ന്യൂഡല്ഹി: ഇന്ത്യയും അമേരിക്കയും തമ്മിലുള്ള സുരക്ഷാ, വ്യാപാര ബന്ധങ്ങള് കൂടുതല് ദൃഢമാക്കുന്നതിനായി പ്രധാനമന്ത്രി നരേന്ദ്ര മോദിയും യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയും തമ്മില് നിര്ണായക ചര്ച്ച നടത്തി. യുഎസ് പ്രസിഡന്റ് ഡൊണാള്ഡ് ട്രംപിന് വേണ്ടി പ്രധാനമന്ത്രി മോദിയെ വൈറ്റ് ഹൗസ് സന്ദര്ശിക്കാന് റൂബിയോ ഔദ്യോഗികമായി ക്ഷണിച്ചു.
ഇന്ത്യ-യുഎസ് സമഗ്ര ആഗോള തന്ത്രപരമായ പങ്കാളിത്തം ശക്തിപ്പെടുത്തുന്നതിനൊപ്പം പ്രാദേശികവും ആഗോളവുമായ സമാധാനവും സുരക്ഷയും കൂടിക്കാഴ്ചയില് ചര്ച്ചയായി. ചൈന സ്വാധീനം വര്ദ്ധിപ്പിക്കാന് ശ്രമിക്കുന്ന ഇന്ഡോ-പസഫിക് മേഖലയിലെ സാഹചര്യങ്ങളും ചര്ച്ചയില് ഉയര്ന്നുവന്നതായി കൂടിക്കാഴ്ചയില് പങ്കെടുത്ത യുഎസ് പ്രതിനിധി സെര്ജിയോ ഗോര് വ്യക്തമാക്കി. ഇന്ഡോ-പസഫിക് മേഖലയില് ചൈനയ്ക്ക് തടയിടാന് അമേരിക്ക എക്കാലവും ഇന്ത്യയെ ഒരു പ്രധാന ശക്തിയായാണ് കാണുന്നത്.
‘സുരക്ഷ, വ്യാപാരം, നിര്ണായക സാങ്കേതികവിദ്യകള് എന്നിവയിലെ യുഎസ്-ഇന്ത്യ സഹകരണം ആഴത്തിലാക്കുന്നതിനുള്ള വഴികളെക്കുറിച്ച് ഞങ്ങള് ഫലപ്രദമായ ചര്ച്ച നടത്തി. സ്വതന്ത്രവും തുറന്നതുമായ ഇന്ഡോ-പസഫിക് മേഖലയ്ക്ക് ഈ സഹകരണം അനിവാര്യമാണ്. ഇന്ത്യ അമേരിക്കയുടെ സുപ്രധാന പങ്കാളിയാണ്,’ സെര്ജിയോ ഗോര് എക്സില് കുറിച്ചു. കൂടിക്കാഴ്ചയ്ക്ക് ശേഷം പ്രധാനമന്ത്രി മോദിയും എക്സിലൂടെ വിശദാംശങ്ങള് പങ്കുവെച്ചു.
‘യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയെ സ്വീകരിച്ചതില് സന്തോഷമുണ്ട്. ഇന്ത്യ-യുഎസ് തന്ത്രപരമായ പങ്കാളിത്തത്തിലെ പുരോഗതിയും ആഗോള സമാധാനവുമായി ബന്ധപ്പെട്ട വിഷയങ്ങളും ഞങ്ങള് ചര്ച്ച ചെയ്തു. ആഗോള നന്മയ്ക്കായി ഇരുരാജ്യങ്ങളും ഒന്നിച്ച് പ്രവര്ത്തിക്കുന്നത് തുടരും.’ പാകിസ്ഥാന് മധ്യസ്ഥത വഹിച്ച സമാധാന ചര്ച്ചകള് പരാജയപ്പെട്ടതിനെ തുടര്ന്ന്, ഇറാനെതിരെ വീണ്ടും ആക്രമണം നടത്താന് ട്രംപ് ആലോചിക്കുന്നതായുള്ള റിപ്പോര്ട്ടുകള്ക്കിടയിലാണ് ഈ കൂടിക്കാഴ്ച നടക്കുന്നത് എന്നതും ശ്രദ്ധേയമാണ്.
ഇന്ന് വിദേശകാര്യ മന്ത്രി എസ്. ജയശങ്കറുമായി റൂബിയോ ഉഭയകക്ഷി ചര്ച്ചകള് നടത്തും. ഊര്ജ്ജം, വ്യാപാരം, നിക്ഷേപം, നിര്ണായക സാങ്കേതികവിദ്യ, ജനങ്ങള് തമ്മിലുള്ള ബന്ധം എന്നിവ ചര്ച്ചയാകും. യുഎസ് എംബസിയുടെ സ്വാതന്ത്ര്യദിന ആഘോഷങ്ങളിലും അദ്ദേഹം പങ്കെടുക്കും. നാളെ ആഗ്രയും ജയ്പൂരും സന്ദര്ശിച്ച ശേഷം ചൊവ്വാഴ്ച രാവിലെ ഡല്ഹിയില് നടക്കുന്ന ക്വാഡ് വിദേശകാര്യ മന്ത്രിമാരുടെ യോഗത്തില് പങ്കെടുക്കാന് അദ്ദേഹം തിരിച്ചെത്തും. പശ്ചിമേഷ്യന് പ്രതിസന്ധിയും ആഗോള ഊര്ജ്ജ വിതരണത്തില് അത് ചെലുത്തുന്ന സ്വാധീനവും ചര്ച്ചകളില് ഇടംപിടിച്ചേക്കും.
