തിരുവനന്തപുരം: സംസ്ഥാനത്ത് പെയ്യുന്ന കനത്ത മഴയുടെ പശ്ചാത്തലത്തില് കാലാവസ്ഥാ വകുപ്പ് ജാഗ്രതാ നിര്ദ്ദേശങ്ങള് പുതുക്കി. നേരത്തെ അഞ്ച് ജില്ലകളില് മാത്രമായിരുന്ന മഴ മുന്നറിയിപ്പ് ഇപ്പോള് ഒന്പത് ജില്ലകളിലേക്ക് വ്യാപിപ്പിച്ചു. തെക്കന് കേരളം മുതല് വടക്കേ അറ്റം വരെയുള്ള വിവിധ പ്രദേശങ്ങളില് വരും ദിവസങ്ങളില് ശക്തമായ കാറ്റോടും ഇടിമിന്നലോടും കൂടിയ മഴയ്ക്കാണ് സാധ്യത പ്രവചിക്കുന്നത്.
കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്, കോഴിക്കോട്, കണ്ണൂര്, കാസര്കോട് എന്നീ ജില്ലകളിലാണ് നിലവില് യെല്ലോ അലര്ട്ട് പ്രഖ്യാപിച്ചിരിക്കുന്നത്. മഴയ്ക്കൊപ്പം മണിക്കൂറില് 40 മുതല് 50 കിലോമീറ്റര് വരെ വേഗതയുള്ള കാറ്റിനും സാധ്യതയുള്ളതിനാല് തീരദേശവാസികളും മലയോര മേഖലയിലുള്ളവരും പ്രത്യേക ജാഗ്രത പാലിക്കണമെന്ന് നിര്ദ്ദേശമുണ്ട്.
കേന്ദ്ര കാലാവസ്ഥാ വകുപ്പിന്റെ കണക്കുകൂട്ടല് പ്രകാരം 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെയുള്ള ശക്തമായ മഴ ബുധനാഴ്ച വരെ തുടര്ന്നേക്കും. നാളെ പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര് ജില്ലകളള്ക്കും, തിങ്കളാഴ്ച പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, മലപ്പുറം, കോഴിക്കോട്, വയനാട്, ചൊവ്വാഴ്ച തിരുവനന്തപുരം, കൊല്ലം, ആലപ്പുഴ, ബുധനാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം എന്നീ ജില്ലകളിലും അലേര്ട്ട് പ്രഖ്യപിച്ചിട്ടുണ്ട്.
അറബിക്കടലിലും ബംഗാള് ഉള്ക്കടലിലും രൂപപ്പെട്ടിരിക്കുന്ന സങ്കീര്ണ്ണമായ അന്തരീക്ഷ വ്യതിയാനങ്ങളാണ് നിലവിലെ കനത്ത മഴയ്ക്ക് കാരണം. തെക്കുകിഴക്കന് അറബിക്കടലിലും മധ്യ-കിഴക്കന് അറബിക്കടലിലുമായി രണ്ട് വ്യത്യസ്ത ചക്രവാതച്ചുഴികള് നിലനില്ക്കുന്നു. തെക്കുകിഴക്കന് ബംഗാള് ഉള്ക്കടലിന് മുകളില് സമുദ്രനിരപ്പില് നിന്ന് 3.1 കിലോമീറ്റര് ഉയരത്തില് മൂന്നാമതൊരു ചക്രവാതച്ചുഴി കൂടിയുണ്ട്.
അറബിക്കടലിലെ ചക്രവാതച്ചുഴിയില് നിന്ന് ആരംഭിച്ച് കേരളത്തിനും തമിഴ്നാടിനും മുകളിലൂടെ കന്യാകുമാരി വരെ നീളുന്ന ശക്തമായ ഒരു ന്യൂനമര്ദ്ദ പാത്തിയും നിലവിലുണ്ട്. ഈ നാല് അന്തരീക്ഷ ഘടകങ്ങള് ഒരുമിച്ച് സ്വാധീനിക്കുന്നതിനാലാണ് കേരളത്തില് വരും ദിവസങ്ങളില് കാറ്റും ഇടിയോടും കൂടിയ മഴ ശക്തമാകുന്നത്.
