്ദ്ര കായിക മന്ത്രി മന്സുഖ് മാണ്ഡവ്യ അറിയിച്ചു.
പൊതുജനങ്ങളുടെ അഭിപ്രായങ്ങള്ക്കും നിര്ദ്ദേശങ്ങള്ക്കുമായി ഈ ഭേദഗതികളുടെ കരട് കായിക മന്ത്രാലയത്തിന്റെ വെബ്സൈറ്റില് പ്രസിദ്ധീകരിച്ചിട്ടുണ്ട്. ‘കായിക രംഗത്തെ ഉത്തേജക ഉപയോഗവുമായി ബന്ധപ്പെട്ട് ഏതെങ്കിലും കായികതാരത്തിന് നിരോധിത മരുന്നുകള് നല്കുകയോ പ്രയോഗിക്കുകയോ ചെയ്യുന്നവര്ക്ക് അഞ്ച് വര്ഷം വരെ നീളാവുന്ന തടവുശിക്ഷയോ, രണ്ട് ലക്ഷം രൂപ വരെ പിഴയോ അല്ലെങ്കില് ഇവ രണ്ടും കൂടിയോ ശിക്ഷയായി ലഭിക്കുന്നതാണ്,’ എന്ന് ഭേദഗതിയില് വ്യക്തമാക്കുന്നു.
വരുന്ന പാര്ലമെന്റ് സമ്മേളനത്തില് പുതിയ ഭേദഗതി ബില് അവതരിപ്പിക്കുമെന്ന് കായിക മന്ത്രി മന്സുഖ് മാണ്ഡവ്യ മാധ്യമങ്ങളോട് പറഞ്ഞു. ‘ഉത്തേജക മരുന്ന് ഉപയോഗം എന്നത് ഇപ്പോള് വെറുമൊരു കായിക നിയമലംഘനം മാത്രമല്ല. കായികതാരങ്ങളെ ചൂഷണം ചെയ്യുന്ന ഒരു സംഘടിത മാഫിയയായി ഇത് മാറിയിരിക്കുന്നു. നിലവില് മരുന്ന് ഉപയോഗിക്കുന്ന കായികതാരങ്ങളെ മാത്രമാണ് നമ്മള് ശിക്ഷിക്കുന്നത്. എന്നാല് ഇതിന് പിന്നിലെ യഥാര്ത്ഥ വിതരണക്കാരെയാണ് ഇനി ലക്ഷ്യമിടേണ്ടത്,’ മന്ത്രി കൂട്ടിച്ചേര്ത്തു.
