ബെംഗളൂരു: ഡല്‍ഹിയില്‍ നിന്ന് ബെംഗളൂരുവിലേക്ക് വന്ന എയര്‍ ഇന്ത്യ വിമാനം ലാന്‍ഡിംഗിനിടെ റണ്‍വേയിലിടിച്ച് അപകടം. ഇന്ന് ബെംഗളൂരു വിമാനത്താവളത്തില്‍ വച്ചാണ് അപകടം നടന്നത്. അപകടത്തില്‍ യാത്രക്കാര്‍ക്കോ, ക്രൂ അംഗങ്ങള്‍ക്കോ പരിക്കുകള്‍ ഒന്നും ഇല്ലെന്നും എല്ലാവരും സുരക്ഷിതരാണെന്നും അധികൃതര്‍ വ്യക്തമാക്കി.
അപകടത്തെത്തുടര്‍ന്ന് എയര്‍ ഇന്ത്യയുടെ എഐ2651 എയര്‍ബസ് എ321 വിമാനം കൂടുതല്‍ പരിശോധനകള്‍ക്കായി മാറ്റിയിട്ടിരിക്കുകയാണ്. ഇതേത്തുടര്‍ന്ന് ഈ വിമാനത്തിന്റെ ഡല്‍ഹിയിലേക്കുള്ള മടക്കയാത്ര റദ്ദാക്കി. യാത്ര മുടങ്ങിയവര്‍ക്കായി എത്രയും വേഗം ബദല്‍ യാത്രാ സൗകര്യങ്ങള്‍ ഒരുക്കിവരികയാണെന്ന് ടാറ്റയുടെ ഉടമസ്ഥതയിലുള്ള എയര്‍ ഇന്ത്യ അറിയിച്ചു.
ബെംഗളൂരുവിലെ ഗ്രൗണ്ട് ടീം യാത്രക്കാര്‍ക്ക് ആവശ്യമായ എല്ലാ സഹായങ്ങളും നല്‍കുന്നുണ്ടെന്നും, വ്യോമയാന നിയന്ത്രണ ഏജന്‍സികളുമായി സഹകരിച്ച് സംഭവത്തില്‍ കൃത്യമായ അന്വേഷണം നടത്തുമെന്നും എയര്‍ ഇന്ത്യ വക്താവ് വ്യക്തമാക്കി. യാത്രക്കാര്‍ക്കുണ്ടായ ബുദ്ധിമുട്ടില്‍ എയര്‍ ഇന്ത്യ ഖേദം പ്രകടിപ്പിച്ചു.
എയര്‍ ഇന്ത്യ വിമാനം ലാന്‍ഡിംഗിനായി തയാറെടുക്കുന്നതിന് തൊട്ടുമുന്‍പാണ് ഒരു ബോയിംഗ് 747 വിമാനം അവിടെ നിന്നും പറന്നുയര്‍ന്നതെന്ന് വ്യോമയാന വൃത്തങ്ങള്‍ സൂചിപ്പിക്കുന്നു. ഈ വലിയ ബോയിംഗ് വിമാനത്തിന്റെ എഞ്ചിനുകള്‍ ഉണ്ടാക്കിയ ശക്തമായ കാറ്റ് കാരണം ലാന്‍ഡിംഗ് സുരക്ഷിതമാകില്ലെന്ന് പൈലറ്റ് തിരിച്ചറിഞ്ഞു. തുടര്‍ന്ന് ലാന്‍ഡിംഗ് ഒഴിവാക്കി വിമാനം വീണ്ടും മുകളിലേക്ക് ഉയര്‍ത്താനുള്ള ശ്രമത്തിനിടയിലാണ് വിമാനത്തിന്റെ വാല്‍ഭാഗം റണ്‍വേയില്‍ തട്ടിയതെന്നാണ് പ്രാഥമിക വിവരം.
വിമാനം ലാന്‍ഡ് ചെയ്യുന്ന സമയത്തോ പറന്നുയരുന്ന സമയത്തോ അതിന്റെ പിന്‍ഭാഗം റണ്‍വേയുടെ ഉപരിതലത്തില്‍ വന്ന് ഇടിക്കുന്നതിനെയാണ് ‘ടെയില്‍സ്‌ട്രൈക്ക്’ എന്ന് പറയുന്നത്. ഇത്തരം സംഭവങ്ങള്‍ ഉണ്ടായാല്‍ വിമാനത്തിന് എന്തെങ്കിലും തരത്തിലുള്ള ഘടനാപരമായ തകരാറുകള്‍ സംഭവിച്ചിട്ടുണ്ടോ എന്ന് വിശദമായി പരിശോധിക്കേണ്ടതുണ്ട്.
