ന്യൂഡല്ഹി: രാജ്യത്തിന്റെ ഭൂരിഭാഗം പ്രദേശങ്ങളും കടുത്ത ഉഷ്ണതരംഗത്തില് വെന്തുരുകുന്നതിനിടെ ആശ്വാസ വാര്ത്തയുമായി കാലാവസ്ഥാ വകുപ്പ്. വടക്കന് ഇന്ത്യയിലേക്ക് വന്തോതിലുള്ള ‘വെസ്റ്റേണ് ഡിസ്റ്റര്ബന്സ്’ എത്തുന്നതായി ഇന്ത്യന് കാലാവസ്ഥാ വകുപ്പിന്റെ പുതിയ ഉപഗ്രഹചിത്രങ്ങള് വ്യക്തമാക്കുന്നു. ഇതോടെ വരും ദിവസങ്ങളില് മഴ ലഭിക്കുമെന്നും കടുത്ത ചൂടില് നിന്ന് താല്ക്കാലിക ആശ്വാസം ഉണ്ടാകുമെന്നുമുള്ള പ്രതീക്ഷയിലാണ് ജനങ്ങള്.
ഇന്സാറ്റ്-3ഡിഎസ് കാലാവസ്ഥാ ഉപഗ്രഹം മെയ് 21-ന് പകര്ത്തിയ ഏറ്റവും പുതിയ തെര്മല് ഇന്ഫ്രാറെഡ് ചിത്രങ്ങളില് അഫ്ഗാനിസ്ഥാന്, പാകിസ്ഥാന്, അതിനോട് ചേര്ന്നുള്ള വടക്കുപടിഞ്ഞാറന് ഇന്ത്യ എന്നിവയ്ക്ക് മുകളിലായി വ്യാപിച്ചുകിടക്കുന്ന വലിയ മേഘക്കൂട്ടവും ചുഴലിക്കാറ്റ് രൂപീകരണവും കാണാം.
അറബിക്കടലില് നിന്നുള്ള ശക്തമായ ഈര്പ്പത്തിന്റെ സാന്നിധ്യവും വടക്കുകിഴക്കന് ഇന്ത്യയ്ക്കും ബംഗാള് ഉള്ക്കടലിനും മുകളിലുള്ള മേഘരൂപീകരണവും ഉപഗ്രഹചിത്രങ്ങളില് വ്യക്തമാണ്. വടക്കന് പാകിസ്ഥാനിലും ജമ്മു കശ്മീരിലുമാണ് നിലവില് ഏറ്റവും ശക്തമായ മേഘസാന്നിധ്യമുള്ളത്. ഈ വെസ്റ്റേണ് ഡിസ്റ്റര്ബന്സ് അറബിക്കടലിലെ ഈര്പ്പവുമായി സമ്പര്ക്കത്തില് വരുന്നതോടെ ശക്തമായ ഇടിമിന്നല്, കാറ്റ്, കനത്ത മഴ എന്നിവയ്ക്ക് സാധ്യതയുണ്ട്.
അടുത്ത ഏതാനും ദിവസങ്ങള്ക്കുള്ളില് ജമ്മു കശ്മീര്, ഹിമാചല് പ്രദേശ്, ഉത്തരാഖണ്ഡ്, പഞ്ചാബ്, ഹരിയാന, ഡല്ഹി, പടിഞ്ഞാറന് ഉത്തര്പ്രദേശ് എന്നിവിടങ്ങളില് ഈ പ്രതിഭാസം മൂലം മഴ ലഭിച്ചേക്കും. ചിലയിടങ്ങളില് ശക്തമായ പൊടിക്കാറ്റിനും ആലിപ്പഴ വര്ഷത്തിനും സാധ്യതയുണ്ട്. ഈ മഴയോടെ ഉഷ്ണതരംഗം പൂര്ണ്ണമായി മാറില്ലെങ്കിലും, രാത്രികാല താപനില ഉള്പ്പെടെയുള്ളവയില് വലിയ കുറവുണ്ടാക്കാന് ഇത് സഹായിക്കും.
ഇതിനുപുറമെ, അറബിക്കടലിലും തെക്കന് ബംഗാള് ഉള്ക്കടലിലും കാലവര്ഷത്തിന് അനുകൂലമായ രീതിയില് മേഘങ്ങള് രൂപപ്പെട്ടു തുടങ്ങുന്നതായും ഉപഗ്രഹചിത്രങ്ങള് സൂചന നല്കുന്നു. എങ്കിലും, ആഗോള കാലാവസ്ഥാ വ്യതിയാനം കാരണം ഇന്ത്യയിലെ ഉഷ്ണതരംഗങ്ങള് കൂടുതല് ദൈര്ഘ്യമേറിയതും കഠിനവും പ്രവചനാതീതവുമായി മാറിക്കൊണ്ടിരിക്കുകയാണെന്ന് വിദഗ്ധര് മുന്നറിയിപ്പ് നല്കുന്നു.
കഴിഞ്ഞ കുറച്ചുദിവസങ്ങളായി വടക്കുപടിഞ്ഞാറന്-മധ്യ ഇന്ത്യ കടുത്ത ചൂടിന്റെ പിടിയിലാണ്. ഡല്ഹി, രാജസ്ഥാന്, ഹരിയാന, ഉത്തര്പ്രദേശ്, മധ്യപ്രദേശിന്റെ ചില ഭാഗങ്ങള് എന്നിവിടങ്ങളില് പകല് താപനില 45 ഡിഗ്രി സെല്ഷ്യസിനും മുകളിലാണ്. പകല്ച്ചൂടിന് പുറമെ, രാത്രികാലങ്ങളിലും താപനില ഒട്ടും കുറയാത്തത് സ്ഥിതി സങ്കീര്ണ്ണമാക്കുന്നു. രാത്രികളില് അന്തരീക്ഷം തണുക്കാത്തത് മനുഷ്യശരീരത്തിന് വിശ്രമം ലഭിക്കുന്നതിനെ തടസ്സപ്പെടുത്തുന്നുവെന്നും ഇത് ഏറെ അപകടകരമാണെന്നും കാലാവസ്ഥാ ശാസ്ത്രജ്ഞര് ചൂണ്ടിക്കാണിക്കുന്നു.
