മെല്‍ബണ്‍: ചരിത്രത്തിലെ ഇരുപത്തിയഞ്ചാം ഗ്രാന്‍ഡ്സ്ലാം കിരീടം ലക്ഷ്യമിട്ട് ഫ്രഞ്ച് ഓപ്പണിനിറങ്ങുന്ന മുന്‍ ലോക ഒന്നാം നമ്പര്‍ താരം നൊവാക് ജോക്കോവിച്ച് തന്റെ പരിശീലനത്തിന് പുതിയ കോച്ചിനെ നിയമിച്ചു. തന്റെ മുന്‍ സഹതാരവും സുഹൃത്തുമായ വിക്ടര്‍ ട്രോയിസ്‌കിയെയാണ് ജോക്കോവിച്ച് പുതിയ കോച്ചായി നിയമിച്ചത്. തന്നേക്കാള്‍ ഒരു വയസ്സ് കൂടുതലുള്ള ട്രോയിസ്‌കിക്കൊപ്പം നിരവധി മത്സരങ്ങളില്‍ ഒരുമിച്ച് കളിച്ചുള്ള പരിചയം ജോക്കോവിച്ചിനുണ്ട്.
എടിപി ടൂറില്‍ ഇരുവരും നേര്‍ക്കുനേര്‍ വന്ന 14 മത്സരങ്ങളില്‍ 13 തവണയും വിജയം ജോക്കോവിച്ചിനൊപ്പമായിരുന്നു. എന്നാല്‍, 2010-ല്‍ സെര്‍ബിയ ആദ്യമായും അവസാനമായും ഡേവിസ് കപ്പ് കിരീടം ചൂടിയപ്പോള്‍ ഇരുവരും ഒരേ ടീമില്‍ ഒന്നിച്ച് പോരാടിയവരാണ്. ‘എന്റെ സുഹൃത്തും സഹതാരവും ഇപ്പോള്‍ എന്റെ പരിശീലകനുമായ വിക്ടര്‍ ട്രോയിസ്‌കിക്ക് സ്വാഗതം…’ ഇന്‍സ്റ്റാഗ്രാമില്‍ ചിത്ര പങ്കുവെച്ചുകൊണ്ട് ജോക്കോവിച്ച് കുറിച്ചു.
മുന്‍ ലോക 12-ാം നമ്പര്‍ താരമായിരുന്ന ട്രോയിസ്‌കി 15 വര്‍ഷത്തെ നീണ്ട കരിയറിന് ശേഷം 2021-ലാണ് ടെന്നീസില്‍ നിന്ന് വിരമിച്ചത്. കരിയറില്‍ മൂന്ന് എടിപി കിരീടങ്ങള്‍ നേടിയിട്ടുള്ള അദ്ദേഹം, അടുത്ത കാലത്തായി സെര്‍ബിയയുടെ ഡേവിസ് കപ്പ് ക്യാപ്റ്റനായി സേവനമനുഷ്ഠിക്കുകയായിരുന്നു. ജോക്കോവിച്ചിന്റെ പരിശീലകനാകുന്നതിന് മുന്‍പ് ഹമദ് മെദ്‌ജെദോവിച്ച്, മിയോമിര്‍ കെക്മാനോവിച്ച് എന്നിവരെയും അദ്ദേഹം പരിശീലിപ്പിച്ചിട്ടുണ്ട്.
കരിയറില്‍ മുന്‍പെങ്ങുമില്ലാത്തവിധം കളിമണ്‍ കോര്‍ട്ടില്‍ ഈ സീസണില്‍ ഒരു വിജയം പോലും നേടാനാകാതെയാണ് ജോക്കോവിച്ച് ഫ്രഞ്ച് ഓപ്പണിലേക്ക് വരുന്നത്. 2005-ന് ശേഷം ആദ്യമായാണ് താരം ഇത്തരമൊരു മോശം ഫോമിലൂടെ കടന്നുപോകുന്നത്. വലതു കൈയ്‌ക്കേറ്റ പരിക്ക് കാരണം മയാമി ഓപ്പണില്‍ നിന്ന് പിന്മാറിയ ജോക്കോവിച്ചിന് മോണ്ടെ കാര്‍ലോ, മാഡ്രിഡ് ടൂര്‍ണമെന്റുകളും നഷ്ടമായിരുന്നു. പിന്നീട് റോം ഓപ്പണിലൂടെ കളിമണ്‍ കോര്‍ട്ടിലേക്ക് തിരിച്ചെത്തിയെങ്കിലും, ആദ്യ സെറ്റ് നേടിയ ശേഷം യോഗ്യതാ റൗണ്ട് കടന്നുവന്ന ഡിനോ പ്രിസ്മിച്ചിനോട് അപ്രതീക്ഷിത തോല്‍വി ഏറ്റുവാങ്ങേണ്ടി വന്നു.
‘സത്യം പറഞ്ഞാല്‍ ഇത് മികച്ചൊരു ഒരുക്കമല്ല. മുന്‍പത്തെപ്പോലെ ശാരീരിക ബുദ്ധിമുട്ടുകളോ ആരോഗ്യപ്രശ്‌നങ്ങളോ ഇല്ലാതെ ഒരു ടൂര്‍ണമെന്റിന് ഇറങ്ങാന്‍ കഴിഞ്ഞത് എപ്പോഴാണെന്ന് എനിക്ക് ഓര്‍മ്മയില്ല. എപ്പോഴും എന്തെങ്കിലും ഒരു പ്രശ്‌നം കാണും. ഞാന്‍ നേരിടേണ്ടി വരുന്ന ഒരു പുതിയ യാഥാര്‍ത്ഥ്യമാണിത്. ഇത് നിരാശാജനകമാണ്, എങ്കിലും ഇത്തരം സാഹചര്യങ്ങളിലും കളത്തിലിറങ്ങുക എന്നത് എന്റെ തീരുമാനമാണ്,’ മെയ് 8-ലെ തോല്‍വിക്ക് ശേഷം ജോക്കോവിച്ച് വ്യക്തമാക്കിയിരുന്നു.
ഫ്രഞ്ച് ഓപ്പണില്‍ മൂന്ന് തവണ ചാമ്പ്യനായിട്ടുള്ള ജോക്കോവിച്ച് 2023-ലാണ് ഇവിടെ അവസാനമായി കിരീടം ചൂടിയത്. ഇത്തവണ പാരീസില്‍ കിരീടം നേടാനായാല്‍ പുരുഷ-വനിതാ ഭേദമന്യേ ടെന്നീസ് ചരിത്രത്തില്‍ ഏറ്റവും കൂടുതല്‍ ഗ്രാന്‍ഡ്സ്ലാം സിംഗിള്‍സ് കിരീടങ്ങള്‍ നേടുന്ന താരം എന്ന എക്കാലത്തെയും വലിയ റെക്കോര്‍ഡ് ജോക്കോവിച്ചിന് സ്വന്തമാകും.
